شه‌فه‌ق و فه‌يليه‌يل.. وه‌ختى جه‌هانيه‌و بوون ئايا وه‌چاڵ نريه‌ن؟

شفق نيوز

ئاژانس"شه‌فه‌ق نيوز"ك وجوود ديرێد له‌بان تووڕ ئه‌نته‌رنێت، شه‌و و ڕووژ وه‌رده‌وامه‌ له‌ بڵاوكردنه‌وه‌ى مادده‌يل رووژنامه‌گه‌رى جوور هه‌واڵ و راپۆرت و باوه‌ته‌يل و له‌ هه‌مان وه‌خت رويوه‌ر فراوانيگ و ده‌رفه‌ت گه‌ورايگيش ديرێد ئه‌رامان، ك وه‌گشت فه‌خر وشانازييشگ وه‌رده‌وام رووژانه‌و تا وه‌خت نويسانن ئى باوه‌تميشه‌ فيشتر له‌ 100 هه‌زار كه‌س سه‌ردان ئى ماڵپه‌ڕمانه‌ ئه‌كه‌ن، ك يه‌يش جى شانازيه‌ ئه‌را گشت كورده‌يل فه‌يلى و وه‌كاربه‌ره‌يل ماڵپه‌ڕ ئاژانسه‌گه‌يش، ك له‌ خاسيه‌يل ئى كاره‌ ئه‌وه‌سه‌ ك بارمه‌ته‌ى جوگرافى و ده‌وڵه‌تيگ يا شوونيگ دياريكرياگ نيه‌و ئه‌وانه‌يش ك سه‌ردانى ئه‌كه‌ن له‌ خه‌ڵك گشت وڵاته‌يل جه‌هانن و له‌ هه‌مان وه‌خت خويچ پابه‌ندييگ حزبى يا تايفى يا هووزايه‌تييش نه‌گرته‌سه‌ خوه‌ى ك هه‌رچه‌نى ئيمه‌ ناشاريمنه‌وه‌ى ك پايه‌نديم وه‌ مه‌سه‌له‌ى نه‌ته‌وه‌يى، وه‌لێ له‌لايه‌ن پيشه‌يى به‌رزيگ ديرێد.

ئيسه‌ ئه‌و رووژگاره‌يل سه‌ره‌تاى كاروان ده‌زگاى شه‌فه‌قه‌ ئه‌خاده‌ هويرم وه‌تايبه‌ت له‌ساڵ 2004، ك وه‌بوونه‌ى كه‌مى سه‌رچه‌وه‌يل و به‌رهه‌مه‌و هه‌وڵ ئه‌وه‌ ديايم مه‌ردم فيشتر به‌شدارى بكه‌ن، ك له‌يرايش هه‌ڵويستيگ ئه‌رادان باس ئه‌كه‌م ك روێدا وه‌ل يه‌كيگ له‌ شاعره‌يلمان له‌و سه‌رده‌مه‌و رووژيگ له‌رووژان وته‌پيم: بڕيگ ديوان شعرى وه‌شيوه‌زووان خوه‌مان ديرم و ئه‌خوازم له‌لێدان چاپيان ئه‌ڕام بكه‌ين، منيش جواوى دام و وتم: ئيمه‌ ده‌زگايگ نه‌يريم ئه‌را بڵاوكردن، وه‌لێ له‌وه‌رانوه‌ر ئه‌وه‌يش ئه‌تويه‌نيم له‌ڕى "راديۆ شه‌فه‌ق"ه‌و بڵاويانه‌و بكه‌يم يا كه‌مه‌ كه‌مه‌ له‌ليان له‌ گووڤار "گوڵ سوو" ك وه‌شيوه‌زووان خوه‌مان ده‌رئه‌چى بڵاو بكه‌يم، وه‌لێ ئه‌و عوزرخوازى كرد و وته‌پيم ك گوايا شعره‌يلى جه‌هانيه‌و ئه‌خوازێد مقه‌يه‌تى له‌ ماف بڵاوكردنه‌وه‌ى تايبه‌تيان بكا، ئمجا وه‌ل وه‌سه‌رچگن رووژگار و جريوه‌داين فيشتر ئاساره‌ى "شه‌فه‌ق" له‌ ئاسمان ره‌سانن عراقى و ئه‌و ئاكامه‌يل كاريگه‌ريه‌ ك ئه‌نجامى دا خزمه‌تيلمان ئه‌ڕاى خستمه‌ ڕوى، وه‌لێ هه‌مان جواو داپيم، ئمڕوويش وه‌ل ده‌ركردن نزيكه‌ى 300 شماره‌ له‌ گووڤاره‌يل "گوڵ سوو" و "فه‌يلى" و "فه‌يلى بويچگ" تائيسه‌يش هويچ به‌يتيگ شعرى ئه‌راى له‌تيان بڵاو نه‌ويه‌و جى داخه‌ شوونه‌واريشى له‌ئاست ناوچه‌يى شارياسه‌و نه‌ك له‌ئاست جه‌هانى، ئمجا وه‌ بوونه‌ى نويسه‌ره‌يل و هونه‌رمه‌نده‌يل فه‌يلييش ليست دريژيگ هه‌س ك هويچ به‌رهه‌ميگ نه‌يرن تايبه‌ت بدێ وه‌ى پيكهاته‌.

دى جوور ئه‌وه‌گ ئاشكراس له‌لامان، ئه‌و باره‌ ك هه‌رێم كوردستان له‌تى ئه‌ژيه‌ێد له‌ڕوى ئابووريه‌و جوور ئه‌وسا نيه‌و حكومه‌تيش وه‌و بوونه‌وه‌ باس له‌ناتوانايى پشتگيريمان ئه‌كاو ئايا ئيمه‌يش چوين بتويه‌نيم ئى كيشه‌ چاره‌سه‌ر بكه‌يم؟ يه‌يش پرسياريگ جه‌وهه‌ريه‌و بايه‌سه‌ له‌بان گشت په‌يوه‌نديداره‌يل له‌ ڕووڵه‌يل پيكهاته‌گه‌مان ڕوى ئى پرسياره‌ بكه‌نه‌ خوه‌يان و بايه‌سه‌ له‌بان فه‌يليه‌يليش له‌بان خاڵ دياريكرياگيگ نه‌وسيه‌ن وه‌ل ئه‌و سه‌ختيه‌يله‌ ك ئه‌ياده‌ تويشمان، چوينكه‌ كيشه‌گه‌مان وه‌رگه‌ى وچان و سه‌رده‌وبوين ناگرێد و بايه‌سه‌ وه‌رده‌وامى وه‌ى كاروانه‌ له‌تى بدريه‌ێد و وه‌و كاره‌يله‌ ك په‌ره‌ ئه‌ياده‌ كيشه‌گه‌ له‌گشت لايگ و بواريگه‌و، وه‌ل ئه‌وه‌يشا ئويشيم: ئوميده‌واريم قه‌وڵ ئه‌و شاعره‌ له‌بانمان جيوه‌جى نه‌دێ ك وتگه‌(( قد اسمعت اذ ناديت حيا، ولكن لا حياة لمن تنادي))ك مه‌رام له‌ ماناگه‌ى نه‌ف وه‌رنه‌گرتنه‌ له‌ نوسحه‌ت و ئامووژگارى تا زينيگيم.

عه‌لى حسێن فه‌يلى