كه‌مى ژن له‌پایه‌ى سیاسى و رووژنامه‌گه‌رى

شفق نيوز

  ژن ئه‌و دروسكریاگه‌سه‌ ك ئه‌تویه‌نید شوونده‌سى له‌گشت به‌شه‌یل ژیان نیشان بیه‌ید له‌گشت وه‌خت و شوونیگ ، ژیان هه‌وه‌جه‌ وه‌ هس و جوانى و میهره‌بانى ژن دیرید، ژیان ته‌نیا ئه‌وه‌ نیه‌ دویر له‌ هس بچووده‌ رییه‌و، چوینكه‌ له‌ى حاڵه‌ته‌ ژیان له‌ جموجویل وسیه‌ید و سووز و میهره‌بانیه‌گه‌ى گوم بوودو سه‌رتاپاى ژیان نقوم بى رووحى بوودو دونیا بووده‌ لاشه‌یگ بى رووح.

بیگومان ژن جموجویل و رووح ژیانه‌، ك هه‌رچه‌نى له‌ شانیه‌تى كه‌مه‌و بكریه‌ید، وه‌لى گه‌ورایى ژن هه‌ر له‌ جویله‌ ناكه‌فیدو گشتمان هس وه‌و راسیه‌ ئه‌كه‌یم، وه‌لى غروورى كوشته‌سه‌مان و ناتویه‌نیم دگان وه‌پیا بنه‌یم و بویشیم ژن هیزه‌ ئه‌را ژیان.

ژن ده‌ریایگه‌ له‌ میهره‌بانى و فریه‌یش وه‌ ئاشكرا ئویشیم ژن له‌گشت شوون و له‌گشت وه‌ختیگ وجوود خواسته‌، ئنجا هه‌ر له‌سه‌ره‌تاى وجوود ئاده‌میزاده‌و تائیسه‌ ژن ئسپات گه‌ورایى خوه‌ى كردگه‌ له‌ پایه‌یل جیاجیاى ژیان، وه‌لى جى داخه‌ له‌ سه‌ره‌تاوه‌ له‌یوا بویه‌ ك وه‌رده‌وام ریگرى له‌لیان بكریه‌ید و رى وه‌پیان نه‌دریاگه‌ جوور خواست نه‌خش خوه‌یان بوینن.

له‌ناو ملله‌ته‌یل خوه‌مان ئه‌و ریگریكردنه‌ له‌ژن فریه‌ ساده‌ن، وه‌لى فریه‌یش كاریگه‌رن و شوونیان فریه‌س له‌ بوار سیاسى، وه‌لى ریگه‌داینیان ئه‌را ده‌سڵات باڵاو ناوه‌ند بڕیار زه‌حمه‌ت و سه‌خته‌، چوینكه‌ تائیسه‌یش باوه‌ڕ كه‌مه‌ وه‌ توانایه‌یل ژن له‌ناو ئى ملله‌ته‌، وه‌لى ئه‌یه‌ ته‌نیا گوناى ره‌گه‌ز وه‌رانوه‌ر نیه‌ وه‌ته‌نیا، بیگومان ژنیش تاوان له‌تى دیرید، ك ئه‌ویش كه‌مى ئیراده‌و ترسه‌ له‌ چشته‌یلیگ ك هه‌وه‌جه‌ نه‌یرید سڵ له‌لیان بكریه‌ید.

بیجگه‌ بوار سیاسىن ئه‌و شوونیشه‌ ك بایه‌سه‌ ژن وجوود له‌تى داشتوود ك ئیسه‌ له‌ناو ملله‌ت ئیمه‌ ژن كه‌م له‌تى دیاره‌، ئه‌ویش بوار رووژنامه‌گه‌رى و نویساننه‌، ك نازانیم له‌وه‌رچه‌ ژنه‌یل ئیمه‌ سڵ له‌ى بواره‌ ئه‌كه‌ن و ناتویه‌نن وجوود داشتوون جوور خواست؟ یا دوینید ئه‌گه‌ریش وجوود داشتوون ته‌نیا جوور كه‌سایه‌تییگ ساده‌ مامڵه‌ كریه‌ن و فریه‌یش وه‌ كه‌مى قه‌ڵه‌م و كه‌سایه‌تى ژن كه‌فیده‌ وه‌رچه‌ومان له‌ى بواره‌.

بیگومان ئه‌یه‌ خوه‌ى له‌خوه‌ى كه‌مته‌رخه‌مى ژنه‌و خودئسپاتكردن ژن كار خواستیگه‌ له‌ بواره‌یل ژیان، هه‌ر له‌وه‌ر ئه‌وه‌یش هه‌وه‌جه‌ وه‌ ئه‌وه‌ نه‌یرید ژن هه‌میشه‌ خوه‌ى وه‌ ماڵ و ته‌قلیدكردن و ژیان خیزانى و جوانى دونیاو جنگ گرانقیمه‌ت خه‌ریك بكا، به‌ڵكوو بایه‌سه‌ له‌و مه‌رزه‌ بایده‌ ده‌ر و هیز خوه‌ى باریده‌ كار بتویه‌نید بووده‌ سیاسه‌تمه‌دار و رووژنامه‌نویس خاس له‌ناو كوومه‌ڵگاگه‌ى وه‌بى ترس و دویرگرتن و یتوه‌ینید وجوود خوه‌ى ئسپات بكا.

گۆنا محێدین

ج . أ