كورده‌یل فه‌یلى و چاره‌سه‌ر كیشه‌یلیان

شفق نيوز

ژیارى یا حزارى و ئنسانى بویه‌و له‌وه‌ر ئه‌وه‌ك خاكى به‌ره‌كتدار و روڵه‌یلى به‌رهه‌مدار بوینه‌ ، هه‌ر ئه‌وه‌یش بویه‌سه‌ هووكار ئه‌وه‌ك پیكهاته‌یل جووراوجوور ئنسانى وه‌یه‌كه‌وه‌ له‌تى ژیان بووه‌نه‌ سه‌ر و تائیسه‌یش وه‌ دریژایى تاریخ كویه‌ن و تازه‌ كتاویگ  یا دراسه‌تیگ  یا به‌ڵگه‌یگ  نیه‌ ته‌نیا باس یه‌ك پیكهاته‌ كردویگ  وباس له‌ جوور و ڕه‌نگه‌یل كوومه‌ڵگاى عراقى نه‌كا .

كورده‌یل فه‌یلى ئنتمابوین و هاووڵاتیبوین خوه‌یان وه‌گووره‌ى سروشت شوناسنامه‌یان توومار كردنه‌ له‌ى وڵاته‌ نه‌ك وه‌گووره‌ى دعایه‌و هه‌ڵویست یا به‌عزه‌ كاریگ  ، چوینكه‌ له‌سفه‌ت ده‌روینى و كوومه‌ڵایه‌تى و فه‌لسه‌فه‌یان فكره‌و سیاسه‌تیان دیاره‌و له‌ لاپه‌ڕه‌ى تاریخیانیش وجوود ئنسانى و نه‌ته‌وه‌یى داشتنه‌و له‌گشت جموجویل و ژیان و نوڕستیان نیشتمانپه‌روه‌ر بوینه‌ . وه‌لى وه‌ل ئى هه‌مگه‌ ئاشكراكردن راسیه‌یله‌ ئه‌وه‌ك وه‌سه‌ریان هات حه‌یفه‌ جویر پاشیلكردن هه‌قه‌یلیان ك هه‌قیگ  ئنسانى و نیشتمانیه‌و تائیسه‌یش هه‌ر له‌و عه‌زاوه‌ ژیه‌ن و ئه‌و قانوونه‌یله‌ ك تادویه‌كه‌ زوڵم له‌لیان كرد ئیسه‌یش هه‌ر هه‌مان چشته‌و هه‌ر ئه‌و بڕیاره‌یله‌سه‌ ك زویتر وه‌پى ده‌روه‌ده‌ر بوین و كوشیان و خاسترین روڵه‌یلیان وه‌پى له‌ناو بریاو جویر بڕیاره‌گه‌ى ئه‌نجوومه‌ن سه‌ركردایه‌تى شووڕش به‌عس رمیاگه‌ له‌بانیان .

ئمجا ئه‌وه‌ك په‌رووشه‌ له‌بان مسه‌له‌ى كورده‌یل فه‌یلى ، با بزانیگ  ك تائیسه‌یش جویر بیگانه‌و(ته‌بیه‌عیه‌ى ئیرانى) ته‌ماشایان كریه‌یگ  وه‌ڕه‌سمى و دى وه‌ى جووریشه‌ شوناسه‌مه‌یان له‌لیان زه‌فت كریه‌یگ  و ئه‌گه‌ریش جنسیه‌ى عراقیه‌گه‌یان بدریه‌یگه‌و هیمان هه‌ر وه‌بى شایه‌ت جنسیه‌ مینن و ، وه‌بى ئه‌وه‌یش هاووڵاتى عراقى نیه‌تویه‌نیگ  پاسه‌پۆرت نیشتمانى عراقى هه‌ڵگریگ  . كیشه‌ى ته‌به‌عیه‌یش ك له‌جه‌وهه‌ره‌وه‌ دابه‌ش بویه‌سه‌ بان ئیرانى و عوسمانى نه‌ك ته‌نیا بویه‌سه‌ مایه‌ى نه‌هیشتن مه‌سه‌له‌ى عراقیه‌ت و شوناسنامه‌ى ژیارى ، به‌ڵكوو نه‌هیشتن شوناسنامه‌ى وجوود تاریخى كوین و تازه‌ .

چاره‌سه‌ر مه‌سه‌له‌ى كورده‌یل فه‌یلى له‌ى لایه‌نه‌وه‌ خاستر ئه‌وه‌سه‌ جواو گورجیگ  له‌لى بدریه‌یگه‌وه‌و داواكاریه‌یلیان جى وه‌جى بكریه‌یگ  و دى ئستغلالكردنیان به‌س بووگ و دى كووتایى بایگ  وه‌ئه‌نجامداین تاوان وه‌رده‌وام ده‌رهه‌قیان . چوینكه‌ وه‌ى شیوه‌ ده‌رئه‌نجام ترسناك له‌لى كه‌فیگه‌وه‌ ئه‌گه‌ر بایگ  و كوومه‌ڵگاى عراقى وه‌گشت ده‌زگایه‌یل ره‌سمیه‌وه‌ هه‌ڵویستیگ  جددى چه‌وه‌ڕیكریاگ نیشان نه‌ین له‌باوه‌ت ئاست كیشه‌ى ئى شه‌ریحه‌ى زوڵملیكریاگه‌و هاوردنه‌وه‌ى گشت هه‌قه‌یل زه‌فتكریاگیان ، ك یه‌یش كاریگ  نیشتمانى و ئنسانیه‌ ، وه‌نا چوین بووگ هاووڵاتى عراقى له‌وه‌رده‌م وه‌زیفه‌كاره‌یل سه‌فاره‌تخانه‌ بووسیه‌یگ  یا له‌ناو وڵات و ئه‌ڵڵاجه‌ویى بایگ  له‌سروشت ئه‌و نهێنیه‌ ك له‌پشته‌وه‌ ده‌س دیریگ  له‌بان سه‌رف نه‌كردن پاسه‌پۆرت عراقیه‌گه‌ى ك خوه‌یشى عراقى و كوڕ عراقیه‌ ؟

مه‌سه‌له‌ى كورده‌یل فه‌یلى مه‌سه‌له‌ى بڕیاره‌یل ره‌سمى نیه‌ ، به‌ڵكوو مه‌سه‌له‌یگ  ئنسانیه‌و هه‌ق ژیانه‌ وه‌ كه‌رامه‌ت و عه‌داڵه‌ت و یه‌كسانى وه‌بى زوڵم ، هه‌ر وه‌ختیگیش ئى كیشه‌ چاره‌سه‌ر كریا ئه‌وه‌ بیگومان بووگه‌ سه‌ركه‌فتن روح نیشتمانى عراقى و جواودانه‌وه‌ى ده‌نگ  زوڵمكریاگه‌یل ، وه‌ل ئه‌وه‌یشا كورده‌یل فه‌یلى روڵه‌یل ره‌سه‌ن ئى عراقه‌نه‌و هه‌قه‌یل نیشتمانى خوه‌یان دیرن وه‌بى هویچ قسه‌كردن و كیشمه‌كیشیگ  ، ك چاره‌سه‌ر كیشه‌یلیان مه‌سه‌له‌ى پویل و دارایى نیه‌ ، به‌ڵكوو كیشه‌یگه‌و بایه‌سه‌ چاره‌سه‌ر بكریه‌یگ  .