وه‌هار داعش

شفق نيوز

به‌عس ده‌ره‌قه‌ت شووڕش ئه‌يلوول نات و ده‌س خسته‌ ناو ده‌س شای ئيران تا ته‌وق بخاده‌ گه‌ردن كوردستان، به‌عس ئه‌يه‌ له‌ وه‌هار كرد، جاريگ تريش هه‌ر به‌عس ده‌ره‌قه‌ت شووڕش تازه‌ نات و له‌ داخا ده‌سكرده‌ سزانن ئاوايه‌يل ئازادكرياگ ك جوور ده‌ريا بوين ئه‌را وه‌ زينگ مه‌ندنه‌وه‌ی ماسيه‌گه‌ی شووڕش، يه‌يش هه‌ر كه‌ڵك نه‌ياشت، هه‌ر وه‌و خاتريشه‌ له‌ وه‌هار كيمياوارانمان كرد.

داعش ك له‌ مه‌يدان ئازايه‌تی كه‌ركووك و كۆبانی ده‌س وه‌پی دريا، ئيسه‌ هاتگه‌ له‌ وه‌هار ديله‌يل جه‌نگ سه‌ربڕيد. وه‌رجه‌ خلافه‌ت ئه‌بو به‌كر به‌غدادی، خلافه‌ته‌يل تر خوازيار ئه‌وه‌ بوين بويشن نه‌ورووز بدعه‌ی مه‌جووسه‌، وه‌لی هه‌نای ك زانستن باج و خه‌راج ئه‌رايان ئه‌يه‌ريد له‌لی بيده‌نگ بوين، ئه‌وه‌سه‌ خه‌لافه‌ت يه‌زيد و معاويه‌ نه‌مه‌ند، موسڵمانه‌يل و نه‌ورووزه‌يليان هه‌ر جوور خوه‌يه.

داعش له‌يوا هويره‌و ئه‌كا داهێنان كردنه‌ له‌ ئه‌زيه‌تداين كورد، وه‌هاره‌يل كورد گشتی ئازار و مه‌ينه‌تيه‌، هه‌ر گوڵيگ ئه‌ميد وه‌ سه‌د دڕگ كيمياوی و ئه‌نفال ئابڵوقه‌ درياگه‌، دڕگه‌يل نامينن و هه‌ر گوڵ ئه‌ميد مه‌نده‌سه‌و.‌

داعش له‌يوا ئه‌زانيد داهێنان كردگه‌ ك كورد وه‌ده‌س كورد سه‌ربريه‌، وه‌رجه‌ داعش عه‌بدولسه‌لام عارف وتياد"اقتلوا الكاكات بالكاكات"، يه‌يش وه‌و مانا ك كاكه‌يل وه‌ كاكه‌يل بكوشن. عارف نه‌مه‌ند، وه‌لی كورد و كوردستان مه‌ندگه‌. كوردستان هويچ وه‌ختی وه‌بی جاش داگيركه‌ر نه‌ويه‌و گشت نه‌ته‌وه‌يگيش له‌يوا خراويگ له‌تی هه‌ڵكه‌فيد، وه‌لی پێشمه‌رگه‌ باره‌ وه‌رده‌وامه‌گه‌سه‌و جاشه‌گه‌يش وه‌ختيه‌.

داعش له‌ وه‌هار هان كورد ئه‌ياد هاونه‌ته‌وه‌ی خوه‌ين سه‌ربووڕن، وه‌لی هه‌ر وه‌هار كورد سه‌رئه‌كه‌فيد، له‌ راپه‌ڕين وه‌هار ١٩٩١يش ری ئاوه‌دانی پێشمه‌رگه‌ سه‌ركه‌فت و جاش كه‌فته‌ شوون كاروان رزگاری تا به‌شكه‌م بكه‌فنه‌ وه‌ر وه‌خشينيگ گشتی. داعش چه‌نيگ تازه‌س، ئه‌وه‌نه‌يشه‌ كويه‌نه‌ وه‌ل كوردا، ناويگ تازه‌سه‌ ئه‌را ئازاريگ كويه‌ن ك وه‌خت بڕينی هاتگه‌.

ستران عه‌بدوڵڵا‌ ‌

ج . أ