ئایا كورد ئاسایش نه‌ته‌وه‌یى دیریگ؟

شفق نيوز

سه‌روه‌رى و یه‌كێتى خاك و گه‌شه‌وه‌پیداین گشتلایه‌نى و مقه‌یه‌تیكردن و ریكخستن و داناین په‌یوه‌ندى ناونى وڵاته‌یل له‌بان بنه‌ماى حورمه‌ت و ڕیزگرتن له‌ سه‌روه‌رى و مقه‌یه‌تیكردن له‌ هه‌ر چشتیگ  ك په‌یوه‌ندى وه‌ ژیرخان ئابوورى و كلتوور و سستم سیاسى وڵاته‌وه‌ داشتووگ، ئه‌وه‌ بیگومان له‌لاى ملله‌ت كورد تاڕاده‌یگ چه‌مك تازه‌یگه‌، ئه‌ویش وه‌ سه‌به‌ب سه‌ختى له‌ڕوى داناین و شیه‌وكردن و نائاماده‌یى له‌ناو نه‌زه‌ریه‌و له‌یه‌كه‌وداین و شیه‌وكردن سیاسى و قانوونى و ستراتیجى ئابوورى و ئه‌كادیمیه‌یل كوردیه‌وه‌.

له‌یرا بایه‌سه‌ ئه‌وه‌یشه‌ ئاشكرا بكه‌یم و بویشیم، ك تائیسه‌ له‌لایه‌ن كورده‌وه‌ هویچ ستراتیجیه‌ت و نوڕستنیگ دیاریكریاگ نه‌ویه‌ له‌باوه‌ت ئاسایش نه‌ته‌وه‌یى وه‌شت جووریگه‌وه‌، یا وه‌ مانایگ تر تویه‌نیم بویشیم: ئاسایش نه‌ته‌وه‌یى ماناى تواناى كومه‌ڵگاى كوردى ده‌یگ ، ئه‌ویش له‌چوارچیوه‌یگ سستماتیكى ئه‌را روى وه‌ڕوى بوینه‌وه‌ى هه‌ڕه‌شه‌و مه‌ترسیه‌یل ناوخوه‌یى و ده‌ره‌كى وه‌هه‌ر میكانیزم یا ئالیه‌تیگ خواست و گونجیاگ بووگ.

له‌بڕیگ سه‌رچه‌وه‌یل زانستى ئه‌وه‌ ده‌ركه‌فتگه‌و ئشاره‌ت وه‌و مه‌سه‌له‌ كریاگه‌، ك گوایا ئاسایش نه‌ته‌وه‌یى كوردى زیاتر خوه‌ى له‌ هه‌وڵ روى وه‌ڕوى بوینه‌وه‌و جواوداین هه‌ڕه‌شه‌و مه‌ترسیه‌یل دوینیگه‌وه‌، چوینكه‌ وه‌رده‌وام و هه‌میشه‌ له‌لایه‌ن وڵاته‌یل گه‌وراهیزه‌وه‌ یا له‌لایه‌ن وڵاته‌یل هاوساو داگیركار روى وه‌ڕوى هه‌ڕه‌شه‌و مه‌ترسى له‌ناوبردن بویه‌سه‌وه‌. ئى مامڵه‌كردن و ڕه‌فتار كورده‌ وه‌ل ئاسایشه‌ نه‌ته‌وه‌ییگه‌ى ئه‌گه‌ر زویتر له‌گوزه‌یشته‌ خاس و گونجیاگ بویگ ، ئه‌وه‌ بیگومان ئه‌را سه‌رده‌م ئیسه‌و تازه‌ بایه‌سه‌ میكانیزم و چوینیه‌تى مامڵه‌كردن و شیواز كاركردن وه‌ ته‌واوى ئه‌ڕاى ئاڵشت بكریه‌یگ ، چوینكه‌ جویر ئه‌وه‌ك ئاشكراس هه‌م هاوكیشه‌ى هیز و بار سیاسى و ئه‌منى ناوچه‌گه‌و جه‌هان ئاڵشتكارى فره‌یگ وه‌ خوه‌یه‌وه‌ دیه‌، هه‌میش پایه‌ى سیاسى و قانوونى و دبلۆماسى كورد بته‌وتر و كاریگه‌رتر بویه‌. ئنجا له‌بان دوباره‌ داناین ئاسایش نه‌ته‌وه‌یى كورد وه‌شیوه‌ى خاس و گونجیاگیگ ، بایه‌سه‌ سێ ره‌گه‌ز سه‌ره‌كى له‌وه‌رچه‌و بگیریه‌یگ ، ك گرنگى یا ئه‌همیه‌ت و كاریگه‌رى فره‌یگ دیرن، هه‌م له‌ ده‌سه‌وه‌ركردن ئاسایش نه‌ته‌وه‌، هه‌م له‌ مقه‌یه‌تیكردن ئاسایش نه‌ته‌وه‌یى.

1- دیاریكردن ستراتیجیه‌ت گشتگیر  و گشتلایه‌ن له‌گشت ئاست و مه‌یدانیگه‌وه‌.

2- هسكردن و ئاگاداربوین له‌گشت ئه‌و هه‌ڕه‌شه‌و مه‌ترسیه‌یله‌ له‌ئیسه‌و ئاینده‌ ك تیه‌نه‌ تویش ئاسایش نه‌ته‌وه‌یى كورد.

3- دابینكردن و ئاماده‌كردن له‌شكر و هیز پۆلیس و ئاسایش پڕ چه‌ك و مه‌شق وه‌پیكریاگ.

ئامانجه‌یل ئاسایش نه‌ته‌وه‌یى له‌ مقه‌یه‌تیكردن له‌ قه‌واره‌ى ملله‌ت كورد خوه‌ى دوینیگه‌وه‌، ئه‌ویش له‌ڕى گه‌شه‌وه‌پیداین توانایه‌یل هه‌رێم و تیركردن خواست و هه‌وه‌جه‌یل كومه‌ڵگاى كوردى و تاكه‌یلى له‌گشت مه‌یدانه‌یل سیاسى و ئابوورى كومه‌ڵایه‌تى و كلتوورى و رووشنهویرى و هانداین ره‌گه‌زه‌یل وه‌به‌رهاوردن(ماددى و مه‌عنه‌وى)و دامه‌زراننى و له‌ هه‌مان وه‌خت وه‌كارخستنى وه‌شیوه‌یگ خاس و گونجیاگ، ك ئه‌ویش بایه‌سه‌ وه‌جووریگ ك له‌خزمه‌ت به‌رژه‌وه‌ندى و بار نه‌ته‌وه‌یى ملله‌ت كوردمان بووگ. وه‌ل ئه‌وه‌یشا بایه‌سه‌ گرنگى یا ئه‌همیه‌ت فره‌یگ بدریه‌یگه‌ گه‌شه‌وه‌پیداین و فراوانكردن مه‌سه‌له‌ى دبلۆماسیه‌ت كوردى و ده‌سكه‌فتن پشتگیرى بته‌ویگ ماددى و مه‌عنه‌وى و ده‌سه‌وه‌ركردن مه‌سه‌له‌ى هه‌رێمى و ناوده‌وڵه‌تى، ك گشت ئه‌یانه‌ خواست و هه‌وه‌جه‌ن.