ماڵه‌ قه‌ومه‌گه‌مان

شفق نيوز

 

ئه‌وان گشتيان وه‌خاو خيزانه‌و هامشوومان ئه‌كه‌ن، ئيمه‌يش وه‌ هه‌مان شيوه وه‌پيمان خوه‌شه‌ هامشوو گه‌رميگ له‌ناونی قه‌وم و خيش وجوود داشتوود، تا ڕاده‌يگ دڵمانيش وه‌ يه‌كتری شاده‌و ريز و حورمه‌ت فريه‌يگيش ها ناونيمان.

وه‌لی جی داخه‌ ماڵه‌ قه‌ومه‌گه‌مان ته‌نيا عه‌يبيگيان ئه‌وه‌سه‌ هه‌ر وه‌ختيگ كيشه‌و گرفتيگ وه‌ل كه‌سيگ تر يا ماڵيگ تر داشتوون و په‌يوه‌ندی ناونيان گرژه‌و بوود، ئه‌خوازن ئيمه‌يش وه‌ مه‌يل ئه‌وان ره‌فتار بكه‌يم و دی ئيمه‌يش وه‌ل ئه‌و كه‌سه‌ گفت ولفت‌ نه‌كه‌يم و له‌ خوه‌شی و ته‌نگييان به‌شداری نه‌كه‌يم!

ماڵه‌ قه‌ومه‌گه‌مان گشت ره‌فتاريگيان خاس و په‌سه‌نه‌، وه‌لی جارجاريگ وه‌حوكم ئه‌و په‌يوه‌نديه‌ ك وجوود ديريد له‌ ناونيمان خوازيارن ئيمه‌يش بويمنه‌ موسته‌عمه‌ره‌ی ئه‌وان و بكه‌فيمنه‌ قينه‌و له‌و ماڵ و كه‌سه‌يله‌ ك ئه‌وان له‌لی داوڕيانه‌و به‌ن به‌زه‌يی و هامشوو ناونيان برياگه‌ له‌وه‌ر هه‌ر مه‌سه‌له‌و هووكاريگ.

ئمجا ماڵه‌ قه‌ومه‌گه‌مان جارجاريگيش هه‌وڵ ئه‌وه‌ ئه‌يه‌ن كۆنترۆڵ ئه‌قڵمان بكه‌ن و ره‌فتار و هه‌ڵسووكه‌فتمان بكه‌نه‌ ريمۆتيگ له‌ ده‌س خوه‌يان و جارجاريگ قسه‌قسه‌يگ وه‌شنن و فشار ئه‌خه‌نه‌ بانمان واز له‌ هاوماڵی و په‌يوه‌ندی پڕ بنه‌مای خيشايه‌تی باريم و مه‌رحه‌بای ئه‌و كه‌سه‌يله‌ نه‌كه‌يم ك خوه‌يان ناجوور و ناكووكن وه‌ليانا، يه‌يش وه‌خاتر پڕه‌وكردن خواست و ئه‌زره‌ته‌يل ئه‌وان!!

وه‌لی ئيمه‌ ناتويه‌نيم هويچ وه‌ختيگ دووس له‌ خوه‌مان بكه‌يمنه‌ دوشمن و هويچ وه‌ختيگيش شه‌ن وه‌ هه‌وای به‌رژوه‌ندی ئه‌وان ناكه‌يم و باوه‌ڕيش وه‌ بنه‌مای ره‌وشت و مانايه‌يلی ديريم و كورد وه‌ته‌نی" دونيا هه‌ر ئمڕوو نيه‌"و نه‌بايه‌د ئاده‌ميزاد وه‌ قسه‌ی مه‌ردم گووڵ بخوه‌يدو دوياخر په‌نجه‌ی په‌شيمانی بگه‌زيد، ك هه‌ر وه‌و خاتريشه‌ نه‌بايه‌د هويچ وه‌ختيگ "دوشمنى بى هجه‌ت"بكه‌يم وه‌ل هه‌ركه‌س و خيزانيگ ك حورمه‌ت له‌ وجوودمان بگرن.

له‌ی جووره‌ حاڵه‌ته‌يليگ ئيمه‌ بايه‌سه‌ رينمايه‌يل ئنسانی په‌يڕه‌و بكه‌يم و هاوكار يه‌كتری بويمن ئه‌را له‌ناوبردن هه‌ر كيشه‌و گرفتيگ نه‌ك لايه‌نگری ناهه‌قی بكه‌يم، وه‌ل ئه‌وه‌يشا ڕی نه‌يه‌يمنه‌ ره‌فتار ناشرين و گفت ناڕه‌وا، ك بايه‌سه‌ بويمنه‌ هووكار ئاشتی و ته‌بايی و په‌يام وژدانی و ئنسانی بڕه‌سنيم و هه‌ق وناهه‌ق له‌يه‌ك جياوه‌ بكه‌يم.

ج . أ