چ تاوانیگ داشتیم ئى هه‌مگه‌ ماڵویرانیه‌ هاته‌ تویشمان؟

شفق نيوز

هه‌ڵكه‌فت یا واقعه‌ ناكا ك ڕه‌فتار و كرده‌وه‌یل سه‌دام دكتاتۆر و دارو ده‌سه‌و پیاوه‌یل بكوش و خوینمژى له‌وه‌رانوه‌ر ئى چین زوڵملیكریاگه‌ له‌ڕاسى تاوانیگ  گه‌وراى دژ ئنسانیه‌ت بوى.

كورد وه‌شیوه‌یگ گشتى و كورده‌یل فه‌یلى وه‌تایبه‌ت، هه‌ر له‌كویه‌نه‌وه‌ مه‌ردمانیگ وه‌فادار و ئاشتیخواز و دڵسووز بوینه‌ ئه‌را وڵات و ملله‌تیان و ئه‌را ئه‌وانه‌ك ده‌س یارمه‌تى ئه‌رایان دریژ كه‌ن، وه‌ل ئه‌وه‌یشا نه‌خش باڵایگ دیرن له‌ راپه‌ڕینه‌یل نیشتمانى و روى وه‌ڕوى بوینه‌وه‌ى شۆڤێنیه‌ت و دوشمنه‌یل ئنسانى.

كورده‌یل فه‌یلى له‌وانه‌ بوین ك وه‌گیان و ماڵ و داراییان پشتگیرى له‌ جموجویل ڕزگاریخواز كوردستان كردن وه‌ سه‌ركردایه‌تى نه‌مر مه‌لا مسته‌فاى بارزانى له‌وه‌ر خاتر سه‌رخستن ئه‌و جموجویله‌.

جویر ئه‌وه‌ك ئاشكراس كورده‌یل فه‌یلى له‌ عراق هیز كارا یا فه‌عالیگ بوین له‌ مه‌یدان بازرگانى، وه‌لى وه‌ شه‌و و ڕووژیگ وه‌بى ئه‌وه‌ك هویچ تاوانیگ ئه‌نجام داوین له‌خاك ره‌سه‌ن باوگ و باپیره‌یلیان دویره‌و خریان ئه‌را ده‌وڵه‌تیگ تر، ك بویه‌ مایه‌ى سه‌خته‌وبوین ژیانیان. دویاى ئه‌وه‌یش هه‌رچى ماڵ و موڵك و داراییشه‌ گشتى له‌لیان زه‌فت كریا له‌لایه‌ن پیاوه‌یل رژیم سه‌دام و گشتى له‌ناونى خوه‌یان دابه‌ش كردن. بیجگه‌ ئه‌وه‌یش هه‌زاره‌ها له‌ ڕوڵه‌یل جایه‌ڵ جوان كورد فه‌یلى وه‌ ناهه‌ق ده‌سگیر كریان و خریانه‌ زندانه‌یل و كه‌س نه‌زانست له‌ كوورا زنگ وه‌چاڵ كریان، ئه‌وه‌ بوى رژیم به‌عس چه‌نه‌ها ڕى گرته‌وه‌ر له‌وه‌ر خاتر ئه‌وه‌ك چین كورده‌یل فه‌یلى بفه‌وتنیگ و ڕوڵه‌یلیان له‌ناویان بووه‌یگ ، وه‌ل ئه‌وه‌یشا وه‌گشت جووریگ سزاى جایه‌ڵ جوانه‌یلیان دا له‌ناو زندانه‌یل و دویاخریش فره‌یگ له‌لیان خریا ناو حه‌وزه‌یل تیزاو و مه‌كینه‌ى ئایه‌م هه‌نجن و تا ڕووژ ئمڕوو ته‌رم هویچكام له‌لیان ده‌رنه‌كه‌فتگه‌و تائیسه‌یش ئه‌وه‌سه‌ خیزانه‌یلیان نیه‌زانن قه‌وره‌یلیان ها له‌كوورا له‌ى عراقه‌و ته‌نیا ئه‌وه‌ ئاشكراس ك له‌قه‌وره‌یل وه‌جه‌م نریانه‌، ئنجا له‌و رووژگاره‌یل سه‌خت و تیه‌ریكه‌، ك فه‌یلیه‌یل وه‌گه‌وراو بویچگه‌وه‌ ده‌ركریان له‌وڵات ره‌سه‌ن خوه‌یان و له‌و وه‌خته‌ كورده‌یل فه‌یلى پرسیار له‌ خوه‌یان كردن و وتن: ئایا بایه‌سه‌ گوناه و تاوان ئیمه‌ چه‌ بویگ له‌ قوناغه‌یل ژیانمان تا ئى هه‌مگه‌ میه‌نه‌تى و ده‌رده‌سه‌رى و به‌دبه‌ختیه‌ بایگه‌ تویشمان و گشت ئه‌و ماڵویرانى و ناڕه‌حه‌تیه‌بكیشیم و بچیمنه‌ ژیر بار زوڵمیگ ناهه‌قه‌وه‌؟

 

نه‌سرین میرزا