سه‌ره‌تاى په‌یابوین شار له‌ كوردستان

شفق نيوز

  دیاره‌ وشه‌ى شار له‌ناو مه‌ردم كوومه‌ڵگا وه‌و شوونه‌ تاریف كریاگه‌ ك ژیان له‌تى جیاوازه‌ وه‌ به‌راورد وه‌ل ژیان ده‌یشت نشین و ئاوایه‌یل، سروشت ژیان له‌ ناو شاره‌یل دویاى سه‌رهه‌ڵداین وجوود ئنسانیه‌ت له‌ ئاوایه‌یل سه‌رهه‌ڵداگه‌، یه‌یش وه‌و مانا ك یه‌كه‌مجار له‌تاریخ ئنسانیه‌ت ژیان له‌ ئاواییه‌و ده‌س وه‌پیكردگه‌و دویاخر وه‌ گووره‌ى ئاڵشتبوین چه‌رخ شاریش په‌یا بویه‌و مه‌ردم له‌تى نیشته‌جى بوینه‌، وه‌لى هه‌میشه‌ وه‌ دریژایه‌ رووژگار مه‌ردم ده‌یشت نشین سه‌رچه‌وه‌ى كشتوكاڵى و دابینكردن هه‌وه‌جه‌یل فریه‌یگ خوارده‌مه‌نى و سه‌وزى و میوه‌و به‌رهه‌مه‌یل جوراوجوور بوینه‌و خه‌ڵك شار نه‌ف له‌لى وه‌رگرتنه‌

ماناى ئه‌وه‌سه‌ ئاده‌میزاد ده‌یشته‌كى سه‌رچه‌وه‌ى دابینكردن ژیان ئاده‌میزاد شارنشین بوینه‌و هه‌میشه‌ ره‌نجده‌ر و جه‌فاكیش بوینه‌ له‌ بواره‌یل جفتیارى و ئاویارى و ئمایه‌تكردن په‌س و پوڵه‌ وه‌خاتر وه‌رده‌وامیداین وه‌ بار ژیان و گوزران خوه‌ى و مه‌ردم ده‌وروه‌رى.

ئیمه‌ ئه‌گه‌ر ته‌ماشاى تاریخ سه‌رهه‌ڵداین سه‌ره‌تاى په‌یابوین شار بكه‌یم له‌ كوردستان، توینیم بویشیم سه‌ره‌تاى كویه‌نیگه‌ وه‌ گووره‌ى تاریخ بڕیگ له‌و شاره‌یل كوردستانیه‌ ك تاریخ له‌ ناو لاپه‌ڕه‌یلى باسین كردگه‌.

عه‌بدوڵڵا غه‌فور له‌ كتاو"جوگرافیاى كوردستان" ئه‌وه‌ ده‌رخستگه‌ ك سه‌ره‌تاى په‌یابوین شار له‌ كوردستان چووده‌و ئه‌را سه‌رده‌یل سێیه‌م و چواره‌م وه‌رجه‌ زایین، هه‌ر له‌وه‌ر ئه‌وه‌یش ئاماژه‌ وه‌ شاره‌یل" ئه‌ربائیلۆ – ئه‌ربیل – هه‌ولێر" و " ئه‌رابخا – كه‌ركووك" كردگه‌.

بیگومان شار هه‌ولێر هه‌ولێر یه‌كیگه‌ له‌و شاره‌یل كویه‌ن تاریخى جه‌هانه‌ له‌ وڵات كورده‌یل، ك نه‌ك ته‌نیا جوور ناوه‌ندیگ شارستانى و تا ڕاده‌یگ جوور گه‌وراترین شار باشوور خوه‌رئاواى ئاسیا بمینید تا رووژگاره‌یل فریه‌یگ ، به‌ڵكوو له‌هه‌مان وه‌خت مقه‌یه‌تى له‌ سه‌نگ و ستراتیجیه‌ت و ناوه‌گه‌ى خوه‌یشى كرد له‌وه‌ختیگ شاره‌یل هاوشیوه‌ى بوینه‌ كه‌لاوه‌و ته‌نیا شوونه‌وار كه‌میگ له‌لى مه‌ندگه‌.

شار هه‌ولێر له‌ڕوى بازرگانى و ستراتیجیه‌ت گرینگى خاسیگ داشت و تاریخ ئسپات ئه‌وه‌ كردگه‌ ك ڕى ئه‌وریشم تایبه‌تمه‌ندى فریه‌یگ داشتگه‌ له‌ڕوى بازرگانى و هامشووكردن بازرگانه‌یل بیگانه‌و هه‌میشه‌ شوون وچانداین و ئاڵشت و ئوڵشت بازرگانى بویه‌و ته‌نانه‌ت گه‌شتكه‌ره‌یل بیگانه‌ چه‌نه‌ها سه‌ده‌ وه‌رجه‌ ئیسه‌ باس له‌ ڕى ئه‌وریشم كوردستان كردنه‌، ك مه‌رام له‌لى ده‌یشت هه‌ریره‌.

ره‌زا گه‌رمیانى