كورده‌یل فه‌یلى له‌ ده‌نمارك وه‌ئومیده‌و ژیه‌ن

شفق نيوز

چاره‌نویسسازگه‌یان نه‌هاوردنه‌ ك ئه‌ویش جه‌خت كردن له‌ بان ئه‌وه‌ ك به‌شیگ دانه‌وڕیاین له‌ عیراق، و هه‌میشه‌ هه‌وڵ دانه‌ ك شناسنامه‌ى خوه‌یان هه‌ڵبگرن له‌ هه‌ر وڵاتیگ و له‌هه‌ر شوونیگ له‌ى دونیا بینه‌، كورده‌یل فه‌یلى له‌ وڵات ده‌نمارك و ئه‌را خاتر پابه‌ندبوین وه‌ شوناسنامه‌ و وه‌هویره‌وخستن یادگاریه‌یل نیشتمان، هاتن كوومه‌ڵه‌یگ دامه‌زرانن وه‌ناو (كوومه‌ڵه‌ى كورده‌یل فه‌یلى له‌ كۆپنهاگن) تا بووده‌ شوون وماواى و دیدارگه‌ى گشت فه‌یلیه‌یل ك ده‌نمارك بویه‌ دویا ویستگه‌ یا مه‌حه‌ته‌ى كووچكردنیان.

ماڵپه‌ڕ شه‌فه‌ق چه‌وى كه‌فته‌ كه‌ریمه‌ عبدالرزاق ئه‌ندام ئیداره‌ى كوومه‌ڵه‌گه‌ له‌ ئان سه‌رداینى ئه‌را به‌غدا و ئه‌ویش خوه‌شحاڵى خوه‌ى نیشاندا وه‌ دیدار كارمه‌نده‌یل ده‌زگاى ڕووشنهویرى و ڕه‌سانن كورده‌یل فه‌یلى (شه‌فه‌ق) و له‌نواى گشتیان سندوس میرزا جیگر ئه‌میندار گشتى ماڵ كورد و به‌ڕێوه‌به‌ر كاروبار ئیدارى ده‌زگاى شه‌فه‌ق...، له‌ باوه‌ت هه‌ڵوژاردن سه‌رۆكایه‌تى كوومه‌ڵه‌گه‌ كه‌ریمه‌ عبدالرزاق وت:"سه‌رۆكایه‌تى كوومه‌ڵگاگه‌ ساڵانه‌ هه‌ڵوژیه‌ید و هه‌ر وه‌ى جووره‌ ئه‌ندامه‌یل ئیداره‌یش، و هه‌میشه‌ هه‌وڵدایمنه‌ وه‌گووره‌ى میكانیزمه‌یل دیموكراتى كار بكه‌یمن وه‌بى دویره‌وخستن و پشتگووشخستن كه‌سیگ له‌ كاركه‌ره‌یل و به‌شداربویه‌یل له‌ كوومه‌ڵه‌گه‌".

له‌باوه‌ت ئامانجه‌گان كوومه‌ڵه‌گه‌ كه‌ریمه‌ عبدالرزاق ئویشى:"له‌ ئامانجه‌گان كوومه‌ڵه‌گه‌مان په‌رش وبڵاوكردن ڕووشنهویرى دیموكراتى و نیشتمانپه‌روه‌رى و پیشكه‌شكردن خزمه‌تگوزاریه‌یل كوومه‌ڵایه‌تى ئه‌را خزمه‌تكردن كورده‌یل فه‌یلى و وه‌رده‌وامى داین وه‌ په‌یوه‌ندى و بیناكردن پیه‌ڵه‌یل دووسى و په‌یوه‌ندیه‌یل سه‌مه‌ردار له‌ ناوبه‌ین كورده‌یل فه‌یلى له‌ غه‌ریبى و هه‌رله‌یوا په‌یوه‌ندى كردن وه‌ گشت چینه‌یل جالیه‌یل عیراقى له‌ ئۆروپا".

ئاماژه‌یش دا وه‌ گرنگترین چالاكیه‌یل كوومه‌ڵه‌ى كورده‌یل فه‌یلى له‌ ده‌نمارك و وت:" كوومه‌ڵه‌گه‌مان وه‌رده‌وام كۆڕ و سیمیناره‌یلیگ گریه‌ دایه‌ ك هه‌رچى كوومه‌ڵه‌ و ڕیكخریاى فه‌یلیه‌ له‌ ئۆروپا گریده‌وه‌ له‌خاتر ته‌نسیق و كار هاوبه‌ش و یه‌كه‌وخستن هه‌وڵه‌یل ئه‌را وه‌شوون كه‌فتن كێشه‌یل كورده‌یل فه‌یلى، هه‌رله‌یوا كوومه‌ڵه‌گه‌مان چه‌ن مانگرتن یا ئعتصامات ڕیكخستیه‌ له‌ ماوه‌یل جیاجیا له‌وه‌رده‌م سه‌فاره‌ت عیراق له‌ كۆپنهاگن ئه‌را داواكردن هه‌قه‌یل كورده‌یل فه‌یلى، و یه‌یشه‌ بویه‌ هانده‌ریگ ئه‌رائه‌وباقى كوومه‌ڵه‌ و ڕیكخریایه‌یل كورده‌یل فه‌یلى تا هه‌نگامه‌یل هاوشیوه‌یگ هه‌ڵبگرن له‌ خاتر فشارخستن وه‌بان حكوومه‌ت عیراق تا كاربكه‌ید له‌بان وه‌شوونكه‌فتن كێشه‌یل كورده‌یل فه‌یلى؛ له‌وانه‌گ له‌ شوون 9 نیسان 2003 هاتنه‌وه‌ ئه‌را عیراق.

كه‌ریمه‌ عبدالرزاق داوا له‌ لایه‌نه‌یل ڕه‌سمى و حزبى كرد وه‌ل كورده‌یل فه‌یلیه‌و بووسیه‌ن له‌ مه‌ینه‌تیه‌یلیان و كاربكه‌ن ئه‌را ئنسافكردنیان تا بتویه‌نن بانه‌و ئه‌را نیشتمان و له‌ خه‌م وده‌رده‌سه‌رى غه‌ریبى قورتاربوون، و داوایش له‌ كورده‌یل فه‌یلى كرد وه‌رده‌وامى بیه‌نه‌ داواكردن هه‌قه‌یلیان هه‌رچه‌نى ك مه‌ترسى و سه‌ختى نوایان بگرید و نه‌یلن هس وه‌ ڕه‌نجیان بكه‌ن له‌ ئاینده‌ و بایه‌ته‌ هه‌وڵ و ته‌قه‌لاى بیوچان بیه‌ن و هه‌میشه‌ ئومید له‌ دڵیان نه‌مرى.