سه‌روه‌خوه‌يى كوردستان هه‌ڵبژارده‌مانه‌

ئه‌ديب سه‌يفه‌دين

شه‌فه‌ق نيوز/ دوياێ سه‌ده‌يگ له‌ مه‌ينه‌تێ و خوسه‌و كوشتن و ويرانكارێ و جه‌نگه‌يليگ وه‌رده‌وام و پڕ له‌ زه‌خم و چه‌وه‌ڕێ ره‌سيمنه‌ وه‌ختيگ ك بريار چاره‌نويسمان له‌تى بيه‌يم و ژيانمانن ئازاد بكه‌يم له‌وه‌ر ئه‌وه‌گ نه‌فره‌ت تاعون و تاغووت لاوه‌يم و مناڵه‌يلمان له‌و تاوان و هڵاكه‌ته‌ دويره‌و بخه‌يم و له‌ خوين دويره‌و بكه‌فيم و ده‌س بكه‌يمنه‌ ژيانيگ ئارام پڕ له‌ ئاستى و ئه‌مان و خوه‌شويسى و هاوسايى خاس له‌ ناونى ملله‌ت كورد و عه‌ره‌ب، تويش بڕيگ وه‌كراياگيرياێ و سائه‌قڵ و په‌ككه‌فتگ فكرێ و ده‌روين نه‌خوه‌شه‌يل و نه‌ته‌وه‌يى و نيشتمانيه‌يل پڕ له‌ خوسه‌و كينه‌ت هاتيمنه‌و په‌يوه‌سيم وه‌ به‌ن مه‌زله‌ت و مه‌هانه‌ت ئه‌را بڵاوكردن دروو و ترس و له‌رز و چه‌واشه‌ه‌كردن راێ ملله‌ت كورد و شكانن ئيراده‌ێ و شيوانن متمانه‌ێ مه‌ردم وه‌ ئاينده‌و شه‌ره‌فمه‌نده‌يل و تانه‌كردنيان و شيوانن راسێ و ئامانج راپرسێ گه‌ورا وه‌ مه‌جد و كه‌رامه‌ت و پيرووزيى و خراوكردن كه‌ش شادێ له‌وه‌ر سه‌رنه‌كه‌فتن راپرسێ گه‌ورا.

 

ئه‌وان وه‌ مه‌هانه‌ێ نه‌گونجيان وه‌خت و له‌وه‌ر ئه‌وه‌گ سه‌رۆك بارزانى خاوه‌ن پرووژه‌ێ راپرسێ و سه‌روه‌خوه‌ييه‌ ك مه‌رامێ شوهره‌ت و ده‌سكه‌فت سياسى و مه‌ردميه‌و ئسپات ئه‌وه‌ بكا ك ته‌نيا سه‌ركرده‌يگ نه‌ته‌وه‌يىه‌، ئه‌خوازن ئيمه‌ تا ئه‌به‌‌د وور به‌نه‌ ده‌سوه‌سه‌ر و چه‌وبه‌سياگ بويمن. ئمجا ئيمه‌يش وه‌و ناحه‌زه‌يل و نه‌فامه‌يل و بى وه‌فايه‌يله ئويشيم‌: سه‌رۆك بارزانى هه‌وه‌جه‌ وه‌ كاردانه‌وه‌ يا دعايه‌ ناكا و بنه‌چه‌ك و خه‌باتى شانازيه‌ ئه‌ڕاێ و مێژووييشى ناسرياگه‌و ئه‌و وه‌ راسێ سه‌روه‌ريگه‌ ئه‌را نه‌ته‌وه‌يى كورد و يه‌يش يه‌كمجار نيه‌ ئاشكراێ ئه‌كا و باس له‌ ماف بريار چاره‌نويس ملله‌ت كورد ئه‌كا له‌ سه‌روه‌خوه‌يى، له‌ 11- 12- 2010 سه‌رۆك بارزانى له‌ كۆنگره‌ێ پارت ديموكرات كوردستان داواێ ماف بڕيار چاره‌نويس كورده‌يل عراق كرد و جه‌خت له‌وه‌يش كرد قوناغ ئاينده‌ ئى مه‌سه‌له‌ تيه‌ێده‌ نوا، بارزانى له‌ وه‌رده‌م جه‌لال تاڵه‌بانى سه‌رۆك كۆمار وه‌رين و له‌وه‌رده‌م سه‌رۆكه‌يل تر وه‌زيره‌يل و له‌ وه‌رده‌م نورى مالكى و ئوسامه‌ نوجێفييش وت: كۆنگره‌يل تر پارته‌گه‌ جه‌خت له‌وه‌ كردگه‌ ك ملله‌ت كورد ماف بڕيار چاه‌رنويس ديرێد، ئمڕوويش پارته‌گه‌ باوه‌ڕێ ئه‌وه‌سه‌ ك داواێ ماف بڕيار چاره‌نويس و خه‌بات ئاشتى و نائاشتى ئه‌را ره‌سين وه‌ ئامانج گونجياگه‌ وه‌ل قوناغ ئاينده‌.

 

بايه‌سه‌ له‌بانمان يه‌كبگريم له‌ پشت دانايى و عفت و ئازايه‌تى سه‌ركرده‌ێ ئى ريڕه‌و چه‌رمگه‌ ك پڕه‌ له‌ سه‌ركه‌فتن دوياێ روێ وه‌ ڕوێ بوينه‌وه‌ێ خه‌ته‌ره‌يل فريه‌يگ، ئمجا كوردستان مافى ئه‌وه‌سه‌ جوور ده‌وڵه‌ته‌يل پيشكه‌فتگ و ئه‌مان و سه‌قامگير بدێ له‌ڕێ ئه‌زموون هه‌رێم له‌ ساڵه‌يل گوزه‌يشت هه‌ناێ ك حكومه‌ت به‌غدا واز له‌لى هاورد له‌ ساڵه‌يل نه‌وه‌د و گشت كارمه‌ند و هيزه‌يلێ كيشاوه‌و بانكه‌يل به‌تاڵ كرد تا هه‌رێم له‌ناو ده‌رياێ خوين بخنكيه‌يد و بدێده‌ دارستانيگ و هيزدار له‌ى بيهيز بخوه‌ێد، وه‌لێ ئه‌وه‌ روێ نه‌يا و ته‌مام چه‌واشه‌ بوێ و ده‌سكريا بنياتناين ده‌زگايه‌يل حكومى و هووشيارێ مه‌ردمى ئاشتيخواز و بازداين ئاوه‌دانێ و گه‌شتيارێ و سياسێ و كۆمه‌ڵايه‌تێ ك پيشكه‌فتنيگ فيشتر له‌ وڵاته‌يل هاوساو شه‌ريكيگ سه‌ره‌كێ هه‌وپه‌يمان سه‌ربازێ ناوده‌وڵه‌تێ ئه‌را دژايه‌تى ترۆر و مه‌ينه‌تێ دو مليۆن په‌نابه‌ريش هه‌ڵگرت ك زوورميانيش له‌ عه‌ره‌به‌يل عراق بوين بيجگه‌ ئابڵوقه‌ێ ئابوورێ ئه‌را ماوه‌ێ دو ساڵه‌.

 

ئه‌راچه‌ پرسيار له‌ وه‌خت گونجياگ بكه‌يم و گووش بيه‌يمنه‌ قسه‌ێ مه‌ردم ده‌ورگردمان، وه‌ خودا ئيسه‌ وه‌خته‌گه‌ گونجياگه‌و له‌ گونجياگيش خاستره‌، وه‌هاريگه‌ وه‌ ته‌مامێ وه‌ نسبه‌ت ئه‌را ئيمه‌ێ كورد، گشت هووكاره‌يل زاتى و باوه‌تێ له‌ خزمه‌ت راپرسێ و سه‌روه‌خوه‌ييه‌ چ هه‌ێمى چ ناوده‌وڵه‌تى، گشتلايگيش سه‌رقاڵن.

 

ئايا وه‌خته‌گه‌ گونجياگ بوێ هه‌ناى ك كوردستان وڵاتمان به‌شبه‌شه‌و كردن و وه‌ كيمياوێ په‌لامارمان دان و ملله‌تمان له‌ناو دان و مناڵه‌يلمان له‌ خه‌و بوين، له‌وه‌رچه‌ باوه‌ڕ وه مه‌ردم ‌ وه‌كراگيرياگ بكه‌يم و باوه‌ڕ وه‌ شه‌ره‌فمه‌نده‌يل و ئاقڵه‌يل و داڵگ و باوگ شه‌هيده‌يل نه‌كه‌يم، ئايا قه‌ور شه‌هيده‌يل وه‌ چه‌و نادوينين، كام له‌ ئيمه‌ ئه‌تويه‌نێد شماره‌ێ ئه‌ قه‌وره‌يل و ئه‌و يه‌تيمه‌يله‌ بكا.

 

دوياێ گشت ئى قوربانيه‌يليشه‌ نورێ هالكى زووان ده‌رئه‌كاو داوا له‌ سه‌رۆك بارزانى ئه‌كا هه‌رێم كوردستان بووه‌ێده‌ دوياوه‌ ئه‌را خه‌ت كه‌و، وه‌ ماناێ ئه‌را مه‌رز 2003 وه‌خت رميان رژيم و ناوێ بنه‌ێد مه‌رزه‌يل كوردستان و هه‌ڕه‌شه‌يش له‌ سه‌رۆك ئه‌كاو ئويشێد بايه‌سه‌ وه‌ هيز جواوه‌و بدريه‌ێد وه‌بى ئه‌وه‌گ هويچ ئعتباريگ ئه‌را قوربانيه‌يل هيزه‌يل پێشمه‌رگه‌ دابنه‌ێد له‌ جه‌نگه‌يلى وه‌ر داعش ك ره‌سيه‌ 1800 شه‌هيد و فيشتر له‌ 10 هه‌زار زه‌خمدار و بى سه‌روشوون و ئه‌وه‌ له‌ هويرێ چيه‌ مه‌رز وه‌ خوين دانرياگه‌و ئه‌گه‌ريش پێشمه‌رگه‌ نه‌وياتاد چاره‌نويس كه‌ركوك و ده‌ورگردێ و وه‌ربه‌س موسڵ و شوونه‌يل تريش جوور چاره‌نويس موسڵ بوياد ك نورى هالكى ته‌سليمى وه‌ داعش كرد.

 

سه‌رۆك بارزانى جوور سه‌ركرده‌يگ نه‌ته‌وه‌ ره‌فتار كرد له‌ بڕيار راپرسێ ك يه‌يش ئامانج گشت ئاده‌ميزاديگ كورده‌ ئه‌را ئه‌وه‌گ له‌حزه‌ێ ژيان ئه‌رامان جيوه‌جێ بدێ و گشتمانيش ئه‌خوازيم له‌پشت ئى سه‌ركرده‌ێ گه‌ورا بووسيه‌يم تا زاڵ بويمنه‌ بان ئى شيرپه‌نجه‌ێ موزمن و كابووس ترسناكه‌ ك له‌بان سينه‌مان وه‌سياگه‌و نه‌يده‌ شوونمانه‌و چويچنيده‌مان و له‌ناومان به‌ێد ئه‌را سه‌روه‌خوه‌يى جيوه‌جێ نه‌دێ.

 

دوياخريش: نه‌ دانيشتن و نه‌يش رجاكردن وه‌ل به‌غدا هويچ نه‌فيگ نه‌يرێد و ته‌نانه‌ت ئه‌گه‌ر قه‌سه‌ميش وه‌ قورئانيش بخوه‌ن راس ناكه‌ن و ئه‌وان درووزنن و تير خوارديمنه‌ له‌ قه‌وڵه‌يل دروويان و هويچ هه‌ڵبژارده‌يگ تر بيجگه‌ سه‌روه‌خوه‌يى نه‌يرێم و هه‌ر سه‌روه‌خوه‌يى ده‌رمان و كه‌رامه‌ت و ئازادێ و ژيانه‌.

ئه‌ديب سه‌يفه‌دين