جه‌نگ ناوچه‌گه‌و ئاينده‌ى كورد

شفق نيوز

ئى جه‌نگه‌ پرشى له‌ناوچه‌گه‌ بڵاوه‌و بويه‌و هه‌ر هيزيگ ئاماده‌گى‌ نه‌ياشتوود ئه‌را روى وه‌ڕوى بوينه‌وه‌و ستراتيجيه‌ت هيز و سياسه‌تى ئاماده‌ نه‌دێ ئه‌را كاركردن له‌بانى، ئه‌وه‌ بيگومان به‌شه‌گه‌ى له‌ ئاينده‌ هاوشان نادێ وه‌ل پايه‌ى ئه‌و لايه‌نه‌يله‌. ئه‌را كورديش ئى جه‌نگه‌ بايه‌خ و كاريگه‌رى خوه‌ى ديريد ك خوازيار ئه‌وه‌سه‌ ئاماده‌كارى خاسيگ ئه‌راى بكريه‌يد تا كاريگه‌رى خراو له‌بان رويداگه‌يل نه‌ياشتوود و بدێده‌ ده‌رفه‌تيگ گونجياگتر ئه‌را مه‌سه‌له‌ى كورد.

سياسه‌ت هه‌رێم كوردستان و سه‌ركردايه‌تى هه‌رێم كوردستان له‌ى جه‌نگ تايفيه‌ سياسه‌ت ئاشكرايگه‌و هاولفه‌ وه‌ل واقع ناوچه‌گه‌و ئه‌تويه‌نيم وه‌گووره‌ى ئه‌و ئالشتكاريه‌يله‌ قانجازى بوينيم نه‌ك زه‌ره‌د، چوينكه‌ گه‌رمى ناكووكى ناوچه‌گه‌ ئه‌وه‌نه‌ ئاسان نيه‌ سه‌رده‌و بدى و سه‌قامگيرى خاسيگ له‌تى جيگير بدێ ك يه‌كلاكردنه‌وه بريار له‌بانى بدريه‌يد.

كورد ئاقڵانه‌ سياسه‌ت كردگه‌ ك هاوپه‌يمانيه‌ته‌يلى وه‌ شيوه‌يگ په‌يوه‌س كردگه‌ كه‌مترين زه‌ره‌د بكه‌فيده‌ وه‌ر كيشه‌ى نه‌ته‌وه‌يى، يه‌يش ماناى ئه‌وه‌ نيه‌ مه‌ترسيه‌گه‌ دويره‌و خستگه‌ وه‌ى سياسه‌ته‌، به‌ڵكوو گره‌نتييگ داسه‌ نه‌ته‌وه‌و مه‌زه‌و و پيكهاته‌يل ناوچه‌گه‌ وه‌ ئه‌وه‌گ له‌ ئيسه‌و له‌ ئاينده‌يش وه‌ ئاشتيانه‌و ژيان هاويه‌ش و ريزگرتن له‌ جياوازى ئايينى و مه‌زه‌وى و نه‌ته‌وه‌يى كورد ئه‌تويه‌نيد وه‌ل گشتلايگ بژيه‌يد و مه‌رج ئه‌وه‌يش هه‌س ته‌نيا ريز له‌ ئيراده‌و وجوود كورد بگيريه‌يد و هويچ لايه‌نيگيش ئه‌را جه‌نگ و كيشمه‌كيش خوه‌ى كورد ناريده‌ كار.

ته‌نيا چشتيگ ك پاداگرى فريه‌يگ له‌بانى بكريه‌يد و بدێده‌ خاڵيگ گرينگ و مامڵه‌يگ ستراتيجيانه‌ وه‌ليا بكريه‌يد، ئه‌ويش مه‌سه‌له‌ى يه‌كگرتگى و يه‌كهه‌ڵويستى و يه‌كڕزى و مقه‌يه‌تيكردن ناوماڵ كورده‌، چوينكه‌ ئى سياسه‌ته‌ ئه‌تويه‌نيد ئه‌و مه‌ترسيه‌يله‌ ك له‌جه‌نگ تايفى ئه‌كه‌فيده‌و له‌ هه‌رێم كوردستان دويره‌و بخاو كاريگه‌رى خراو له‌بان كيشه‌و ژيان نه‌ته‌وه‌يى كورد نه‌ياشتوود، ك يه‌يش ئه‌رك هيزه‌يل كوردستانى قورس ئه‌كاو ئه‌خاده‌ى وه‌رده‌م وه‌رپرسياريه‌تيگ گه‌ورا ك چوين پاداگرى له‌بان ئه‌و يه‌كده‌نگيه‌ بكه‌ن و شوون ئه‌راى بكه‌نه‌و له‌ ريكخستن و ميدياو سياسه‌ت خوه‌يان.

جیهان مهدی

ج . أ