بارزانی نه‌مر ... نيشانه‌ی گونجيان

شفق نيوز

و پڕ له‌ناخوه‌شيه‌ ، ئه‌ويش له‌ڕيگه‌ی خه‌باتكردنيگ بی وچان و رابه‌رايیتييگ رووحيه‌وه‌ .

فره‌ن ئه‌و ملله‌ته‌يله‌ ك سه‌ركرده‌يگ بويه‌سه‌ خوه‌راكيگ رووحی و فكری ئه‌رايان و ئه‌را خه‌بات رزگاريخوازی ئه‌و نه‌ته‌وه‌ بويه‌سه‌ نيشانه‌يگ گشتی و ده‌سكه‌فتيگ مه‌عنه‌وی گشتی . كورد يه‌كيگه‌ له‌و ملله‌ته‌يله‌ ك وه‌دريژايی تاريخ چه‌وسياسه‌وه‌وجياوازتر له‌ ملله‌ته‌يل تر به‌شبه‌شيه‌و كردنه‌ ئه‌را چه‌نه‌ها پارچه‌ . ئمجا له‌يراوه‌ نه‌خوه‌شيه‌يل سياسی و كوومه‌ڵايه‌تی ريشگ كووتاگه‌و سه‌رهه‌ڵداگه‌ ، دی كورد چه‌نيگ هه‌وه‌جه‌ وه‌خه‌بات رزگاريخوازی داشتگه‌ ئه‌وه‌نه‌يش هه‌وه‌جه‌ وه‌ كه‌سيگ داشتگه‌ سايكۆلۆژيای تاك كورد وه‌يه‌كه‌وه‌ گريه‌ به‌يگ له‌گشت پارچه‌يل ئه‌را ئه‌وه‌ك هس وه‌ ئازار و ناڕه‌حه‌تيه‌يل يه‌كتری بكه‌ن ك مه‌به‌سمان كه‌سيگه‌ وه‌ك بارزانی ك چوين بويه‌ مه‌رجه‌عيگ رووحی شووڕشكاری كوردستان .

له‌وه‌خت دامه‌زرانن كوومار كوردستان له‌ مه‌هاباد بارزانی وه‌هسكردنی وه‌ وه‌رپرسيارێتی تاريخی و ئه‌خلاقی وه‌خوه‌ی و له‌شكر گه‌ورايگه‌وه‌ په‌ڕيه‌وه‌ ئه‌را رووژهه‌ڵات كوردستان و ئاماده‌يی خوه‌ی نيشاندا وه‌ك پيشمه‌رگه‌يگ له‌و كووماره‌ خه‌بات بكه‌يگ ، ئمجا هه‌ڵسووكه‌فت و ره‌فتار جوان و په‌سه‌نی له‌گشت روييگه‌وه‌ له‌ناوحكوومه‌ت كوردستان و هيز پيشمه‌رگه‌ له‌يوا كرد بارزانی جياواز له‌سه‌ركرده‌يل تر ئه‌و وه‌خته‌ ته‌ماشا بكريه‌يگ ، دی له‌يراوه‌ ئه‌و مه‌رز ده‌سكرده‌ شكان ك له‌ناونی كورده‌يل وه‌بی خواست خوه‌يان نه‌خشه‌كيش كرياويگ و بويگه‌ وه‌ربه‌سيگ گه‌ورای ماددی و ده‌روينی .

ئه‌يه‌ گام گرنگ يا موهميگ بوی ك سايكۆلۆژيای تاك كورد له‌و دو پارچه‌ی كوردستانه‌ به‌سا يه‌كه‌وه‌و ، ئه‌يه‌ بيجگه‌ ئه‌وه‌ك له‌كوومار مه‌هاباد ده‌ور ئاشكرايگ داشت و هويريش له‌وه‌ كردياگ ك بايه‌سه‌ كوردستان باشوور له‌و هيزه‌يل بويچگ بويچگه‌ رزگار بكه‌يگ ئه‌را ئه‌وه‌ك گشت توانايگ گرده‌و بكه‌يگ له‌وه‌ر خاتر خه‌باتيگ سه‌رتاسه‌ری . هه‌ر له‌وه‌ر ئه‌وه‌يش پيشنيار دروسكردن حزبيگ كرد ك له‌گشت هيزه‌يل سياسی و كوومه‌ڵايه‌تی و رووشنهويری ئه‌و سه‌رده‌مه‌ پيكهات .

له‌شوون رميان كوومار كوردستان ، بارزانی خوه‌ی نه‌يا ده‌سه‌وه‌ ، وه‌ جه‌نگ و گفتوگووه‌وه‌ كه‌فته‌ وه‌زع سه‌ختيگه‌وه‌ ، ئه‌وه‌ بوی له‌ناونی ئه‌و هه‌مگه‌ دوشمنه‌يل ده‌ره‌كی و ناوخوه‌يی و ئه‌و رووژگار سه‌خته‌ وه‌ره‌و يه‌كێتی سۆڤێت كه‌فته‌ڕی وه‌خوه‌ی و قه‌يريگ پيشمه‌رگه‌ی ئازاو چه‌ونه‌ترسه‌وه‌ ، ئمجا په‌ڕێنه‌وه‌ی بارزانی له‌و وه‌خته‌ ئه‌را سۆڤێت ئه‌وه‌نه‌ سه‌خت وناخوه‌ش بوی هويره‌و له‌وه‌ كردياگ چوين ريگه‌چاره‌يگ بكه‌يگه‌دی  ئه‌را سه‌ركه‌فتن جموجويل رزگاريخواز كورد له‌و قه‌يران و كيشه‌و ئه‌و هه‌مگه‌ قوربانيداينه‌ ، دی ئه‌وه‌ بوی بارزانی نه‌مر كاريگ له‌يوا كرد بووگه‌ كه‌سايه‌تييگ به‌رز و دياری له‌هه‌رچوار پارچه‌ی كوردستان و ته‌نانه‌ت نه‌ته‌وه‌و دينه‌يل تر كوردستانيش وه‌ مه‌رجه‌ع خوه‌يان زانستيانه‌ی ، چوينكه‌ ئه‌و كاريگه‌ری رووحی بارزانی نه‌مره‌ ته‌نيا له‌بان مه‌ردم كوردستانی نه‌وی ، به‌ڵكوو كاريگه‌ری له‌بان گشت عراق داشت ، ئمجا ئه‌را ئسپاتكردن ئی راسييشه‌ له‌و وه‌خته‌ عه‌بدولكه‌ريم قاسم هاته‌ بان حوكم ، داوا كرد بارزانی بايگه‌وه‌ ئه‌را عراق ، ئمجا له‌وه‌خت گله‌وخواردنی عه‌ره‌ب به‌سره‌و ئه‌و ناوچه‌يل عه‌ره‌بنشينه‌ پيشوازی فره‌ گه‌ورايگ له‌لی كردن .

بارزانی نه‌مر دی له‌و وه‌خته‌وه‌ تا رووژ مردنی ئه‌را ته‌نيا سه‌عاتيگيش له‌ خه‌م ملله‌ته‌گه‌ی غافڵ نه‌وی و له‌و ماوه‌يشه‌ تويش كاره‌سات وگرفت و ده‌رده‌سه‌ری فره‌يگ بوی بيجگه‌ له‌ جه‌نگ و سه‌ركه‌فتن و شكه‌ست و چشته‌يليگ تر ، وه‌لی گه‌وراترين كاره‌ساتيگ ك كاريگه‌ری فره‌يگ داشت له‌بان بارزانی نه‌مر ، ئه‌ويش ئه‌و پيلان يا موئامره‌ی شووم و نائه‌خلاقی جه‌زايره‌ بوی ك نه‌وه‌ له‌شوون نه‌وه‌ له‌ هويريان نيه‌چووگ .

جوير ئه‌وه‌ك ئشاره‌ت وه‌پی كرديم بارزانی نه‌مر و هه‌مشه‌ زنگ له‌ وژدان گشت كورديگ ، تا رووژ ماڵئاواييكردنی وه‌يه‌كجاری له‌ كوردستان ، هه‌ر له‌خه‌م ملله‌ته‌گه‌ی بوی و هه‌ميشه‌ گه‌ردياگه‌ شوون ريگه‌چاره‌ی ئاشتيانه‌و زوان گفتوگفوو ، وه‌لی ناحه‌زه‌يل و حكوومه‌ته‌يل يه‌ك له‌شوون عراق دگان وه‌ راسييا نه‌نان و هه‌ر خه‌ريگ زوڵمكردن بوين له‌ ملله‌ت كورد .

ئيمه‌ ئه‌گه‌ر بايگ و باس له‌ سه‌ركرده‌يل تر بكه‌يم ، فره‌ن ئه‌و كه‌سه‌يله‌ ك له‌شوون كووچكردنيان ده‌رد  و به‌ڵا ئه‌را ملله‌ته‌گه‌يان دروسكه‌ن و فره‌يش كه‌من ئه‌و كه‌سه‌يله‌ تا رووژ مردنيان هه‌ر خزمه‌ت ملله‌ت و نيشتمانه‌گه‌يان كه‌ن . ئمجا جوير ئه‌وه‌ك باس كه‌ن و ئويشن : له‌وه‌خت كووچكردن بارزانی نه‌مر له‌و دويا سه‌عاته‌يليه‌ گشت كه‌سايه‌تی كوومه‌ڵگای كوردستان له‌ يه‌ك كه‌سايه‌تی مه‌عنه‌وی جه‌مه‌و بوی ك ئه‌ويش خه‌م بوی ئه‌را بارزانی له‌ شوون ئازادبوين كوردستان و له‌و رووژه‌ ك ته‌رم پيرووز بارزانی كاك ئدريس جوانه‌مه‌رگ و هه‌ميشه‌ له‌ياد هاته‌وه‌ ئه‌را كوردستان . ئه‌وه‌ بوی جاده‌ی كوردی وه‌بی جياوازی ده‌نگ و ره‌نگ هاتنه‌ پيشوازی و گشت هيزه‌يل سياسی چڕی و ، وته‌ پيان گشتدان بوونه‌ يه‌كيگ و ده‌س بخه‌نه‌ ناو ده‌س يه‌كتری با دوشمن زه‌فر وه‌پيدان ناريگ .

بيگومان كه‌سايه‌تی بارزانی نه‌مر ئه‌وه‌سه‌ ك هه‌ميشه‌ تواس رزه‌يل كوردستان و بخه‌يگه‌ يه‌ك و جه‌ميانه‌و بكه‌يگ ئه‌را خه‌بات و هه‌وڵداين له‌وه‌ر خاتر خاك و ملله‌ته‌گه‌ی ، ئيسه‌يش ئه‌و يه‌كرزی و يه‌كگرتنه‌ رووح بارزانی و گشت شه‌هيده‌يل كورد و كوردستان شاده‌و كه‌يگ و گونجيان خه‌يگه‌ ناونی هيزه‌يل كورد . هه‌زاران سڵام له‌گيان پاك بارزانی و كاكه‌ ئدريس جوانه‌مه‌رگ و گشت شه‌هيده‌يل ريگه‌ی خه‌بات و رزگاری كوردستان .