مالكى پياو قه‌يرانه‌يل!

شفق نيوز

ليست ئتلاف نيشتمانى و حزب ده‌عوه‌ بوى.

هناى ئبراهي جه‌عفه‌رى له‌ ماوه‌ يه‌ك ساڵ حكومه‌ته‌گه‌ى خوه‌ى هويچ گامێ ئه‌را چاره‌سه‌رى كێشه‌يل ناونى كوردو به‌غدا ئه‌ڵنه‌گرت، دى كوردو مام جه‌ڵال له‌لێ كه‌فتنه‌ ته‌قه‌و نه‌يشتن پۆست سه‌رۆك حكومه‌ت وه‌پێ بڕه‌سێد.

ئه‌و وه‌خته‌ رۆڵ كورد له‌ هاوكێشه‌گه‌ فره‌ كارگه‌ر بوى. هناى جه‌عه‌فه‌رى ناهمێ بوى له‌يه‌گ دى پۆست سه‌رۆك وه‌زيريل وه‌ ده‌سێ ناكه‌فێ، باز به‌خت له‌ بان سه‌ر نورى كامل مالكى ك ئه‌و وه‌خته‌ وه‌ جواد مالكى ناسيا نيشته‌و ئمجا بويه‌ سه‌رۆك وه‌زيريل. له‌ ده‌ور يه‌ك‌م سه‌رۆك وه‌زيره‌يليشێ وه‌ ئارامى خوه‌ى چه‌سپان و له‌ حزبگه‌يشێ ئبراهيم جه‌عه‌فه‌رى كرده‌و ده‌يشت و خوه‌ى بويه‌ نه‌فه‌ر يه‌كم حزب ده‌عوه‌. يه‌ بوى ك وه‌ مه‌مه‌ر وه‌ ده‌س گرتن ئه‌ى پۆسته‌، كارگه‌ره‌ى فره‌ى له‌ ناو حزبگه‌ى خوه‌ى په‌يا كردو مالكى بويه‌ وه‌ هێزترين پياو شيعه‌و عيراق. له‌ ئه‌ڵوژنن ئه‌نجوومه‌ن پارێزگايل ساڵ 2009 ده‌نگ يه‌كم له‌ زوورم پارێزگاه‌يل شيعه‌نشين وه‌ده‌س هاورد. له‌ ئه‌ڵوژنن 7/3/201 ليسته‌گه‌ى تويه‌نست 91 كورسى په‌رله‌مان وه‌ ده‌س بخادو بووده‌ دويم ليست له‌ دوياى ليست عيراقيه ئه‌ياد عه‌لاوى ك فێشتر سيماى عه‌ره‌و سوننى وه‌ پيه‌و ديار بوى.

وه‌لى مالكى ده‌سڵات ئه‌و ده‌س نياو تويه‌نست وه‌ مه‌مه‌ر كارگه‌رى وڵاته‌يل ده‌وه‌وه‌ر له‌  بان ليست ئتلاف نيشتمانى، بانه‌ لاى ليسته‌گه‌يه‌و بوونه‌ زوورينه‌. ئمجا له‌ بان پێشنيار سه‌ركردايه‌تى سياسى كورد جارتر بووده‌ سه‌رۆك كابينه‌. ئه‌ى جاره‌ مالكى خاس خوه‌ى له‌ كێشه‌يل هه‌ڵ كرد، چوين ك له‌ى ده‌وره‌ زانى هێزه‌يل ئه‌مريكا خوه‌يان له‌عيراق كێشنه‌و سه‌روه‌رى عيراق وه‌ ده‌وڵه‌ت و ئابوورى و سوپاو هێز ناوخوه‌يى ته‌مام كه‌فنه‌ ده‌س خوه‌ى.

يه‌ بوى ك وه‌زيره‌يل ناوخوه‌ى و به‌رگرى هه‌ تا ئيرنگه‌ نه‌نرياينه‌و هه‌ خوه‌ى ئه‌ى پۆسته‌يله‌ وه‌رێيه‌و ئه‌واد. ئه‌نجوومه‌ن سياسه‌ته‌يل ئستراتێژى ئه‌را پرسه‌يل نيشتمانى ك وه‌ ئه‌ساس رێكه‌فتننامه‌ى هه‌ولێر بايه‌د عه‌لاوى سه‌رۆك ليست عيراقيه دروسێ بكردا، وه‌پێ نه‌يريا.

هناى ڕاى گشتى له‌ بان ئه‌ى باوه‌ته‌يل بوى، دى قه‌يرانێگ تر دروس بوى ك ئه‌ويشه‌ تۆمه‌ت كار ترۆريستى ئه‌را تارق هاشمى جيگر سه‌رۆك كۆمار و كه‌س وه‌ هێز له‌ ناو عه‌ره‌و سوننى مه‌زه‌هه‌ب بوى.

تارق هاشمى ناچار وه‌ يه‌ بوى تا بوايد وه‌ره‌و هه‌رێم كوردستان. ئمجا هه‌ ئيچنه‌يش ده‌ركردن ساڵه‌ح موتڵه‌گ جيگر سه‌رۆك وه‌زيره‌يل عيراق وه‌ تۆمه‌ت ئه‌وه‌گ بێ قه‌در سه‌رۆك وه‌زيره‌يل كرديه‌. له‌ى قه‌يرانه‌يله‌ ته‌نيا مالكى جى پاى خوه‌ى له‌ به‌غدا قورسه‌و كردو كه‌سه‌يل سه‌ركێشه‌يل عه‌ره‌وسوننى و ليست عي‌راقيه‌ له‌ به‌غا خسه‌و ده‌يشت و خسانه‌ مه‌رجێ تا له‌ خوه‌يان به‌رگرى بكه‌ن و ئيچنه‌ كپيانه‌و كرد.

له‌ى ناونيه‌و له‌ شوونى عه‌ره‌وى ك زوورينه‌ سوننى مه‌زه‌و بوين فره‌ قازانج نه‌كردن. وه‌لى وه‌ دروس بوين ئه‌ى قه‌يرانه‌، پۆسته‌يل ئه‌منى له‌ هوير ليسته‌يل سياسى و مه‌ردم عيراق برده‌و. دوياى قه‌يران هاشمى و موتڵه‌گ، ئمجا قه‌يران تر وه‌ل هه‌رێم كوردستانا دروس كرد. مه‌به‌س‌ له‌ى قه‌يرانه‌ دو چشت بوى: يه‌كم) يه‌گ ئه‌ى قه‌يرانه‌ له‌ عه‌ره‌و سوننى ئه‌ڵگه‌ردنيگه‌و ئه‌را كوردو راى گشتى عه‌ره‌وى وه‌ يه‌ بخاده‌ رێ ك كورده‌يل خوازن عيراق پارچه‌ بكه‌ن و ده‌وڵه‌ت سه‌روه‌خوه‌ى دروس بكه‌ن ك له‌ يه‌يشه‌ سه‌ركه‌فتێ بوى.

دويم) ئه‌گه‌ر بكريه‌يد وه‌ جوورێ رێ بگريد له‌ گه‌شه‌ى ئابوورى و ئاوادنيه‌يلێ ك له‌ هه‌رێم كورستان دروس بويه‌و بويه‌سه‌ جى مه‌يل كيش بوين 15 پارێزگاى تر عيراق و بويه‌سه‌ مه‌مه‌ر گله‌ى و ره‌خنه‌ى مه‌ردم ك ئاوه‌ختى يه‌ خوازن ته‌مام ناوچه‌يل عيراق چوى هه‌رێم ئاسووده‌ و خزمه‌تگوزارى و ئه‌منيه‌ت و گه‌شه‌ كردن له‌تێان بوود.

وه‌لى ئه‌وسا بايه‌د كورد خوه‌ى له‌ى قه‌يرانه‌يل مالكى لا بياتاد، ئه‌را وه‌گ نه‌تويه‌نێد له‌ى قه‌يران دويمه‌، مالكى وه‌ ئاسانى گوزه‌ر بكا.

چوين ك ئيسه‌ مالكى توانستيه‌ قه‌يران يه‌كم و دويم له‌ هوير سياسيه‌يل و مه‌ردم عيراق بوه‌يده‌و، ته‌مام مه‌يله‌يل وه‌ره‌و قه‌يران سێم بكيشێد.

هه‌رچه‌ن ئيسه‌ دييره‌ ك مالكى ئه‌را دروسكردن قه‌يران چوارميش گام ئه‌ڵگرێدو ئه‌وه‌يش ده‌س گرتن وه‌ بان ته‌مامى دارايى عيراق و سوپاو فره‌و كردن هێزه‌يل چه‌كداره‌. فره‌ ئاسانيشه‌ هه‌ وه‌ى پاوه‌دانگه‌ ده‌سكارى بودجه‌ى هه‌رێم كوردستانيش بكا.

هه‌ ئه‌را يه‌ كورد بايه‌د فره‌ ئاگادار بوود له‌ى هه‌مگه‌ قه‌يرانه‌ ك پياو دروسكه‌ريل قه‌يران عيراق(نورى مالكى) دروسيان كرديه‌./ش

شادمان مه‌لا حه‌سه‌ن