سه‌ردان مالكى ئه‌را كوردستان

شفق نيوز

 

ئى سه‌ردانه‌ له‌وه‌ختیگه‌ ك گه‌شبینى له‌لى كریه‌ید، وه‌تایبه‌ت دویاى سه‌ركه‌فتن ده‌سپیشخه‌ریه‌گه‌ى سه‌ید عه‌مار حه‌كیم سه‌رۆك ئه‌نجوومه‌ن باڵاى ئسلامى و ئه‌و ئاشتیه‌ ك له‌ناونى سه‌رۆك حكوومه‌ت و سه‌رۆك ئه‌نجوومه‌ن نوێنه‌ره‌یل رویداو دویریش نیه‌ ئى دیداریشه‌ له‌ناونى سه‌رۆك هه‌رێم و سه‌رۆك حكوومه‌ت ناوه‌ندى له‌ هه‌ولێر كاریگه‌رى خاسیگ له‌لى بكه‌فیده‌و.

ئى گام مالكیه‌ له‌ى سه‌ردانه‌ ئه‌را چاره‌سه‌ر كیشه‌یل وه‌ل هه‌رێم كوردستان له‌شوون ئه‌وه‌ك چه‌وى كه‌فته‌ نه‌یچێروان بارزانى سه‌رۆك حكوومه‌ت هه‌رێم و بڕیگ گفتگوو كریا له‌ناونیان له‌باوه‌ت بار سیاسى و فشاره‌یل ئه‌مریكى و ئاكامه‌یل هه‌ڵوژاردن پاریزگایه‌یل و باسه‌یل تر، بایه‌سه‌ وه‌ خاسى مه‌زه‌نه‌ بكریه‌ید و له‌وه‌رچه‌و بگیریه‌ید ئه‌را وه‌دیكردن چاره‌سه‌ره‌یل باوه‌تى گشت كیشه‌یل ك نه‌ك ته‌نیا وه‌ل هه‌رێم كوردستان، به‌ڵكوو وه‌ل گشت لایه‌نه‌یل سیاسى و پیكهاته‌یل ملله‌ت عراق و خواست گله‌وخواردن ئه‌را ریككه‌فتن هه‌ولێر و ده‌ستوور و له‌هه‌مان وه‌خت بنه‌مایه‌یل هاوبه‌شى راسكانى له‌وه‌رچه‌و بگیریه‌ید له‌ پرووسه‌ى سیاسى و له‌وانه‌یش جواودانه‌وه‌ى داواكارى ره‌واى هاووڵاتیه‌یل ك فیشتر له‌ په‌نج مانگه‌ خوه‌ینیشانداین ئه‌نجام ده‌ن وه‌بى ئه‌وه‌ك مه‌سه‌له‌گه‌ یه‌كلاوه‌ بكریه‌ید.

ملله‌ت عراق مه‌ینه‌تى و به‌دبه‌ختیه‌یل فره‌یگ وه‌خویه‌و دیه‌و ئیسه‌یش چه‌وه‌ڕى ئومیدیگه‌و له‌هه‌مان وه‌خت وه‌ هوشیاریه‌و نوڕیده‌ ئى سه‌ردان و دانیشتنه‌یل ناونى سه‌ركرده‌یل حكوومه‌ت ناوه‌ندى و سه‌ركرده‌یل حكوومه‌ت هه‌رێمه‌و ئومیده‌وارن ده‌رئه‌نجامى ریككه‌فتن خاسیگ بوود و چاره‌سه‌ر بنه‌ڕه‌تى بوود ئه‌را گشت قه‌یرانه‌یل و پابه‌ندى بكریه‌ید وه‌ ریككه‌فتنه‌یل ناونى لایه‌نه‌یل سیاسى وه‌خاتر به‌رژه‌وه‌ندى گشتى و قوناغ بنیاتناین و روى وه‌ڕوى بوینه‌وه‌ى فه‌قیرى و نه‌فامى و نه‌خوه‌شى ده‌س وه‌پى بكا ك فیشتر له‌ شه‌ش ملیۆن عراقى له‌ ژیر خه‌ت فه‌قیرى و نه‌دارى ژیه‌ن.

وه‌لى خودا نه‌خواسته‌، ئه‌گه‌ر ئى دانیشتنه‌یله‌ شكه‌ست بارید، ئه‌وه‌ گشت كیشه‌یل وه‌بى چاره‌سه‌ر مینیدو ئاكامه‌گه‌ى كاره‌سات له‌لى كه‌فیده‌و، ك خود لایه‌نه‌یلیش له‌لى ئاگادارن، ئنجا خاستر ئه‌وه‌سه‌ وه‌ گیان وه‌خشین و برایه‌تى نیشتمانى و به‌رژه‌وه‌ندى باڵاى عراق مامڵه‌ بكریه‌ید دویر له‌ به‌رژه‌وه‌ندى تایفى و حزبى، ك یه‌یش ئومید گشتمانه‌.

سه‌ربه‌ست بامه‌ڕنى

ج . أ