هاتنه‌وه‌ى كووچ وه‌پيكردن.. حه‌يده‌ر و زه‌ينه‌ب فه‌يلى يه‌كه‌مين قوربانيه‌يلى

شفق نيوز

له‌هويرم ناچێد هه‌ناى له‌ ته‌سفيرات گه‌ورا ده‌ركريايم و روخسار كه‌س وكاره‌يلمان پڕ بوى له‌ دڵته‌نگى ئه‌ڕامان و زوورم عراقيه‌يل وتيان ئه‌يه‌ قسمه‌ت و كرده‌وه‌ى خوداسه‌و هاوسايه‌يلمان داخ هه‌ڵكيشان ئه‌رامان، ئمجا له‌ى ناونييشه‌ ئه‌و رژيم رمياگه‌ ئى كاره‌ خسته‌ى پاى ياسايى كاره‌يلى و دزو جه‌رده‌يليش ئوميد ئه‌وه‌ كرديان زويتر ته‌سفيرمان بكرديان، وه‌لى هه‌رچه‌نى له‌ مه‌رز گوزه‌ر بكرديايم وه‌ل ده‌سوه‌پيكردن وه‌رزيگ تر دڵشكيان گشتيان له‌ هويره‌و برديايم.

له‌ رووژگاريگيش ك وه‌خت ئه‌ڕامان خه‌نستياد ئه‌را ئه‌وه‌گ خوه‌شبه‌خت بويم و وه‌رز زمسانمان هجه‌يگ بوى ئه‌رامان ئه‌را ئه‌وه‌گ جنگ تازه‌و گرانقيمه‌ت له‌وه‌ر بكه‌يم، وه‌لى رووژه‌يليگ له‌ناو ڕى كووچكردنيش فه‌قيره‌يلمان رخيان له‌و وه‌رزه‌ چى و له‌و ديمه‌يل جوانه‌ ك وه‌فر وه‌ ڕه‌نگ چه‌رمگى پووشاوێده‌ى، ئمجا هه‌ر وه‌ختى چه‌و واز بكه‌يم له‌ رووژيگ تازه‌ دوينيم ك دويه‌كه‌مان جوور سوومانه‌ وه‌بى جياوازى.

ئمڕوويش ئۆرپيه‌يل وه‌ ئقسات ئارام، بوونه‌ سه‌رپه‌رشيار و ئه‌ولياى نه‌وه‌يلمان، چوينكه‌ ئه‌وه‌گ له‌ليمان بچێد دى هوير له‌ گله‌وخواردن ناكا، ئى باجيشه‌ ئيمه‌ ئه‌را پيشوازيكردن له‌ليمان ئيمه‌ ئه‌يه‌يمنه‌ى و ناوچه‌يل كفاح و باب شێخ و جادى فلستين و جه‌ميله‌و عتێفيه‌و حه‌يولئه‌كراد..هتد چه‌ن جار شايه‌ت سه‌رده‌م بوينه‌ له‌بان دواره‌ كووچ وه‌پيكردنمان له‌ى وڵاته‌ ك خريا فه‌رهه‌نگ ئه‌وانه‌گ وه‌ مه‌يل خوه‌يان و له‌ خوسه‌ هيشتنه‌ى جى وه‌ له‌ڕى مه‌له‌ و به‌له‌م و يه‌خت و ريكردن وه‌پا، ئمڕوويش كووچكردن بويه‌سه‌ ئه‌و كاره‌ ك هوير مه‌ردمان فريه‌يگ له‌ليمان كه‌فته‌سه‌ لاى و ئى كووچكردنه‌ ملينيه‌ ك له‌ خوه‌رهه‌ڵات ناوين روى ئه‌ياد دريژه‌ده‌ر ئه‌و كووچ وه‌پيكردن زووره‌ملى و ته‌وعى و ئاشكرا و نائاشكراسه‌و ئاقبه‌تيش وه‌رده‌وامى هه‌مان زوڵم و سته‌مكارى فه‌رمانڕه‌وايه‌يله‌ له‌بان هه‌مان ريڕه‌و.

خواستم حكايه‌ت يه‌كيگ له‌ گه‌وراساڵه‌يلمان دوباره‌وه‌ بكه‌م ك ئه‌ويش ره‌حمه‌تى محه‌مه‌د دارا فه‌يلى نويسه‌ و شاعره‌ له‌وه‌ختيگ ك لايه‌نه‌يل ناكووك له‌ شوون رميان رژيم كيشه‌گه‌مان گرتنه‌ خوه‌يان وه‌ل ده‌رچگن بريگ ياساو بڕياره‌يل ك بايه‌س بوى له‌ به‌رژه‌وه‌ندى ئيمه‌ بوياتاد، ئمجا ره‌حمه‌تى له‌و وه‌خته‌ گه‌شبين نه‌وى و وت"من يه‌كيگم له‌ قوربانيه‌يل حكايه‌ت ئشق له‌ كويچه‌ى باب شێخ" ك رووژيگ له‌رووژان له‌ناو يه‌كيگ له‌ كويچه‌يلى تويشم بويه‌ تويش كويه‌نه‌‌ فرووشيگ ك بانگه‌واز چشتفرووشى كردياد و هه‌ناى ره‌سيمه‌ هه‌نازى وتمه‌پى"ئه‌ى كويه‌نه‌ فرووش دڵ ئاشقيگ زيمدار سينێد؟". ئمجا ئه‌گه‌ر حكومه‌ته‌يل يه‌ك له‌شوون يه‌ك له‌ عراق تووزيگ ئحساس بياشتان له‌باوه‌ت مه‌ينه‌تيه‌يل پيكهاته‌گه‌مان، نه‌بايه‌د زوڵمى بكرديان ئه‌را ئه‌وه‌گ جاريگتر بريار ده‌ربكريه‌ێد ئه‌را لاوردن ئه‌و زوڵمه‌ له‌بانيان.

ساڵه‌يليگه‌ ك دويه‌كه‌و سوو خه‌ڵه‌تنێده‌مان، يه‌كه‌ميان وه‌ يادگاريه‌يل و دويه‌ميان وه‌ واده‌يلى، به‌شمانيش ها له‌شان نيشانه‌ى هه‌ڵه‌بجه‌ى شه‌هيد"عومه‌ر خاوه‌ر، ئيمه‌يش جوور ئه‌ويم، وه‌لى ئيمه‌ له‌به‌غدا "عه‌لى خاوه‌ر" ديرێم ك شه‌هيديگه‌ بى نيشانه‌و ناونيشان، ئمجا له‌شان ره‌سم "ئالان كورد"ئه‌ومناڵ خنكياگه‌ ك وژان جه‌هان هاورده‌ له‌رزه‌، دو مناڵ تر فه‌يلى هه‌ن ك ئه‌وانيش "حه‌يده‌ر و زه‌ينه‌ب"ن، هه‌ر وه‌و خاتريشه‌ پايزمانيش پڕه‌ له‌ى راسيه‌يله‌و له‌يرا ئه‌خوازيم ئاماژه‌ وه‌ ئه‌وه‌ بكه‌يم ك هه‌ردوگ حكومه‌ت له‌ به‌غدا و هه‌ولێر پرسه‌و سه‌ره‌خوه‌شى له‌ خيزان ئالان كردن، يه‌يش مافيگ سروشتيه‌، وه‌لى هه‌ردوكيان له‌ هويريان چى و له‌هوير خوه‌يان بردنه‌ى له‌ چ وه‌خت و شوونيگ قوربانيه‌يل كه‌فتنه‌و، له‌ناونيانيش كورده‌يل فه‌يلى.

عه‌لى حسێن فه‌يلى