شوون جوگرافى مه‌نه‌لى

شفق نيوز



شار مه‌نه‌لى ئه‌كه‌فیده‌ بان ئاو كه‌نگیر، ك ئى ئاوه‌ له‌ ناوچه‌ى زه‌هاوه‌و ئه‌یاد و له‌ دووڵ هه‌رانه‌و چووده‌ ناو ئیران و كویه‌ى حه‌مرین بڕید. وه‌ل ئه‌وه‌یشا له‌ سه‌رچه‌وه‌یگ تریش ئاماژه‌ وه‌ ئه‌وه‌ كریاگه‌ ك شار مه‌نه‌لى ئه‌كه‌فیده‌ ناو ده‌یشتاییگ فراوان، ك دریژیه‌گه‌ى فیشتره‌ له‌ 95 كم بوود.

مه‌نه‌لى له‌ زنجیره‌ كویه‌ى حه‌مرینه‌و ده‌س وه‌پى ئه‌كاو له‌ باكووره‌و تا قه‌زاى به‌دره‌ كووتایى وه‌پى ئه‌یادو له‌ باشووریشه‌و له‌ پاریزگاى كووت. ئى شاره‌ له‌ باقوبه‌و وه‌ره‌و لاى باشوور خوه‌رهه‌ڵات 90 كم دویره‌و 6 كم له‌ مه‌رز ئیرانه‌و دویره‌.

مه‌رز مه‌نه‌لى له‌ باكووره‌و ها قه‌ى مه‌رز قه‌زاى خانه‌قین و له‌ باشووریشه‌و شار به‌دره‌ له‌ پاریزگاى كووت و له‌ خوه‌رهه‌ڵاتیشه‌و ئیران و له‌ خوه‌رئاوایش ناحیه‌ى كه‌نعان و مه‌رز قه‌زاى شاره‌بانه‌.

روى وه‌ر مه‌نه‌لى وه‌گووره‌ى دابه‌شكردن ئدارى ساڵ 1987، نزیكه‌ى(6586كم2)ه‌و ، ئنجا ساسان مه‌نده‌لاوى له‌ وتار" مه‌نه‌لى شاره‌ كورده‌گه‌ له‌ناونى ئه‌وساو ئیسه‌" ئاماژه‌ وه‌ ئه‌وه‌ كردگه‌ ك شار مه‌نه‌لى ئه‌كه‌فیده‌ بان مه‌رز ئیران – عراق و 6 كم دویره‌ له‌و مه‌رزه‌و.

سه‌نته‌ر ناحیه‌ى مه‌نه‌لى سه‌ر وه‌ پاریزگاى دیاله‌س، ئه‌كه‌فیده‌ باكوور خوه‌رهه‌ڵات به‌غدا وه‌ دویرى 50 كم. له‌ باكووریشه‌و وه‌ زنجیره‌ كویه‌یل"قشخه‌"و جیاى ئه‌كاده‌و له‌ خانه‌قین و له‌ خوه‌رهه‌ڵاتیشى كویه‌ى حه‌مرینه‌ ك جیاى ئه‌كاده‌و له‌ كویه‌ى پشتكوو و له‌ باكووریشیه‌و شار به‌دره‌س.

روى وه‌ر مه‌نه‌لى وه‌گووره‌ى دابه‌شكردن ئدارى ساڵ 1987 وه‌ پانى نزیكه‌ى 20 – 35 كیلۆ مه‌تره‌و دریژیه‌گه‌یشى 70 كیلۆمه‌تر.

فه‌همى مهدى

ج . أ