چه‌واشه‌كردن هویردارى وله‌ناوبردن ڕووشنهویرى له‌عراق ئه‌ڕاچه‌؟

شفق نيوز

عراقى وه‌گووره‌ى زوانه‌یل و شیوه‌زوانه‌یلى كه‌فته‌ وه‌رچه‌و، وه‌تایبه‌ت له‌به‌غداى پایته‌خت، ئمجا رووشنهویره‌یل فره‌یگ  ده‌ركه‌فتن و خزمه‌ت وه‌ ڕووشنهویرى عراقى كردن وه‌بى وه‌رانوه‌ر، به‌ڵكوو هه‌ر له‌بان ئازایه‌تى و هه‌وڵ وته‌قلاى خوه‌یان خزمه‌ت گه‌ورایگ  ره‌ساننه‌ ملله‌ت عراق و له‌وانه‌یش كورد و عه‌ره‌ب و توركمان و سریانى و كلدان و سابئه‌ى مه‌ندائى.

دویاى وه‌رگرتن ده‌سڵات له‌لایه‌ن حزب به‌عسه‌وه‌، ئه‌وه‌ بوى مه‌یدان رووشنهویرى كه‌فته‌ ده‌س نه‌فامه‌یل و گشت وه‌زعیگ  له‌ خاوه‌ن ئه‌قڵ و دانایه‌یل شیویاو ڕووشنهویرى عراقى ته‌نیا له‌یه‌ك حزبه‌وه‌ سه‌رچه‌وه‌ گرت و گشت نویسانن و باوه‌ته‌یلیگ  ته‌نیا له‌چوارچیوه‌ى قسه‌یل سه‌دام دكتاتۆره‌وه‌ بوى و رووشنهویر ڕه‌سه‌ن عراقیش بار خوه‌یان پیچانه‌وه‌و روى كردنه‌ وڵاته‌یل ئۆرپاو ئه‌مریكاو ئوسترالیا، یه‌یش له‌شوون ئه‌وه‌ك گشت ئازادییگ  له‌لى قه‌یه‌غه‌ كریاو مه‌ینه‌تیه‌یلى زیاتره‌و بوى و دى ڕووشنهویر نه‌تویه‌نست له‌باوه‌ت كیشه‌و گرفت و هه‌وه‌جه‌یل بنویسیگ  و ڕووشنهویرى خوه‌ى ئه‌را كوومه‌ڵگا ده‌رخه‌یگ  وه‌سه‌به‌ب نه‌وین هووكاره‌یل پشتگیرى و ئاسانكارى ئه‌ڕاى ، وه‌و مه‌عنا ك هویچ هه‌قیگ  له‌ئازادى هویره‌وكردن و گوزارش و په‌یوه‌سبوین سیاسى و فكرى و ئایدۆلۆجى وه‌پى نه‌دریا.

ئیسه‌یش ئه‌وه‌سه‌ ڕووشنهویرى عراقى جویر ئه‌وسا وه‌مه‌ویسى راسه‌قینه‌یگ  ژیه‌یگ  و تویش پاماڵكردن تازه‌یگ  تیه‌یگ  ، ئه‌ویش له‌ناونى ده‌ور رووشنهویرى راسه‌قینه‌و به‌رژه‌وه‌ندیه‌یل چین سیاسى و حزبى وه‌رته‌نگ  ك گه‌ردنه‌ شوون دعایه‌كردن و ئامانج و تاریفكردن و ریڕه‌و خوه‌یان. دى ئه‌وه‌سه‌ هویچ ڕووشنهویریگ  خاس و خاوه‌ن ئه‌قڵ نیه‌تویه‌نیگ  ڕه‌خنه‌ له‌لایه‌نیگ  سیاسى و ده‌سڵاتدار بگریگ  و له‌وه‌ ترسیه‌یگ  كووتا وه‌ژیانى بارن، ئمجا هه‌ر له‌وه‌ر ئه‌وه‌یش ڕووشنهویرى عراقى شماره‌ى فره‌یگ  له‌ ڕووشنهویر و شاره‌زاو ئه‌كادیمى و ڕووژنامه‌نویس و ڕه‌ساننكار له‌ده‌س خوه‌ى داو كاروانیگ  له‌شه‌هیده‌یل كرده‌ قوربانى و ئه‌وه‌سه‌ ڕووشنهویرى عراقى جویر شه‌م یا موومیگ  وه‌رگه‌ى تیه‌ریكى نیه‌گریگ  له‌ى سه‌رده‌م تازه‌و هه‌ر وه‌دڵ ئه‌نقه‌ز له‌لایه‌ن حكوومه‌ت عراق و هیزه‌یل سیاسى دویاكه‌فتگه‌وه‌ سه‌ركوت كریه‌یگ .