كی ئازادی و سه‌قامگيری عراق كوشت؟

شفق نيوز

له‌ يه‌كه‌مين پرووسه‌ی ئازادی ده‌نگداين ك ٨٥% مه‌ردم عراق له‌تی وه‌ ئاره‌زوو خوه‌ی ئاماده‌ بوی، هيمان وه‌ چه‌ويگ پڕ ئوميده‌و ته‌ماشای سه‌قامگيری و بار ئاسايش كريا له‌سای حكوومه‌تيگ هه‌ڵوژرياگ هاوبه‌ش.

وه‌لی دويای ئه‌و هه‌ڵوژاردنه‌ وه‌ ماوه‌ی دو ساڵيگ كوشت و كوشتار سه‌ختيگ ده‌س وه‌پيكرد و ره‌نگڕوی ئازادی زه‌رد هه‌ڵگه‌رديا.

كه‌مه‌ كه‌مه‌ بار وڵات له‌ كنار ئارامی دويره‌و كه‌فت و چه‌ته‌و پياوكوش و گرووپه‌يليگ ده‌سكردنه‌ رواكانن و كوشتن و هه‌ڕه‌شه‌كردن له‌ ژيان مه‌ردم بيتاوان.

حزب ولايه‌نه‌يل وه‌بی له‌وه‌رچه‌وگرتن به‌رژه‌وه‌ندی گشتی ته‌نيا هه‌وڵ ده‌سكه‌فت خوه‌يان دان و دی خه‌م ئه‌را رويداگ و مه‌ترسيه‌يل ئی وڵاته‌ نه‌خواردن.

چه‌ن كه‌سيگ جوور سه‌رۆك وه‌زيره‌يل پۆست سه‌رۆكايه‌تی وه‌رگرتن، وه‌لی كاميان وه‌ ئنسافه‌و نوڕسته‌ ژان و ده‌رد پڕ مه‌ينه‌تی عراقيه‌يل؟

كيشه‌ی تايفی و خوسه‌و كينه‌ت هه‌ر له‌ خود سه‌ركرده‌و ده‌سڵاتداره‌يل عراقيه‌و سه‌رچه‌وه‌ گرت و ته‌نانه‌ت لێدوانه‌يل گرژ ئه‌وان ئی عراقه‌ وه‌ره‌و مه‌رگه‌سات برد.

ئه‌ی كی ئازادی و سه‌قامگيری عراق كوشت؟

ئه‌را جواو ئی پرسياره‌ بايه‌سه‌ وه‌گووره‌ی وژدان باسی بكه‌يم، چوينكه‌ نه‌وه‌ك سوو دسوو نه‌وه‌يل دوياڕووژ هه‌وه‌جه‌ وه‌ مێژوو سه‌رده‌ميگ داشتوون وه‌خاتر وه‌رگرتن زانياری له‌بان جڵه‌و ده‌سڵاته‌گه‌ی ك له‌و ماوه‌ چوين بويه‌و چ خزمه‌تيگ له‌تی وه‌ ملله‌ت كرياگه‌!!

ئيمه‌ له‌يرا وه‌ ئه‌مانه‌ته‌و ئويشيم دو خول يه‌ك له‌شوون يه‌ك حوكمڕانی له‌عراق له‌ناونی ساڵه‌يل ٢٠٠٦ تا ٢٠١٤ بيجگه‌ ماڵويرانی و ته‌قينه‌وه‌و به‌دبه‌ختی و كاولكاری چشتيگ ك ناوی ئاوه‌د‌انی و خزمه‌تگوزاری بوود ناته‌ تويش ئی ملله‌ت سه‌رله‌ليشوياگ و ره‌نج بيوه‌ره‌.

ئه‌ڵڵاجه‌وی ها له‌ورا دويای حوكمكردن دو خول له‌ سه‌رۆكايه‌تی وه‌زيره‌يل و شكه‌ستهاوردن كاره‌يلی و دروسكردن كيشه‌ی تايفی و دامه‌زرانن ميليشياو چشته‌يل ناڕه‌وای تر و سه‌قه‌تكردن كلتوور برايی و ژيان هاوبه‌ش له‌ناونی پيكهاته‌يلی، وه‌ته‌مای ئه‌وه‌يشه‌سه‌ خول سێيه‌ميش وه‌ زوور بازوو پياوه‌كوشه‌يلی باريده‌ ده‌س!! ك هه‌ر وه‌و خاتريشه‌ بوختان فريه‌يگ ئه‌را لايه‌ن و هاونيشتمانيه‌يل تر هه‌ڵوه‌ساو خوازيار ئه‌وه‌سه‌ وه‌ی بوخته‌يله‌ په‌رده‌پووش شكه‌ست خوه‌ی بكا.

دی گشت ئاده‌ميزاديگ خاوه‌ن كيشه‌ له‌ی عراقه‌ ها له‌و باوه‌ڕه‌ ئه‌و كه‌س و داروده‌سه‌يه‌ بوينه‌سه‌ هووكار كوشتن و له‌ناوبردن ئازادی و سه‌قامگيری بار ئاسايش ك گشت لايه‌نه‌يل تر فه‌رامووش كردن و ته‌نيا حزبه‌گه‌ی خوه‌يان كردنه‌ سه‌رسوار مه‌يدان و سوپای عراق وه‌پی دروسكردن و وڵات وه‌پی دانه‌ ده‌س داعش و هاوپه‌يمانه‌يلی و لايه‌نگره‌يلی وه‌بی به‌شداری حزب ولايه‌نه‌يل تر.

جه‌ماڵ ئه‌ركه‌وازی