يه‌كه‌م رووژ نيسان و كوليانه‌وه‌ی زه‌خم فه‌يليه‌يل

شفق نيوز

 

له‌ڕاسی رووژ ١ نيسان كوليانه‌وه‌ی زه‌خم فه‌يليه‌يل و یادگارى ناخوه‌ش و تیه‌ڵيگه‌‌، ك پڕه‌‌ له‌ خه‌م و حه‌سره‌ت كاڵ، له‌و رووژه‌ ئه‌و ناوچه‌يله‌ ك كورده‌يل فه‌يلی له‌تی ده‌ركريا بويه‌ پرسه‌خانه‌و كوته‌ڵكوو، چوينكه‌ وه‌ پای په‌تی و ده‌س به‌تاڵ بريان وه‌ره‌و چوڵه‌وانى مه‌رگ و ڕيه‌يل هات ونه‌هات.

كورده‌يل فه‌یلى ئه‌و مه‌ردم بی تاوان و بی كيشه‌و گرفته‌ بوين ك تاوان فريه‌يگ ده‌رهه‌قيان ئه‌نجام درياو رژیم به‌عس ده‌رده‌سه‌رى فريه‌يگ هاورده‌ تويشيان و هويچ لايه‌ن و ريكخرياگيگ ناوده‌وڵه‌تی هه‌رێمی و ناوده‌وڵه‌تييش دڵ ئه‌رايان نه‌كره‌ خه‌م.

ئی پيكهاته‌ هه‌رچه‌نی له‌ ٢٩/ ١١/ ٢٠١٠ له‌لايه‌ن دادگای باڵای تاوانه‌يليش كيشه‌گه‌يان وه‌ جينۆسايد ناسريا، وه‌لی هيمان تا ئيسه‌يش وه‌ هه‌قه‌يل زه‌فتكرياگ خوه‌يان نه‌ڕسه‌ينه‌و هيمان مه‌ردم فريه‌يگيش له‌ليان له‌ ولاَته‌يل غوربه‌ت ژيان كوڵه‌مه‌رگی به‌نه‌ سه‌ر.

٣٤ ساڵه‌ كورده‌يل فه‌يلی چه‌وه‌ڕی هه‌ڵاتن ئاسوو خوه‌شبه‌ختی كه‌ن، وه‌لی دياره‌ هيمان ناهه‌قی فريه‌يگ له‌ی وڵاته‌ وجوود ديريد و ئوميد و ئه‌زره‌ته‌يل ده‌يه‌ها ساڵه‌يل پڕ له‌ ناڕه‌حه‌تی و به‌دبه‌ختی دويره‌ له‌ وه‌ديهاتن و ئه‌و قه‌وڵه‌يله‌ ك وه‌پيان دريا ناهمی و خاكه‌سار بوود!! يه‌يش له‌ ئاكام سته‌م و زوڵم تازه‌ی ده‌سڵات و وه‌رپرسه‌يل كه‌مته‌رخه‌م و بيبه‌زيی ئی ولاَته‌سه‌.

ئمجا له‌يرا پرسيار ئه‌وه‌ كه‌يم و ئويشيم: تاكه‌ی هه‌ق كورده‌يل فه‌يلی فه‌رامووش ئه‌كريه‌يد؟ تاكه‌ی ئی حكوومه‌ته‌ دريژه‌ وه‌ی زوڵم و سته‌مه‌ ئه‌ياد؟ ئه‌ی خوين روڵه‌يل فه‌يلی وه‌ تاڵان بچوود؟ نه‌خه‌ير ئه‌وه‌گ له‌ی زوڵمه‌ به‌شداره‌ هاوشيوه‌ی جه‌لاده‌يل به‌عسه‌و نه‌بايه‌د ڕی وه‌پی بدريه‌يد سه‌نگ و قورسايی خوه‌ی نيشان بيه‌يدو چه‌وسيان كورد فه‌يلی قه‌وان كويه‌نه‌يگ بوود له‌لای و گووش له‌لی نه‌گريد.

وه‌لی خود كورده‌يل فه‌يلييش بايه‌سه‌ ئه‌وه‌ بزانن ك ته‌نيا خوه‌يان خه‌مخوه‌ر خوه‌يانن، ئه‌ويش هووكاره‌گه‌ی ديار و ئاشكراس ك ئمڕوو له‌ی وڵاته‌ هويچ حزب و لايه‌نيگ خه‌م كه‌س ناخوه‌ن و ناكه‌فنه‌ شوون هوير ئنسانيه‌ت و چاره‌سه‌ركردن كيشه‌ی ليقه‌ومياگه‌يل و ته‌نيا هانه‌ هووڵ وه‌ده‌سهاوردن پله‌و پويل و پايه‌و به‌رژه‌وه‌ندی باڵای ملله‌ت خستنه‌سه‌ كنار و ته‌نيا له‌ رووژ هه‌ڵوژاردنه‌يل بوونه‌ خه‌مخوه‌ر ملله‌ت!  

جه‌ماڵ ئه‌ركه‌وازى