ئه‌وه‌ك وه‌بارزانى نه‌مر سه‌رسام نه‌وگ خه‌وه‌ر له‌تاریخ نه‌یریگ

شفق نيوز

بارزانى؟) منیش له‌جواو ئه‌و دووسمه‌ ئویشم: ئه‌وه‌ك وه‌ بارزانى نه‌مر سارسام نه‌وگ له‌تاریخ خه‌وه‌ر نه‌یریگ ، ئه‌وه‌یش له‌تاریخ بى ئاگاس خوه‌ى گوم كردگه‌، ئه‌وه‌یش خوه‌ى گوم كردویگ  مل وه‌ره‌و ڕى كوورانه‌ نه‌یگ ، من وه‌ ریكه‌فت یا سودفه‌ وه‌ بارزانى نه‌مر سه‌رسام نه‌ویم، ئه‌و سه‌رسامیه‌ یا ئعجابه‌ له‌ ده‌رسه‌یل تاریخ یاى گرتم و له‌وه‌یش ته‌نیا نیم.

تن له‌لیم پرسید ئه‌ڕاچه‌ وه‌ بارزانى نه‌مر سارسامم، ئه‌ى ئه‌ڕاچه‌ له‌ دوشمنه‌یل و داگیركه‌ره‌یل كوردستان نیه‌پرسید! خو ئه‌وان له‌من زیاتر وه‌پى سه‌رسامن، دووس و دوشمنه‌یل كورد له‌هویچ خاڵیگ یه‌كه‌و نیه‌گرن، وه‌لى له‌ سه‌رسامبوین وه‌ بارزانى نه‌مر موى وه‌ به‌ینیانا نیه‌چووگ.

براى خوه‌شه‌ویسم تن وه‌ختى وه‌ بارزانى نه‌مر سه‌رسام نه‌وید! هه‌فت چشته‌ ئه‌ڵڵاجه‌ویه‌گه‌ى جه‌هانیش سه‌رسامد نیه‌كه‌ن. (ڕه‌زم ئارا)ى سه‌رۆك ستاد سوپاى ئیران، ئه‌را خوین كورده‌یل تیه‌نگ بوى، وه‌لى سه‌رسامبوین خوه‌ى وه‌ بارزانى نه‌مر نه‌شارده‌سه‌وه‌، یا تویه‌نیم بویشیم نه‌تویه‌نستگه‌ بشاریگه‌وه‌ى. ئه‌وه‌سه‌ له‌شوون شكه‌ست كوومار كوردستان و هه‌ڵویست وه‌رگرتن بارزانى نه‌مر و ئاڵشتكردن ریڕه‌و رویداگه‌یل ئویشیگ (له‌وساوه‌ له‌شكر شاهنشایى وجوود دیریگ ، وه‌ل دوشمنه‌یلیا ئه‌وه‌نه‌ وه‌ هیزه‌وه‌ جویر بارزانیه‌یل جه‌نگ نه‌كردگه‌) بیجگه‌ ئه‌وه‌یش سه‌رسامبوین وه‌ بارزانى نه‌مر له‌یوا له‌ ئیرانیه‌یل كرد ك سفه‌ت و تایبه‌تمه‌ندیه‌یلى بخوه‌ننه‌وه‌و له‌ ناو له‌شكر خوه‌یان ئه‌را وه‌رگیریكردن له‌خوه‌یان كه‌ڵك له‌لى وه‌ربگرن، وه‌تایبه‌ت هونه‌ره‌ جه‌نگیه‌گه‌ى ریڕه‌وه‌ تاریخیه‌گه‌ى چه‌م ئاراس، هه‌ر له‌وه‌ر ئه‌وه‌یش ئه‌و رویداگ تاریخیه‌ سه‌رسام ئیرانیه‌یل كردو دویاخریش له‌ كۆلیژ سه‌ربازى ته‌هران كریا ده‌رس ئه‌را فه‌رمانده‌یل سه‌ربازى و نه‌ف له‌لى وه‌رگرتن.

ئى سه‌رسامیه‌ نه‌ك هه‌ر ته‌نیا سه‌ركرده‌یل سه‌ربازى دوشمن گرته‌سه‌وه‌، به‌ڵكوو سه‌ركرده‌و سیاسه‌تمه‌داره‌یل كوردیش گرته‌وه‌ جویر دكتۆر(قاسملۆ) له‌كتاو (كوردستان و كورد) ئویشیگ : ئه‌گه‌ر گشت كورده‌یل ئیران ئه‌وه‌نه‌ى بارزانى نه‌مر و بارزانیه‌یل وه‌رگیرى له‌ كوومار بكردیان، ئه‌وه‌ ڕویداگه‌یل چه‌واشه‌ بوین.

سه‌رسامبوین وه‌ بارزانى نه‌مر مه‌رزه‌یل هه‌رێمى په‌زان و ڕیه‌یل دویرى بڕى، (یه‌ڤگین بریماكۆف) ك سیاسه‌تمه‌داریگ ناوده‌وڵه‌تى روسیه‌، له‌كتاو (رووژهه‌ڵات ناوڕاس ئه‌وه‌ك ئاشكراو شاریاگه‌) سه‌رسامى خوه‌ى وه‌رانوه‌ر بارزانى نه‌مر ده‌رخسته‌گه‌و ئویشیگ (تاریخ بارزانى سه‌رسامكه‌ره‌)، یا (میدیڤیدلۆف) گه‌ورا نویسه‌ر ڕووس ئویشیگ (ئه‌گه‌ر له‌لیم بپرسن پیاو سه‌ده‌ كییه‌؟ ئویشم بارزانیه‌ نه‌ك لینین). ئى قسه‌ى گه‌ورا نویسه‌ره‌ مانایه‌یل فره‌یگ هه‌ڵگریگ ، چوینكه‌ سه‌ده‌ى بیس جیاوازه‌ له‌ سه‌ده‌یل تر و چه‌نه‌ها گه‌وره‌ پیاو له‌تى هه‌ڵكه‌فتگه‌ ك ریڕه‌و تاریخ ئاڵشت كردنه‌و له‌ناو نه‌ته‌وه‌یلیان وه‌ك نیشانه‌ یا ڕه‌مزیگ ته‌ماشا كریه‌ن و شانازى وه‌پیانه‌وه‌ كه‌ن، له‌وانه‌یش:(لینین) رووسى و (دیگۆل) فره‌نسى و (ماوسیتۆنگ) سینى و (گیڤارا)ى ئه‌رجه‌نتینى و (خومه‌ینى) فارسه‌یل و(كه‌مال ئه‌تاتورك) توركه‌یل و ده‌یه‌ها سه‌ركرده‌ى تر.

ئنجا ئایا كه‌سیگ شاره‌زا وه‌ك (میدیڤیدلۆف) له‌ناو ئه‌و هه‌مگه‌ پیاوه‌یل گه‌ورا وه‌شیوه‌یگ وه‌ بارزانى نه‌مر سه‌رسام بووگ و له‌هه‌مان وه‌خت وه‌پیاو سه‌ده‌ بزانیگه‌ى، ئه‌ى ئیمه‌ چوین وه‌پى سه‌رسام نه‌ویم! ك ڕیه‌یل خود وه‌دیكردن نیشانمان داگه‌و ژیان نه‌ته‌وه‌یى وه‌پیمان به‌خشاگه‌، ئه‌یه‌ بیجگه‌ ده‌یه‌هانویسه‌ر ناودار وه‌ك لازاریف و كریس كوچیراو بێرناد كۆشنه‌ر، یا هه‌ر نویسه‌رو سیاسه‌تكاریگ بیگانه‌و خوه‌مانى ك ئه‌گه‌ر ئه‌را ته‌نیا جاریگیش وه‌ دیده‌ن بارزانى نه‌مر شاد بوین یا تاریخ بارزانى خوه‌ندوینه‌وه‌ ئه‌وه‌ بیگومان وه‌پى سه‌رسام بوینه‌. سه‌رسام بوین وه‌ بارزانى نه‌مر گشت مه‌رزه‌یل په‌زانگه‌، ته‌نانه‌ت خوه‌ى كرده‌سه‌ ناو ماڵ شۆڤینیزمه‌یل عه‌ره‌بیش. ئیمه‌ گشتمان زانیم ك سه‌دام دكتاتۆر له‌ قوناغیگ دیاریكریاگ تاریخى سه‌ره‌وه‌ر شۆڤینیزمه‌یل عه‌ره‌بى بویه‌، له‌و بنه‌ماڵه‌ ك سه‌دام له‌تى په‌روه‌ده‌ كریاو له‌بان ده‌س ئه‌و گشت شۆڤینیزمه‌یل پا خستنه‌ قوناغه‌یل فره‌ ترسناك و هه‌مان بنه‌ماڵه‌ ئه‌وه‌نه‌ وه‌ بارزانى نه‌مر سارسام بوین یه‌كیگ له‌ ئه‌ندام بنه‌ماڵه‌گه‌یان ناوى نریا(بارزان) ك براى خود سه‌دام حسێنه‌. له‌یرا ئه‌وه‌ك مایه‌ى سه‌رسوڕمه‌ندنه‌، ئه‌وه‌سه‌ ئه‌و دووس خوه‌شه‌ویسمه‌ سه‌رسام نه‌ویه‌ وه‌ بارزانى نه‌مر له‌وه‌ختیگ شۆڤینیزمه‌یل عه‌ره‌بى وه‌ك دوشمنیگ سه‌رسامن وه‌بارزانى.

له‌شوون كوومار كوردستان، سه‌رسامبوین وه‌ بارزانى نه‌مر گشت به‌شه‌یل ده‌سڵاتداریه‌تى ئیران گرته‌وه‌ هه‌ر له‌دام وده‌زگا بگر تا ره‌سیگه‌ ده‌زگایه‌یل دادوه‌رى، ئه‌وه‌بوى له‌وه‌خت دادگاییكردن قازى محه‌مه‌د سه‌رسامبوین وه‌ بارزانى نه‌مر و ریڕه‌و دادگایان ئاڵشت كردن و زیاتر گه‌ردینه‌ شوون له‌ناوبردن سه‌رسامى و ترس و دڵه‌ڕاوه‌كى خوه‌یان جویر ئه‌وه‌ك له‌ به‌ڵگه‌یل تاریخى ناودادگایان ده‌ركه‌فیگ  و چه‌نه‌ها جار داوا له‌ قازى محه‌مه‌د كه‌ن ك(مه‌لا مسته‌فا) وه‌پیان ئاشنا بكا، وه‌لى قازى ئه‌و داوا ڕه‌ته‌و كردگه‌، تا دویاجار دادگا داوا له‌لى كردگه‌ ك وه‌ مه‌یل خوه‌ى هه‌ر وه‌ختیگ بووگ مه‌لا مسته‌فا وه‌پیان بناسنیگ ، وه‌لى دوباره‌ قازى محه‌مه‌د وت( نه‌ من و نه‌ كه‌س نیه‌تویه‌نیگ  بارزانى وه‌ ئیوه‌ بناسنیگ ، حه‌ز كه‌م له‌و باسه‌ واز بارین) وه‌لى دوباره‌ هه‌ر داوا له‌لى كردن باس بارزانى ئه‌ڕایان بكا، ئه‌ویش وه‌ى جووره‌ تیه‌یگه‌ زووان و ئویشیگ (خاس، وه‌لى ته‌نیا له‌چه‌ن قسه‌یگ تویه‌نم بویشم: مه‌لا مسته‌فا ئه‌وه‌ك له‌پیاوه‌تى و كه‌رامه‌ت و شه‌رافه‌ت و ئنسانیه‌ت و شجاعه‌ت و سه‌خاوه‌ت و نه‌ترسى له‌تاریخ كه‌سه‌یل گه‌ورا داشتوینه‌ى مه‌لا مسته‌فایش دیریگه‌ى، ئه‌وه‌ك موسڵمانه‌یل سه‌در ئسلام له‌باوڕ و ڕاسى و پاكى و دڵسووزى ئه‌را خوداو دین و مه‌ردم فه‌قیر و لیقه‌ومیاگ داشتنه‌سه‌ى، بارزانى گشت ئه‌و سفه‌ته‌یله‌ دیریگ ، جویر ئه‌وه‌ك سه‌عدى ئویشیگ   (هرانچه‌ خوبان همدارند، او بتنهادارد) وه‌و مانا گشت ئه‌و سفه‌ته‌یله‌ ك له‌پیاوخاسه‌یل وجوود دیرن وه‌ته‌نیا له‌لاى ئه‌و وجوود دیرن. ئنجا ئیوه‌ حه‌ز كه‌ین باوه‌ڕ بكه‌ین و خوه‌ش بووگ وه‌پیدان یا ناخوه‌ش بووگ وه‌پیدان، ئه‌یه‌ راسییگه‌و حاشا له‌لى نیه‌كریه‌یگ . ئنجا سه‌رسامبوین وه‌ بارزانى نه‌مر بڕه‌سیگه‌ ناو دادگاى دوشمناكارانه‌ى داگیركه‌ره‌یل كوردستان، ئایا ئه‌ڕاچه‌ بایه‌سه‌ تن پرسیار له‌ سه‌رسامبوین من بكه‌ید!؟

دوشمنه‌یل كورد له‌وه‌ر خاتر قورتاربوین له‌و سه‌رسامیه‌و له‌هه‌مان وه‌خت وازكردن گریه‌ كووره‌ى ده‌روین خوه‌یان فره‌جار وه‌ په‌لامار سه‌ربازیه‌وه‌ نه‌وسیانه‌و په‌نا بردنه‌سه‌ وه‌ر گه‌وراهیزه‌یل ناوده‌وڵه‌تى جویر گه‌له‌كومه‌ سه‌ربازیه‌گه‌ى (1963) له‌ناونى عراق و ئیران و توركیاو بریتانیاى گه‌وراهیز دژ وه‌ بارزانى نه‌مر وه‌ گووره‌ى ناوه‌ڕوك ته‌له‌گراف شماره‌(3478) ك بڕیار له‌بوا بوى بریتانیا له‌ قوبرسه‌وه‌ وه‌ هیز ئاسمانى گشت سه‌نگه‌ره‌یل شووڕش ویران بكه‌ن و توركیایش له‌موسڵه‌وه‌ په‌لامار سه‌نگه‌ره‌یل پێشمه‌رگه‌ بیه‌ن و ئیرانیه‌یلیش وه‌ره‌و سلێمانى له‌شكر بارن و هیزه‌یل عراقیش له‌ كویه‌ى (پێرس) ده‌س بكه‌نه‌ په‌لامارداین، ك دویاخر له‌وه‌ر هه‌ڵویست وه‌رگرتن یه‌كێتى سۆڤێت جاران ئه‌و گه‌له‌كومه‌ى سه‌ربازیه‌ سه‌ر نه‌كرت و شیویا.

یا له‌ساڵ 1975 سه‌دام حسه‌ین و شاى ئیران له‌بان مێز پیلانكارى گرده‌و بوین له‌وه‌خت (هوار بومیدیان) سه‌رۆك ئه‌وساى جه‌زایر و سه‌رپه‌رشى راسه‌وخۆ (هنرى كیسینجه‌ر)وه‌زیر خارجیه‌ى ئه‌مریكا، نه‌ك سه‌رسامى، به‌ڵكوو ده‌رد دڵه‌ په‌نمیایه‌گه‌ى خوه‌یان نیشاندان! دووس خوه‌شه‌ویسم ئنجا ئه‌گه‌ر سه‌رسامى داگیركه‌ره‌یل كوردستان وه‌ بارزانى نه‌مر ره‌سویگه‌ ئه‌و ڕاده‌، ئه‌وه‌ سه‌رسامى منیش وه‌ سه‌رسام نه‌وین تن هویچى كه‌متر نیه‌ له‌ سه‌رسامیم وه‌ بارزانى نه‌مر.

سه‌رسامبوین وه‌ بارزانى نه‌مر هه‌ر وه‌ شاعره‌یل كوردپه‌روه‌ر و خاوه‌ن هه‌ڵویست وه‌ك پیره‌مێرد و هه‌ژار و هێمن و قه‌درى جان و عه‌بدوڵڵا په‌شێو و شێركۆ بێكه‌س و ده‌یه‌ها تریش نه‌وسیاگه‌، به‌ڵكوو شاعره‌یل عه‌ره‌بیش گرته‌سه‌وه‌، ئه‌وه‌سه‌ شاعر گه‌وراى عه‌ره‌ب كلاو كوردى و (كوردستان یا نه‌مان) وه‌ك یادگارى سه‌رسامبوین وه‌ بارزانى نه‌مر نا سه‌ر ، بیجگه‌ ئه‌وه‌یش وه‌ شعر( سلمت على جبل الاشم)سه‌رسامى یا ئعجاب خوه‌ى وه‌رانوه‌ر وه‌ كاره‌یل بارزانى نه‌مر نویساگه‌و ده‌رخستگه‌. ئه‌زیزم، سه‌رسامبوین وه‌ بارزانى نه‌مر زه‌حمه‌ته‌ وه‌ى تووزه‌ قسه‌یله‌ جییه‌و بووگ، ئه‌وه‌ ته‌نیا ئه‌را لاوردن ئه‌و ته‌مه‌سه‌ ك وه‌رچه‌ود تیه‌ریكه‌و كردگه‌. ئنجا ئه‌گه‌ر (بارزانى نه‌مر) تاریخ جموجویل رزگاریخواز ملله‌تیگ سته‌مدیده‌و چه‌وسیاگ و نیشتمان له‌تله‌تكریاگ وه‌ك كورد وه‌پى سه‌رسام بووگ! ئه‌ى منیش تاكیگ ناو ئه‌و تاریخه‌ نیم؟ چوین سه‌رسام نیه‌وم!

كویه‌یل كوردستان ئه‌وه‌نه‌ى به‌رزایى خوه‌یان وه‌ به‌رزى بارزانى نه‌مر سه‌رسامن، ئه‌ى منیش خه‌ڵك وڵات كویه‌ نیم؟ چوین وه‌و به‌رزیه‌ سه‌رسام نیه‌وم!

هه‌ر سه‌نگه‌ریگ گولله‌ى داگیركاره‌یل ئى وڵاته‌ كه‌فتویگه‌ وه‌رى وه‌ بارزانى نه‌مر سه‌رسامه‌، ئه‌ى ئه‌و سه‌نگه‌ره‌ شوون وچان من نه‌ویه‌؟ چوین له‌و سه‌نگه‌ره‌ داوڕیه‌م و سه‌رسام نه‌وم!

هویچ واو وارانیگ مه‌وجه‌یل چه‌م (ئاراس) سه‌رسام نه‌كرد، ئیسه‌یش مه‌وجه‌یل ژیر پاى بارزانى نه‌مر داستان سه‌رسامى نویسنن، ئه‌ى ئه‌و داستانه‌ مه‌گه‌ر ئه‌سر چه‌وه‌یل تاریخم نه‌سڕى و په‌رچه‌م كوردستان له‌ زه‌خمه‌یل چوارچراوه‌ نه‌پیچا! بیخه‌وه‌ر مه‌و ئه‌و داستانه‌ سه‌روه‌ریه‌یل من و تن نویسنیگ و ئه‌سر چه‌وه‌یل ئیمه‌ سڕى و زه‌خمه‌یل هه‌ر چوار لاى جه‌سته‌ى ئیمه‌ ساڕیژ كردیاگ، ك وه‌وه‌ سه‌رسام نیه‌وید! ت بویشید تن له‌تاریخ دادوه‌رتر یا عه‌داڵه‌ت تر بوید؟ یا له‌ كویه‌یل سه‌ربه‌رزتر و له‌ سه‌نگه‌ره‌یل سه‌بردارتر و له‌ شه‌پۆل یا مه‌وجه‌یل چه‌م ئاراس راسگووتر بووگ.