جه‌عفه‌ر كاكه‌یى: له‌ئسپانیا كه‌فتمه‌خاڵ یه‌كه‌وگردن خوه‌رهه‌ڵات و خوه‌رئاوا

شفق نيوز

په‌یا بویه‌ و هونه‌ر شیوه‌كارى (ڕه‌سمكردن) له‌ كۆلیج هونه‌ره‌یل جوان له‌ به‌غدا خوه‌نیه‌، جوور ڕه‌سمكه‌ریگ له‌ به‌ش نه‌خشه‌سازى له‌ ده‌زگاى ڕووشنهویرى و بڵاوكردن كوردى كاركردیه‌ له‌ به‌غدا له‌ ساڵ 1976 و بویه‌ ئه‌ندام كوومه‌ڵه‌ى شیوه‌كاره‌یل عیراقى، و له‌ ساڵ 1979 وه‌ره‌و ئسپانیا كووچكرد له‌ شوون چزداین و فشارخستن وه‌بانى له‌ لایه‌ن داموده‌زگایه‌یل ڕژیم وه‌رین، و له‌ورا به‌ڵگه‌نامه‌ى ماجستێر له‌ ڕه‌سمكردن و حه‌فركردن و چاپكردن له‌ كۆلیج هونه‌ره‌یل جوان وه‌رگرد له‌ زانكۆى مه‌درید  له‌ ساڵ1985-1987 و ئنجا به‌ڵگه‌نامه‌ى دكتۆرا ته‌واوكرد و بویه‌ مامۆستا له‌ خولیگ جه‌هانى ئه‌را خوه‌نین حه‌فركردن له‌ كالیا له‌ هه‌رێم كه‌تالۆنیا، و هه‌ر له‌یوا له‌ خول خوه‌نین (گرافیكا 91) له‌ زانكۆى جه‌هانى "مینیندیز بیلایۆ" له‌ لاكۆرنا، و له‌ كاروان هونه‌رى و ئه‌كادیمیى خوه‌ى خه‌ڵات و مینحه‌یل خوه‌نین فره‌یگ كه‌فتیه‌سه‌ ده‌سى وه‌تایبه‌تى له‌ ته‌كنیك حه‌فركردن و چاپكردن له‌ چه‌ن داموده‌زگایگ جه‌هانى، و له‌ هه‌مان وه‌ختیش چه‌ن به‌ڵگه‌نامه‌یگ ڕیزلینان جه‌هانى و ئسپانى وه‌رگردیه‌.

ماڵپه‌ڕ شه‌فه‌ق ئى دیمانه‌ى كوڵ و خێرا وه‌لیه‌و سازدا....

•           گرنگنترین وێستگه‌ یا مه‌حه‌ته‌یل هونه‌ریدان له‌ شوون ئه‌وه‌گ كاروان غه‌ریبى ڕه‌سانه‌ده‌ ئسپانیا؟

•           ئسپانیا وڵات هونه‌ره‌ و له‌ كووچكردن و هاتنم ئه‌را ئسپانیا ڕیگه‌م ڕه‌سانه‌ خاڵ یه‌كه‌وگردن هه‌ردوگ ژیار ڕووژهه‌ڵات و ڕووژئاوا، و شاكاره‌یل فره‌یگ دیرم له‌ مۆزه‌خانه‌ یا متحف هونه‌ر، و خه‌ڵات و مینحه‌یگ خوه‌نین له‌ ده‌زگاى هونه‌رمه‌ند خوان نیرۆ.

•           ئایا كاره‌یل هونه‌ریید شوونپه‌نجه‌ى تایبه‌تیگ دیرن؟

•           هه‌ر هونه‌ریگ ڕه‌سیده‌ ئاست زووان و شوونپه‌نجه‌ى تایبه‌تیگ بووده‌ جموجویلیگ هونه‌رى ك ناوه‌ڕۆك یا مه‌زموون و شیوه‌یل تایبه‌ت خوه‌ى دیرید، و یه‌یشه‌ له‌ شوون ژان و وه‌ره‌ژانه‌یل فره‌یگ تیه‌یده‌ عه‌مه‌ڵ ...  كاره‌یلم له‌ هونه‌ر ته‌جریدى نزیكن هه‌رچه‌نى ك ئنتباعیین، و حه‌زكه‌م تابلۆگانم نادیارى و شاعریه‌ت له‌تیان بوود، له‌ بان ئه‌وه‌یشه‌وه‌ من نیه‌زانم چوین تابلۆگانم شیه‌و بكه‌م، هه‌وڵ ده‌م ڕه‌نگ و خه‌ت و رویوه‌ر وه‌كاربارم، ڕه‌نگه‌یل مناڵى و ئه‌زموونه‌گه‌م له‌ عیراق هه‌ڵگرتنه‌ و ئه‌ڵس وبنیشم وه‌ل مه‌ردم و ژیانم له‌ سروشت باكوور و باشوور و ناوڕاس وڵات و به‌غدا و ئى ڕه‌نگه‌یله‌ وه‌ل خوه‌ما هه‌ڵگردمه‌ وه‌ك كه‌له‌پووریگ و هه‌وڵ ده‌م پیشى بخه‌م وه‌و شیوه‌ ك وه‌ل ده‌ربڕین و خستنه‌ ڕوى بگونجیه‌ید، و له‌ هه‌ر شوونیگ ئازادى وجوود داشتوود، هونه‌ریش وجوود دیرید، و مه‌ردم له‌ ئۆروپا و ئه‌مریكا دانه‌سه‌ نوامانا له‌ ئازادى  دیموكراتى و هونه‌ر له‌ورا پیشكه‌فتیه‌ و بایه‌سه‌ له‌لیان هووكاره‌ بویمن.

•           گرنگنترین پیشانگایه‌یل كه‌سایه‌تى یا شه‌خسیید له‌ ده‌یشت وڵات؟

•           سه‌ره‌تاى پیشانگایه‌یلم یه‌ك گالێرى بویچگیگ بوى ئه‌را كاره‌یل هونه‌ریم له‌ مه‌درید ك پڕه‌ له‌ هونه‌رمه‌نه‌یل مه‌زن و منیش یه‌كم جایڵیگ بویم گالێرى تایبه‌ت وه‌خوه‌م نمایش بكه‌م شان وه‌شان هونه‌رمه‌نه‌یل مه‌زن، و سه‌ركه‌فتنم سه‌ركه‌فتن گه‌ورایگ بوى و مه‌ردم فره‌یگ هاتنه‌ ته‌ماشكردنى و بویه‌ هووكار ناوبانگى و ناسینم، و ڕووژنامه‌یل له‌باوه‌تم نویسانن و هه‌ر له‌ شوون ئه‌وه‌یشه‌ بوى ك ده‌س كردمه‌ پرۆفیشناڵى یا ئحترافم جوور یه‌كیگ له‌ هونه‌رمه‌نه‌یل ئسپانیا، له‌ شوون ئه‌وه‌یشه‌ له‌ چه‌ن پیشانگاى شه‌خسى به‌شدارى كردم و گشت ساڵیگ له‌ مه‌درید فیستیڤاڵیگ هه‌س و به‌شدارى كردمه‌ له‌ چه‌ن پیشانگاى شه‌خسى و وه‌جه‌م له‌ فیستیڤاڵه‌یل هونه‌رى جووراوجوور فره‌، و له‌ شوون ئه‌وه‌ چویم ئه‌را به‌رشلۆنه‌ و ئشبیلیه‌ و زوورمى شاره‌یل ئسپانیا و كاره‌یلم نمایش كردم.

•           خه‌رمان و ده‌سكه‌فت ئه‌زموونه‌یلد له‌ ساڵه‌یل غه‌ریبى چه‌س؟

•           غه‌ریبى خاسى فره‌یش هاتى و من له‌ غه‌ریبى هووكاره‌ بویم پشت وه‌خوه‌م بووه‌سم و له‌ بنه‌مایه‌یل سوننه‌تى(ته‌قلیدى) میراتى خوه‌م ده‌ربكه‌م و له‌ كه‌ش و هه‌وایگ دیموكراتى ئازاد كار بكه‌م، وه‌ ئه‌وه‌زى ئه‌وه‌گ تویشى هاتویمن له‌ سه‌رده‌م ڕژیم له‌ناوبریاى، چوینكه‌ ئه‌وسا ئه‌گه‌ر تابلۆیگ ڕه‌سم بكردیایمن و یه‌كیگ له‌و ڕه‌مزه‌یله‌ له‌تى نه‌ویاتاد ك خزمه‌ت وه‌ ڕژیم نه‌كردیاد ڕه‌تیه‌وكردیان،  له‌وه‌ر ئه‌وه‌ هونه‌رمه‌ن قه‌ت پیشنیه‌كه‌فید ئه‌گه‌ر كه‌سایه‌تى ئازادیگ نه‌یاشتوود ك له‌ سایه‌ى سته‌م سه‌ركوتكه‌ره‌یل ژیه‌ید.