چشت تازه‌ له‌حكوومه‌ت تازه‌ نیه‌

شفق نيوز

حكوومه‌ت، دویاخر ڕه‌زامه‌ندى دریا له‌بان دامه‌زرانن حكوومه‌ت وه‌ سه‌رۆكایه‌تى نورى مالكى، ئه‌ویش وه‌ له‌داڵگبوینیگ  نه‌شته‌رگه‌ریانه‌ى دویاى ته‌واوبوین ئاوه‌له‌مه‌(جنین)، ك وه‌جاریگ  قه‌واره‌یل سیاسى ڕه‌زامه‌نى خوه‌یان نیشاندان له‌شوون كیشمه‌كیش و ناكووكى فره‌یگ.

جویر ئه‌وه‌ك دیاردا، ماوه‌یگ  وه‌رجه‌ دامه‌زرانن حكوومه‌ت، كیشمه‌كیش دڕندانه‌یگ  بوى له‌ناونى هیزه‌یل سیاسى له‌وه‌ر خاتر سه‌ركه‌فتن وه‌گه‌وراترین شماره‌ له‌ پۆسته‌یل باڵا و له‌وه‌رخاتر وزاره‌ته‌یل نه‌ك له‌وه‌رخاتر وڵات و به‌خته‌وه‌رى ملله‌ته‌گه‌یان، گشت ئه‌وانه‌یش هه‌وڵداینیگ  بوى ئه‌را وه‌رگرتن پۆست یا ناوبانگى و پڕكردن گیرفان، ك به‌رژه‌وه‌ندى خوه‌یان خستنه‌ بان گشت چشتیگه‌وه‌.

بیگومان ئى جووره‌ به‌رژه‌وه‌ندى كه‌سایه‌تى وه‌رته‌نگه‌ زه‌ره‌دیگه‌و دریه‌یگ  له‌ ریڕه‌و دیموكراسى عراقى تازه‌و گامیگ  زیاتر نزیكمانه‌و ئه‌كا له‌ تونێل یا نه‌فه‌ق تیه‌ریك و ترسناكیگ  و ده‌رئه‌نجامیشى زه‌ره‌د گه‌ورایگه‌ له‌بان عراقیه‌یل وه‌ره‌و بنیاتناین دیموكراسى ك گشت ئومید و ئاره‌زووه‌یلیان وه‌ تاڵان چووگ. له‌یرا تویه‌نیم بویشیم ئه‌وه‌ك ڕویدا له‌ناونى سیاسیه‌یل گشتى له‌بان هساو ملله‌ت عراق بوى و یه‌یش مه‌عناى ئه‌وه‌سه‌ ك چشت تازه‌ له‌ حكوومه‌ت تازه‌ نیه‌ ته‌نیا ئه‌وه‌ نه‌وگ ك كه‌سایه‌تیه‌یل حزبى ڕه‌سینه‌ مه‌رام خوه‌یان له‌حوكم و ئه‌وه‌ك تائیسه‌ ڕویدا له‌و گویڕانكاریه‌ له‌ حكوومه‌ت تازه‌ ته‌نیا ئاڵشتبوین شماره‌ى كه‌میگ  بوى له‌ وه‌زیره‌یل، وه‌لى ئه‌واكانتر هه‌مان ئه‌ندام حكوومه‌ت وه‌رینن ك گه‌ناته‌كارى فره‌یگ  كردن له‌ده‌زگاو وزاره‌ته‌یلیان، دى هویچ جیاوازییگ  نیه‌ له‌و جنگه‌یله‌و ته‌نیا له‌ده‌یشته‌وه‌ نه‌وگ ك وه‌ مه‌چیر دیموكراسى دویریاگه‌، یه‌یش مه‌عناى ئه‌وه‌سه‌ مادام هه‌مان ئه‌و ئه‌ندامه‌یله‌ مه‌ندنه‌ گه‌ناته‌كارییش هه‌ر مینیگ ، ئى دیارده‌یشه‌ زیاتر نیگه‌رانى له‌لى كه‌فیگه‌وه‌، چوینكه‌ ده‌سنیشانكردن كه‌سایه‌تیه‌یل له‌بان شاره‌زایى و توانایى نه‌ویه‌و دوباره‌ هه‌مان ئه‌و وه‌زیره‌یله‌ هه‌ڵوژریانه‌ ك سه‌ر وه‌فڵات تایفه‌و فڵان ئه‌شره‌ت و حزبن، یه‌یش له‌وه‌ختیگ  ك حكوومه‌ت تازه‌ ڕوى وه‌ڕوى سه‌ختیه‌یل فره‌یگ  بووگه‌وه‌ زیاتر له‌جاران.

ئمجا ئایا حكوومه‌ت تازه‌ تویه‌نیگ  ئاره‌زووه‌یل ملله‌ت زوڵملیكریاگ باریگه‌ دى و چاره‌سه‌ر غه‌ڵه‌ته‌یل حكوومه‌ت وه‌رین بكاو دوباره‌ى ئه‌و غه‌ڵه‌ته‌یله‌ نه‌كا؟ یا تویه‌نیگ  ئسپات توانایى خوه‌ى بكا ئه‌را جاده‌ى عراقى و ڕاى گشتى عراقى وه‌ ئه‌وه‌ك ئاست گوزران هاووڵاتیه‌یل خاستره‌و بووگ؟ جواو ئى پرسیاره‌ سه‌خته‌و نیه‌تویه‌نیم بڕیار به‌یم و بویشیم به‌ڵى، چوینكه‌ ئى كاره‌ هه‌وه‌جه‌ وه‌ سه‌ركرده‌یل ده‌سپاك و دڵسووز دیریگ  ك كار خوه‌یان وه‌ ته‌واوى بزانن.