30 ده‌قه‌ت فه‌يلى

شفق نيوز

مه‌رام قسه‌گه‌م ئه‌وه‌سه‌ ك له‌وه‌خت كووچ وه‌پيكردنمان و ده‌ركردنمان تا وه‌رجه‌ دابه‌شكردنمان له‌ناونى ملله‌ته‌يل و ئه‌و به‌ڵاى ئاسمانيه‌ هووكاره‌يليگ بوى ك پشت وه‌ لايه‌نه‌يليگ به‌سا، وه‌لێ كه‌سيگ تر ئازايى ئه‌كا له‌ بريار چاره‌نويسى، ك جى داخه‌ له‌ كومه‌ڵگاى بى ياسا مافه‌يل له‌تى ته‌نيا هه‌ر ناونيشانه‌.

گشت كه‌سيگ كاريگه‌ره‌ وه‌ ژينگه‌ جوور ره‌فيق و داڵگ وباوگ و ئه‌و چشته‌يله‌ ك خوه‌نيمنه‌ى و ژنه‌فيمنه‌ى و دوينيمنه‌ى، وه‌ى قوناغيشه‌ وه‌تايبه‌ت زوورم ئه‌و چشته‌يله‌ ك كاريگه‌رى ديرێد له‌لامان مه‌سه‌له‌ى گوزران و مه‌عيشه‌ته‌، ك تا چ ڕاده‌يگ داهێنه‌ر يا خاوه‌ن په‌يڕه‌و بويمن، ئمجا مه‌سه‌له‌ى ژيان و مادديه‌تى كه‌س تواناى قورتاربوين له‌تى نه‌يرێد و ئاده‌ميزاديش ك خاوه‌ن په‌يڕه‌و و مه‌سه‌له‌ و ئيراده‌س ئه‌تويه‌نێد ريك بكه‌فێد و دو چشت وه‌يه‌كه‌و جه‌مه‌و بكا.

وه‌ چه‌واشه‌ى دروسكه‌ر و بازرگان ك داهاتى له‌ ئاكام كار و شه‌كه‌تى و هويره‌وكردن خوه‌يه‌ ئه‌وه‌سه‌ ك كه‌سيگ فه‌يلى زراعه‌ت كه‌ێدو شه‌كه‌ت ئه‌دێ و كار ئه‌كا و ته‌ماشاى به‌رهه‌مه‌يلى ئه‌كا، دوينێد وه‌ له‌حزه‌يگ هووكاريگ سياسى يا كوده‌تايگ سه‌ربازى يا بڕياريگ له‌ ئه‌نجومه‌ن سه‌ركردايه‌تى شووڕش گشت چشتيگ مه‌وحه‌و ئه‌كاو وشكه‌ساڵى ئه‌ياده‌ به‌رهه‌مه‌گه‌ى جوور ئه‌وه‌گ هاته‌ تويش فه‌يله‌يل و هه‌ر له‌ دامه‌زرانن ده‌وڵه‌ت عراق و له‌گشت ساڵێگ وه‌ل وه‌رز چنينه‌وه‌ فه‌رمانيگ سه‌خت ده‌رهه‌ق ئى پيكهاته‌ دره‌كريه‌ێد ك به‌شدارى كردگه‌ له‌ دامه‌زرانن قه‌واره‌ى عراق، وه‌لێ ئمڕوو به‌شدار نيه‌ له‌تى.

ئيمه‌ له‌ناونى عراقيه‌يل له‌گشت لايه‌نه‌يل فيشتر هه‌ڵه‌په‌ڵه‌مانه‌ يا ته‌نانه‌ت له‌ ملله‌ت كورديش، ئه‌ويش وه‌ ناونيشان ئه‌وه‌گ زوورم پرووژه‌يل ئى پيكهاته‌ وه‌ دريژايى رووژگار سه‌ركه‌فتن ئه‌راى نانويسيه‌ێد ك هه‌رچه‌نى ئيمه‌يش تواناى وه‌رگه‌گرتن مه‌ينه‌تيه‌يلمان ديرێم فيشتر له‌و شيه‌وكردنه‌يل نادروسه‌ ك برايلمان ئه‌كه‌نه‌ى.

هه‌ر له‌وه‌خت په‌يابوينمان هوكاره‌ى ئه‌وه‌ بويمنه‌ فه‌يلى ناچاركرياگ بويمن و باج ئه‌را ئه‌وه‌يش دايمنه‌، با ئيجاره‌يشه‌ ته‌جروبه‌ بكه‌يم ك جوور ئه‌وه‌گ خوه‌مان ئه‌خوازيم فه‌يلى بويمن ته‌نانه‌ت ئه‌گه‌ر ئه‌را 30 ده‌ه‌قه‌يش بويه‌.

وه‌ل ئه‌وه‌يشا بايه‌سه‌ ياى بگريم ك ئازايش بويمن و ته‌نانه‌ت ئه‌گه‌ر ئه‌وه‌يش نه‌دێ خوه‌ينيشانداين بكه‌يم، مه‌ردم ئاساييش له‌يوا دوينن ك ئه‌را وه‌بانچگن پله‌ى ده‌وڵه‌مه‌نى بايه‌سه‌ سه‌رمايه‌ى خاسيگ بوود و له‌وه‌رانوه‌ر ئه‌وه‌يش ده‌وڵه‌مه‌نه‌يليش باوه‌ريان ئه‌وه‌سه‌ ك له‌وه‌ر فراوانكردن سامانه‌يليان بايه‌سه‌ دارايى مه‌ردمان تريش له‌ خزمه‌تيان بدێ! ئمجا چاره‌سه‌ر كيشه‌گه‌مان ئه‌گه‌ر وه‌گووره‌ى جموجويل ريك و گونجياگيگ دانريا وه‌ل هساوكردن وه‌خت و له‌وه‌رچه‌وگرتن ژينگه‌و پشتگيرى و دڵسووزى دووسداره‌يل به‌رهه‌م خاستر ئه‌يه‌رێد.

سروشتيه‌ ك ئيمان په‌يوه‌ندييگه‌ وه‌شيوه‌يگ هاوبه‌ش روێ ئه‌ياد و ئاده‌ميزاد پيشبينيه‌يل به‌رز ئه‌رای ئه‌كا، وه‌لێ ئه‌وه‌يش له‌ خوه‌يه‌و نايه‌ێد، ئمجا ئه‌گه‌ر له‌وه‌خت خوه‌ی قوربانی ئه‌رای نه‌يه‌ێد وه‌ل دووسی له‌وه‌خت و ‌شوون خوه‌ی خاستر ئه‌وه‌سه‌ چه‌وه‌ڕی ئاكامه‌گه‌ی نه‌كه‌ێد.

له‌يرا ئه‌وه‌گ ئه‌خوازم له‌ی باوه‌ته‌و ئاماژه‌ ئه‌رای بكه‌م، قسه‌وباسيگ بوی وه‌ل نويسه‌ر ناودار ئسماعيل قه‌مه‌ندار خاوه‌ن كتاو شيوه‌زووانه‌يل كوردی باشوور، و وتياد ٣٠ ساڵ له‌ ژيانم بردگه‌ ئه‌را داناين ئی كتاوه‌، وه‌لێ داخ كيشا ئه‌را ئه‌وه‌گ فريه‌يگ له‌ فه‌يليه‌يل ئاماده‌ نيين ٣٠ ده‌ق له‌وه‌خت خوه‌يان ته‌رخان بكه‌ن ئه‌را خوه‌نين ناوه‌ڕه‌وكه‌گه‌ی، ئمجا مه‌سه‌له‌ی كيشه‌گه‌مان منێده‌ پيريگ ك رووڵه‌يل له‌ژير يه‌ك بنميچ وه‌ليا گه‌ورا بوينه‌، ئمڕوويش هويچ كه‌سيگ ئاماده‌ نيه‌ ته‌نيا غورفه‌يگ له‌ ماڵه‌يلی ته‌رخان بكا خوه‌ی وه‌پی لاف بكا.

عه‌لی حسێن فه‌يلی