ئۆپۆزیسیۆن كوردى، و مزایه‌ده‌كردنى ئه‌را گیرهاوردن ده‌سڵات

شفق نيوز

و ڕوى وه‌روى حاڵه‌ته‌یل گه‌ناته‌كارى ئیدارى و قه‌ومى قه‌ومى كردن و واسته‌كارى بووسیه‌ید، و ده‌سڵاته‌یل هه‌رێمیش هه‌ر له‌ یه‌كم ڕووژه‌و وه‌گه‌رمى پیشوازییگ سه‌ره‌تایى كردن له‌ى داواكاریه‌یل جایڵه‌یله‌ و ئاماده‌یى خوه‌یانیش نیشان دان ئه‌را داناین به‌رنامه‌ى كاریگ ئه‌را چاره‌سه‌ر كردن ئى كێشه‌ و گیروگرفته‌یله‌ ك دگان وه‌پیه‌و نان، له‌ سه‌ر ئاست سه‌رۆكایه‌تى هه‌رێم و سه‌رۆك حكوومه‌ت و سه‌رۆك په‌رله‌مان، وه‌لى پارته‌یل ئۆپۆزیسیۆن كوردى ئى داواكاریه‌یل ڕه‌وا كردنه‌ هه‌لیگ ئه‌را خوه‌یان و وه‌ڕیگه‌ى داموده‌زگا میدیاییه‌گانیان و قسه‌یل ئاگرین سه‌ركرده‌یلیان و ئه‌سر تیمساح ڕشانن ئه‌را مه‌ینه‌تى جایڵه‌یل و له‌یوا خوه‌یان نیشاندان ك هاوخه‌من وه‌ل ئى داواكاریه‌یله‌ و كادره‌یلیان كلكردن و تیكه‌ڵایان كردنه‌ ناو خودنیشانده‌ره‌یل، تا تویه‌نستن ده‌س بنه‌نه‌بان سه‌ركردایه‌تى و ڕابه‌رایه‌تى ئى خودنیشانداینه‌یله‌ و داناین به‌رنامه‌یگ ڕووژانه‌ ئه‌رایان ك وه‌ل به‌رژه‌وه‌ندیه‌یل خوه‌یان بگونجیه‌ید ئه‌را دریژه‌داین وه‌ خودنیشانداینه‌یله‌ و فشارخستن وه‌بان حكوومه‌ت هه‌رێم ئه‌را گیرهاوردن ده‌سكه‌فته‌یل حزبى  زیاتر و داواكاریه‌یل ڕه‌واى جایڵ وجوانه‌یل له‌هویره‌و به‌ن ك له‌ سه‌ره‌تاى ئى خودنیشانداینه‌یله‌ خستنه‌ى ڕوى.
وه‌ل ئه‌وه‌یشه‌وه‌؛ سه‌رۆكایه‌تى هه‌رێم كوردستان و حكوومه‌ته‌گه‌ى و په‌رله‌مانه‌گه‌ى وه‌ گیانیگ ئیجابیانه‌ وه‌ل بنه‌ماى خودنیشانداین و داواكاریه‌یل جایڵ و جوانه‌یله‌و ڕه‌فتاركرد  وه‌ك باوه‌ڕداشتنیگ وه‌ بنه‌مایه‌یل ئازادى و دیموكراتى ك وه‌رده‌وام وه‌ دریژى ده‌یان ساڵ خه‌بات ئه‌راى كردیه‌ و ڕاسپارده‌ى هێزه‌یل ئاسایش و پۆلیس كردیه‌ ك وه‌گیانیگ پیشه‌یى و شیوه‌یگ ژیارى و شارسانى مامه‌ڵه‌ت وه‌ل مانگره‌یله‌و بكه‌ن و لایه‌ن ماف ئاده‌میزاد بپاریزین له‌ مامه‌ڵه‌ت كردنیان وه‌ل ئى دۆسیه‌.
هه‌رله‌یوا حكوومه‌ت هه‌رێم و په‌رله‌مان وه‌ڕیگه‌ى چه‌ن كه‌ناڵیگه‌و چه‌ن وه‌فدیگ ئه‌را گفتوگووكردن وه‌ل جایڵ و جوانه‌یله‌و كلكردنه‌ و گووش گردن له‌ داواكاریه‌یلیان و ئه‌و وه‌فده‌یله‌ ڕاپۆرته‌یلیگ تایبه‌ت ئاماده‌كردن سه‌باره‌ت وه‌و گفتوگووه‌یله‌ ك وه‌ل سه‌ركرده‌یلیانه‌و ئه‌نجام گرتیه‌ و دویاخر له‌ دیداره‌یلیان تاوتوێى كردنه‌ و داوا له‌ جایڵه‌یل كردنه‌ وه‌فدیگ ئه‌را په‌رله‌مان كوردستان كل بكه‌ن ئه‌را گفتوگووكردن له‌ خاتر په‌یاكردن شیوه‌یگ  یا ئاماده‌كردن به‌رنامه‌یگ هاوبه‌ش ئه‌را جیوه‌جیكردن داواكاریه‌یل وه‌ زویترین وه‌خت، وه‌لى پارته‌یل ئۆپۆزیسیۆن ك سه‌ركردایه‌تى خودنیشانداینه‌یل ئه‌را خوه‌یان قۆرخ كردن و بوینه‌ لایه‌ن گفتوگووكه‌ر له‌ جیاتى سه‌ركردایه‌تى راسكانى، هه‌رچى چاره‌سه‌ره‌ ڕه‌ته‌وكردن و داواكاریه‌یلیان به‌رزتره‌كه‌وكردن تا ڕه‌ساننه‌ى راده‌یگ ته‌عجیزى وه‌داواكردن هه‌ڵوه‌شانن سه‌رۆكایه‌تى هه‌رێم و حكوومه‌ت و په‌رله‌مان  و دامه‌زرانن حكوومه‌تیگ كاروه‌ڕیه‌وبردن له‌ خاتر ئه‌نجامداین هه‌ڵوژاردنه‌یل پیشوه‌خته‌یگ وه‌بى هویچ مه‌هانه‌یگ ده‌ستوورى ڕه‌وا، له‌ى وه‌خته‌ ك سه‌ركردایه‌تى ئۆپۆزیسیۆن خاس زانن ك بارزانى وه‌ بان پشت تانك، یا وه‌ كووده‌تایگ خویناوى نه‌ڕه‌سیه‌سه‌ سه‌رۆكایه‌تى هه‌رێم، به‌ڵكوو وه‌سه‌رۆكایه‌تى هه‌رێم قه‌بوولكرد جوور شعووریگ وه‌ وه‌رپرسیارى تاریخى نه‌ته‌وه‌یى و نیشتمانى له‌سه‌ر خواست ڕووڵه‌یل ملله‌ته‌گه‌ى و وه‌ڕیگه‌ى سه‌ندووقه‌یل ده‌نگداین و هه‌ڵوژاردنه‌یل ئازاد و پاك.
دكتۆر به‌رهه‌م سالح ك سه‌رۆكایه‌تى كابینه‌ وه‌زاریه‌ شه‌شمه‌گه‌ى حكوومه‌ت كوردستان كه‌ید، كه‌سایه‌تییگ پله‌ یه‌كمه‌ و له‌سه‌ر ئاست عیراق و ناوچه‌گه‌ ناوده‌ركردیه‌ وه‌ وه‌رگردن پۆسته‌یل حزبى و حكوومى له‌ هه‌رێم و له‌ عیراق و هه‌وه‌جه‌ى وه‌باس كردن نیه‌ و ئه‌وه‌نه‌ گووش وه‌ پۆست و خوه‌شگوزرانى نیه‌ید چه‌نه‌ ئه‌وه‌گ تێنى خزمه‌تكردن ڕووڵه‌یل ملله‌ته‌گه‌یه‌ ، چوینكه‌ ئمڕوو تویه‌نى لا بچوود و ده‌س خوه‌ى خالى بكه‌ید ئه‌را ئه‌ركه‌یل حزبى یا هه‌ر جه‌هان سیاسه‌ت وڵ بكه‌ید و له‌هه‌رشوونیگ دڵى بگرید بژیه‌ید له‌ناو عیراق و له‌ ده‌یشتیشى.
بیلا بایمنه‌و ئه‌را پارته‌یل ئۆپۆزیسیۆن كوردستانى، ئى پارته‌یله‌ له‌ لایه‌ن پرنسیپ و ئایدیۆلۆجیا و هویره‌و وه‌ل یه‌كا فره‌ جیاوازن له‌ ناونى چه‌پ و ئسلام ئسوولى و سه‌له‌فى توندڕه‌و ك دو خه‌تن ك قه‌ت ڕووژى له‌ ڕووژان یه‌كه‌و نیه‌گرن مه‌گه‌ر له‌ حاڵه‌ت وجوود به‌رژه‌وه‌ندیه‌یل سیاسى و حزبى نه‌ود.
پارته‌یل ئۆپۆزیسیۆن ك هویچ بنكه‌یگ جه‌ماوه‌رى نه‌یرن، وه‌گشت شیوه‌یگه‌و هه‌وڵ ده‌ن ئه‌را گیرهاوردن ده‌سكه‌فتنه‌یل مادى و مه‌عنه‌وى و له‌ى دومانگ گوزه‌یشته‌ هه‌رچى فه‌ن وفیته‌ وه‌كارهاوردنه‌ ئه‌را هه‌ڵخه‌ڵه‌تانن و چه‌واشه‌كردن مه‌ردم و جمانن جاده‌، وه‌لى له‌ى هه‌وڵیانه‌ سه‌رنه‌كه‌فتن له‌وه‌ر وشیارى جه‌ماوه‌ر ملله‌ته‌گه‌مان، وه‌تایبه‌تى مه‌ردم شار سلێمانى ك وه‌ وه‌رده‌وامى له‌ڕیز پیشین خه‌بات بوینه‌ دژ  وه‌ ڕژیمه‌یل دیكتاتۆرى و هێزه‌یل شۆڤینى و ڕه‌گه‌زپه‌رستى، و وه‌رگریكردن له‌ هه‌قه‌یل ملله‌ته‌گه‌مان و دارا ونه‌دارایان نانه‌ بان شووڕه‌یل كورد.
هێزه‌یل ئۆپۆزیسیۆن وه‌ختى مه‌ویس بوین و سه‌رنه‌كه‌فتنله‌ فراوانكردن ڕویوه‌ر خودنیشانداینه‌یلیان و گاڵ داین ڕاى گشتى دژ وه‌ حكوومه‌ت هه‌رێم و چوكڵه‌چزى داین ئاسایش ئه‌را ده‌سوه‌شانن له‌ خودنیشانده‌ره‌یل تا له‌ لایه‌ن ڕووژنامه‌نویسى و میدیایى و سیاسیه‌وه‌ ئه‌را به‌رژه‌وه‌ندى خوه‌یان وه‌كارى بارن، په‌نا بردنه‌ وه‌كارهاوردن تون و تیژى له‌ دو به‌ره‌وه‌؛ له‌ناو په‌رله‌مان یه‌كیگ له‌ نوێنه‌ره‌یلیان بتڵ ئاو وه‌ره‌و سه‌رۆكایه‌تى په‌رله‌مان وه‌شان،  و قسه‌یل ناشرین وه‌كارهاوردن دژ وه‌ حكوومه‌ت و په‌رله‌مان، و دویم به‌ره‌یش له‌ جاده‌یل و كویچه‌ و گه‌ڕه‌كه‌یل ده‌ورو وه‌ر شوونه‌یل خودنیشاندایه‌نه‌گه‌ دژ وه‌ هێزه‌یل وه‌رگرى مه‌ده‌نى و پۆلیس و ئاسایش ك ئه‌را مقه‌یه‌تى كردن جایڵ و جوانه‌یل هاتوین ئه‌را ئه‌و شوونه‌یله‌ و یه‌یشه‌ بویه‌ مایه‌ى زه‌خمدار بوین زیاتر له‌ 300 كه‌س، ئه‌وه‌ بیجگه‌ زه‌خمدار بوین شماره‌یگ له‌ خودنیشانده‌ره‌یل ك زه‌خم بڕیگیان سه‌خت بوى، ئه‌وه‌ بیجگه‌ وه‌ته‌واوه‌تى فه‌له‌ج بوین بازاڕ سلێمانى و حاڵه‌ت ناڕه‌زایى و خوه‌شنه‌هاتن مه‌ردم ك زاڵ بویه‌ بان جاده‌ى كوردى وه‌شیوه‌یگ گشتى و جاده‌ى سلێمانى وه‌شیوه‌یگ تایبه‌تى، و یه‌یشه‌ هیشت جه‌ماوه‌ر داوا له‌ حكوومه‌ت و لایه‌نه‌یل به‌رپرس بكه‌ن ك سنووریگ ئه‌را ئى شیوایشیوه‌ دابنه‌ن و ئارامى له‌ شاره‌گه‌ سه‌قامگیر بكه‌ن، ئیسه‌یش حكوومه‌ت و داموده‌زگایه‌یل ئاسایشى په‌یوه‌ندیدار ك ئه‌رك ئاسایش و مقه‌یه‌تى كردن هاوڵاتیه‌یل ها ملیان، بایه‌ته‌ وه‌ شیوه‌یگ بجمیه‌ن ك دویر بوود له‌ تون وتیژى، تا بارووه‌زعه‌گه‌ بچووده‌و ئه‌را جاخ جاران و ڕیگه‌ نه‌دریه‌ید یه‌ك قه‌تره‌ خوین له‌ هویچ هاوڵاتییگ بتكێ، چوینكه‌ خوین كوردستانى گرانترین و گرنگترین چشته‌ له‌ لاى گشت لایه‌نه‌یل، و ئنجا بان پلانیگ یا به‌رنامه‌یگ دابنه‌ن ئه‌را خاس سازى (ئسلاحات) ئه‌را ڕیشه‌كیش كردن گه‌ناته‌كارى و دوچه‌وه‌كى كردن و قه‌ومى قومى كردن، و بایه‌خ داین تایبه‌تیگ وه‌ چین جایڵ و جوانه‌یل وه‌تایبه‌تى ده‌رچویه‌یل زانكۆ چوینكه‌ یانه‌ جى ئومیدمانن و ئاینده‌مان سازن.
هه‌ڵه‌وگه‌ردانن: ماجد سوره‌مێرى