نزیكه‌ى(7)ملیۆن كه‌س له‌عراق له‌ژیر خه‌ت فه‌قیرى ژیان به‌نه‌ سه‌ر

شفق نيوز

فره‌یگیش له‌ غاز سروشتى، وه‌لى له‌ له‌ماوه‌ى(80)ساڵ گوزه‌یشت نه‌فت و سامانه‌یل سروشتى عراق  بویه‌سه‌ به‌دبه‌ختى له‌بان ملله‌ته‌یل عراق ك وه‌ دریژایى ده‌سڵاته‌یل یه‌ك له‌شوون عراق و تا رووژ ئمڕوویش داهات نه‌فت ته‌رخان كریا ئه‌را جه‌نگ و بوار سه‌ربازى و بریا وه‌ تاڵان، یه‌یش له‌یوا كرد ریژه‌یگ ئاشكرا له‌ مه‌ردمه‌گه‌ى له‌ ساى فه‌قیرى ژیان بووه‌نه‌ سه‌ر، یا وه‌ده‌س نه‌وین خزمه‌تگوزاریه‌یل سه‌ره‌كیه‌و بناڵنن له‌وه‌ختیگ عراق رووژانه‌ زیاتر له‌(2)ملیۆن(500)هه‌زاربه‌رمیل نه‌فت تیه‌ریده‌ به‌رهه‌م. یه‌یش ئه‌و راسیه‌ ده‌رخه‌ید ك نه‌فت ئه‌وه‌نه‌ بویه‌سه‌ سه‌رچه‌وه‌ى به‌دبه‌ختى ئه‌وه‌نه‌ نه‌ویه‌سه‌ هووكاریگ ئه‌را خوه‌شگوزرانى عراقیه‌یل.

 

 

هیمان مه‌ردم ئى عراقه‌ ناڵنن وه‌ ده‌س دویاكه‌فتن كه‌رت په‌روه‌رده‌و ته‌ندروسى و كشتوكاڵ و پیشه‌سازیه‌و، یه‌یش بیجگه‌ بیكارى و فه‌قیرى ك بوینه‌سه‌ دو ده‌رد كوشنده‌ له‌ناو كوومه‌ڵگاى عراقى و چاره‌سه‌ركردنیشى سته‌مه‌، یه‌یش له‌وه‌ختیگ بڕیگ له‌ وڵاته‌یل كه‌نداو ئه‌وه‌نه‌ى عراق نه‌فت و غاز و سامان سروشتى نه‌یرن، وه‌لى دوینید مه‌ردمه‌یلیان فره‌ له‌ مه‌ردم عراق خاستر ژیه‌ن له‌ساى خوه‌شگوزرانى.

 

وه‌ گووره‌ى ئاماره‌یل، ئیسه‌ 23% عراقیه‌یل ك ئه‌كاده‌ نزیكه‌ى (7)ملیۆن كه‌س ك نزیكه‌ى چواریه‌كى مه‌ردم عراق له‌ ژیر خه‌ت فه‌قیریه‌و ژیان به‌نه‌ سه‌ر و حكوومه‌تیش نه‌خشه‌و به‌رنامه‌ى خاسیگ نه‌یرید ئه‌را چاره‌سه‌ركردنى.

 

وه‌ل ئه‌وه‌یشا عه‌بدولزه‌هره‌ هنداوى قسه‌كه‌ر وزاره‌ت پلاندانان عراق، ئشاره‌ت وه‌ ئه‌وه‌ ئه‌كا ك له‌ى دویاخره‌ حكوومه‌ت عراقى وه‌ هاوكارى بانك ناوده‌وڵه‌تى پلانیگ ستراتیجى ئاشكرا كردنه‌ ئه‌را كه‌مه‌وكردن فه‌قیرى، ك وه‌گووره‌ى پلانه‌گه‌ تا ساڵ(2014)ریژه‌ى فه‌قیرى كه‌مه‌و كریه‌ید ئه‌را 16% و پویل مانگانه‌یش وه‌ بڕ (77) هه‌زار دینار ئه‌را هه‌ر تاكیگ فه‌قیر دابین كریه‌یدو هه‌وڵیش دریه‌ید هه‌ل كار ئه‌را كه‌سه‌یل كه‌مدرامه‌ت بویننه‌وه‌و شوون نیشته‌جیكردنیش ئه‌رایان دابین بكریه‌ید.

 

ئشاره‌ت وه‌ یه‌یش كردگه‌ ك حكوومه‌ت له‌ماوه‌ى ئمساڵ بڕ(495)ملیار دینار ته‌رخان كردگه‌ ئه‌را روى وه‌ ڕوى بوین فه‌قیرى، ئه‌و پویلیشه‌ دابه‌ش كریه‌ید له‌بان كه‌رته‌یل په‌روه‌رده‌و ته‌ندروسى و تووڕ مقه‌یه‌تیكردن كوومه‌ڵایه‌تى و (60)ملیار دیناریش ته‌رخان كریاگه‌ ئه‌را دروسكردن یه‌كه‌ى نیشته‌جیكردن ئه‌را كه‌سه‌یل فه‌قیر و نه‌دار، یه‌یش بیجگه‌ ئه‌وه‌ك له‌ بودجه‌ى ئمساڵ(84)ملیار دینار وه‌ك قه‌رد بویچگ دریه‌یده‌ كه‌سه‌یل فه‌قیرو(122)ملیار دیناریش ئه‌را خاسه‌وكردن بار ته‌ندروسى ئه‌و كه‌سه‌یله‌.

 

له‌لایگ تریشه‌و، شیروان وائلى په‌رله‌مانتار عراق له‌بان لیست ده‌وڵه‌ت یاسا، بیجگه‌ ئه‌وه‌ك باوه‌ڕى له‌یواسه‌ ك ریژه‌ى فه‌قیرى ها له‌ئاست به‌رزیگ، وه‌ل ئه‌وه‌یشا ئاشكراى كرد ك له‌بان بنه‌ماى ده‌ستوور داهاته‌یل عراق وه‌گووره‌ى ریژه‌ى مه‌ردم دابه‌ش كریه‌ید له‌بان پاریزگایه‌یل، وه‌لى ئه‌یه‌ وه‌ته‌واوى جیوه‌جى نه‌كریاگه‌ له‌وه‌ر ئه‌وه‌ك ریژه‌ى داهات ته‌رخانكریاگ ئه‌را پاریزگایه‌یل له‌بان بودجه‌ى په‌ره‌وه‌پیداین هه‌رێمه‌یل وه‌ل شماره‌ى مه‌ردمه‌گه‌یا ناگونجیه‌ید ك 5% بودجه‌ى گشتیه‌.

 

وه‌ل ئه‌وه‌یشا تایبه‌تمه‌ندیگ  ئابووریناسیش هووكار به‌رزه‌وبوین ریژه‌ى فه‌قیرى به‌یده‌و ئه‌را كاریگه‌رى جه‌نگه‌یل عراق و ئه‌و قه‌یرانه‌یل سیاسه‌ ك عراق وه‌پیا گوزه‌ر ئه‌كا، ئنجا نه‌وین وه‌به‌رهاوردن داهاته‌یل عراق وه‌شیوه‌ى خاسیگ  و نه‌وین دادپه‌روه‌رى له‌ دابه‌شكردن داهات نه‌ته‌وه‌یى و ئاراسته‌ نه‌كردن سامان پویلى و ئنسانى وه‌ جووریگ ك خزمه‌ت وه‌ عراق بكا وه‌ل په‌ره‌وه‌پیداین كه‌رت كشتوكاڵى و پیشه‌سازى، گشت ئه‌یانه‌ وه‌و هووكاره‌یله‌ زانید ك بوینه‌سه‌ مایه‌ى زیایوبین فه‌قیرى له‌ى عراقه‌ ك مه‌ردمه‌گه‌ى له‌بان ده‌ریایگ ته‌ڵاى سیه‌ ژیه‌ن.

 

كارزان ئه‌حمه‌د

ج.أ