خانه‌قین ئیسه‌یش ئازاد نیه!!
شار خانه‌قین وه دریژایى عومرى وه‌خاك پڕ پیت و به‌ره‌كه‌ت و هه‌میشه سه‌وز تاریف كریاگه‌و ته‌نانه‌ت فه‌ڵه‌م گه‌شتكه‌ر و تاریخنویس و شاعره‌یلیش له باوه‌ت جوانى و دیمه‌نه‌یل دڵڕفن ئى وڵات كوردنشینه دریغى نه‌كردنه‌و جوور تاج گه‌رمه‌سیر چیه‌سه توو لاپه‌ڕه‌ى تاریخه‌و.
ئى شاره كورده‌واریه ساڵه‌یل فره‌یگ كه‌فته‌سه وه‌ر به‌ڵاى كاولكارى و ته‌عریب و كووچ وه‌پیكردن زووره‌ملى مه‌ردمه‌گه‌ى، وه‌ل ئه‌وه‌یشا هه‌میشه چه‌و داگیركار و دوشمه‌نه‌یل له‌بانى بویه نه‌وه‌ك رووژیگ له رووژان هه‌ناسه‌ى ئوخه‌ى هه‌ڵكیشیدو ته‌پڵ شادى له‌تى بكوتیه‌ید. مه‌ردمه‌گه‌یشى كوردپه‌روه‌ر و نیشتمان په‌روه‌رن، به‌دبه‌ختى و ده‌رده‌سه‌رى فره‌یگیش دینه‌سه چه‌و.
ئنجا مه‌رام باسه‌گه له‌یرا ئه‌وه‌سه، فره‌كه‌س باس له پرووسه‌ى ئازادى عراق كه‌ن و ئویشن ئیسه گشت شاره‌یل ئازاده‌و گشت زوور و سته‌میگ دا شه‌قه‌ى باڵ و دى نه‌مه‌ند باو داگیركارى و دیلكردن و ناوچه‌گه‌رى! وه‌لى نه‌خه‌یر ئه‌یه دید غه‌ڵه‌تیگه‌و هیمان شاریگ جوور شار خانه‌قین ك خاوه‌ن خه‌بات و قوربانیه وه‌رگ ئازادى له‌وه‌ر نه‌كردگه‌و هیمان ئه‌را به‌خت سیه‌ى خوه‌ى ئازه‌یه‌تباره. له‌وه‌رچه؟ چوین؟ گوناى چه كردگه؟ گشت ئى پرسیاره‌یله هه‌ق ئه‌وه‌سه وه‌رپرسه‌یل و نوێنه‌ره‌یل شاره‌گه جواوى بیه‌نه‌و، چوینكه ئه‌وان فیشتر له ئیمه زانن خانه‌قین له‌وه‌رچه تائیسه هویچ پرووژه‌و خزمه‌تكارییگ له‌تى نه‌كریاگه جى خوه‌شاڵى مه‌ردمه‌گه‌ى بوود، تا ئیسه ده‌س ئاوه‌دانى وه‌پى نه‌ڕه‌سیه‌و دو حكوومه‌تیش خوه‌یان وه خاوه‌نى زانن!!
ته‌نانه‌ت زیوه‌ر شاعر گه‌وراى كورد له پارچه شعریگى له‌باوه‌ت دیمه‌ن ره‌نگین خانه‌قینه‌و نویساگه(جه‌نه‌ته بى شوبهه شار خانه‌قین* ئاو ئه‌ڵوه‌نیشى منیده ئاو مه‌عین) ئنجا نویساگه(ئى جووره دیمه‌نیگ كه‌م له دونیا هه‌س* باخ جوان ئاو ره‌وان ئه‌هل وه دین)، دویاخریش نویساگه(دار خورماو دار لیموو و پرته‌قاڵ*دار نارنج و كه‌بات چین وه‌چین* زینه‌ت داگه‌سه شار و جاده‌گه‌ى* ئاسمان حه‌سره‌ت كه‌شه را سه‌رزه‌مین).
وه‌لى جى داخه ئه‌وه‌سه ئه‌ڵوه‌ن هشك و تیه‌نگ ، مروارى و كڵات وه‌رگ نائومیدى پووشانه‌و داره خورماو پرته‌قاڵیش كریانه ئاگردوى و ئى شار تاریخى و ناوداره پشتگووش خریاگه‌و تائیسه زه‌خمه‌یلى ساڕیژ نه‌كریاگه‌و كه‌سه‌یلیگ بوینه‌سه خاوه‌نى ریشگى له بنه‌و دراوردنه‌و دوباره هه‌ناسه‌ى به‌دبه‌ختى وه‌پى هه‌ڵكیشان و هیمان تا ئیسه‌یش خانه‌قین ك ده‌روازه‌ى زاگرۆسه ئازاد نیه‌و روڵه‌یلى تواناى ده‌نگ به‌رزه‌وكردن نه‌یرن و ناهه‌قى فره‌یگ ده‌رهه‌قى ئه‌نجام دریه‌ید.
عه‌لى به‌یاخى
ج . أ
