ژنخوازين و دويرگرتن له‌ دووس و براده‌ر

شفق نيوز

  ئيمه‌ زانيم ك ژيان و دونيای ئاده‌ميزاد په‌يوه‌سه‌ وه‌ ريكخستن و گه‌رمكرن و وه‌رده‌واميداين وه‌ په‌يوه‌نديه‌يل كوومه‌ڵايه‌تی و ده‌سكه‌فت ته‌نيايی و كنارگرتن ئه‌را ئاده‌ميزاد جوور ئه‌ور بی وارانيگه‌ ك تا راده‌ی فريه‌يگ مايه‌ی دڵخوه‌شی نيه‌و له‌چوارچيوه‌ی سفه‌ته‌يل كه‌م و كوڕی شماريه‌يد.

وه‌سه‌ربردن وه‌خت و په‌ره‌داين وه‌ ژيان، هه‌وه‌جه‌ وه‌ وجوود كه‌سه‌يل تريش ديريد له‌ژياند و نه‌بايه‌د وه‌ته‌نيا هويره‌و بكه‌يد و ته‌نيا بنيشيد و خه‌م و خوه‌شيه‌يلد هه‌ر وه‌ته‌نيا بوون، چوينكه‌ په‌ند كورده‌واری خوه‌مان ئويشيد"ته‌نيايی هه‌ر ئه‌را خودا خوه‌شه‌".

ئاگاداريم له‌وه‌ك زوورم ئاده‌ميزاده‌يل خه‌ڵوه‌ت و خه‌ڵوه‌نشينی وه‌پيان خوه‌ش و دڵگيره‌، وه‌لی يه‌يش مانای ئه‌وه‌ نيه‌ ك پيه‌ڵ سرات له‌ناونيمان بوود و نه‌تويه‌نيم له‌ليه‌و گوزه‌ر بكه‌يم و ترس كه‌فتن له‌لی داشتويم و دوياخريش به‌ن په‌يوه‌نديه‌يلمان بوڕيم و ته‌كان بيه‌يم وه‌ره‌و ژيان ته‌نيايی.

دياره‌ گشت كه‌سيگ له‌ژيان، وه‌ قوناغه‌يل جياجياو عومر جياجيايگه‌و گوزه‌ر ئه‌كاو له‌ هه‌ر قوناغيگی بڕيگ يادگاری وه‌ل خوه‌يا ئه‌ڵگرتگه‌ تا ره‌سيه‌سه‌ قوناغ هاوسه‌رگيری، وه‌لی له‌يرا له‌ قوناغ تازه‌و چگن وه‌ناو دونيای هاوسه‌ری و ئالَشتبوين شيواز ژيانی، نوڕيد كه‌سه‌يليگ هه‌ن به‌ر ئه‌و تويه‌مه‌ په‌يوه‌نديه‌ ك وه‌شاننه‌سه‌ی نيه‌چننه‌و(خه‌رمان به‌ره‌كه‌ت)يان ده‌نه‌ ده‌م وه‌شت سيه‌سام و شه‌ن ته‌نيايی ئه‌رای تيه‌رنه‌ كار له‌ بياوان بی ئوميدی.

دار بی لق و پوو، سيوه‌ری كه‌مه‌و وه‌ڵگه‌يل ره‌نگ زه‌ردی چه‌پڵه‌ ئه‌را سه‌مای مه‌له‌ جوانه‌گان نيه‌كوتن و كاسن له‌ ژنه‌فتن ئاواز پڕ چريكه‌ی قومری و بوڵبوڵه‌يل. چه‌تر سيه‌ماڵ گووشه‌ كناريش هه‌رچه‌نی وه‌ ميخ قوڕافته‌دار دامه‌زرياگه‌و چه‌نی ته‌نافی له‌ ره‌سه‌ن و به‌ن ئه‌وريشم بوود‌، وه‌لی وه‌رده‌وام كه‌فيده‌ وه‌ر هه‌ڕه‌شه‌ی گه‌رده‌لويل و تويڕه‌يی شيته‌وای له‌ناكاو هه‌ڵكردگ.

دی مانای ئه‌وه‌سه‌ ده‌ووڵ وزوڕنای شادی و زه‌وق و زينه‌ت، ئه‌زره‌ت ديده‌ن ده‌سه‌جه‌می و شاوازكيشان هاوكوڕی و ئه‌زره‌ت سه‌رچوپی دووس و ئه‌زيزه‌يله‌. ئنجا له‌يرا مه‌رام باوه‌ته‌گه‌مان ئاشكراو دياره‌ ئه‌را ئه‌وانه‌گ چنه‌ ناو ژيان هاوسه‌رگيری، ك نوڕيد هه‌ر له‌سه‌ره‌تای په‌يوه‌سبوين وه‌و ژيان هاوسه‌رگيريه‌ يه‌كسه‌ر گشت ره‌فيق و هاوكوڕه‌يل خوه‌ی له‌ده‌س ئه‌ياد و جوور جاران وه‌ڕوی ناز و خوه‌شه‌ويسيه‌و پيشوازی له‌ليان ناكاو ئه‌و هه‌مگه‌ ساڵ وه‌يه‌كه‌وژيان و خوه‌شگوزه‌ريه‌ كه‌نه‌ قوربان دويرگرتن و له‌هويره‌وبردن؟

ژنخوازين و دويرگرتن له‌ دووس و براده‌ر هاته‌سه‌ تويش كه‌سه‌يل فريه‌يگ، ك تويه‌نيم بويشيم ئی نه‌ريته‌ ك ئيسه‌ جايه‌ڵ جوانه‌يل په‌يڕه‌وی ئه‌كه‌ن جياوازی فريه‌يگ ديريد وه‌ل سه‌رده‌م زويتر كوومه‌ڵايه‌تی، هه‌ر له‌وه‌ر ئه‌وه‌يش دياره‌ سه‌رده‌م ئيسه‌ بويه‌سه‌ جی نامتمانه‌يی و ره‌فيقايه‌تی له‌تی وه‌ جووريگه‌ ك له‌هه‌ر حاڵه‌تيگ جوور ته‌ڵاقدرياگ وه‌پی ئه‌يادو قه‌درو حورمه‌ت ئه‌و چه‌ن ساڵه‌يل براده‌ريه‌ وه‌ تاڵان چوود.

ره‌نجده‌ر مامنه‌يی

ج . أ