باس گوزه‌یشته‌ یا ئیسه‌و ئاینده‌؟

شفق نيوز

سێیم، ك فره‌ باس گوزه‌یشته‌ كه‌ن و پابه‌ندن وه‌پیه‌وه‌، وه‌ل ئه‌وه‌یشا گشت هووكاره‌یل ره‌سانن هونه‌ر خوه‌یان له‌ى باوه‌ته‌وه‌ تیه‌رنه‌ كار، له‌وانه‌یش ره‌ساننه‌یل حكوومه‌ت ك په‌یوه‌سن وه‌ قسه‌وباس له‌بان گوزه‌یشته‌و چشته‌یل كویه‌ن و په‌ند و ده‌رسه‌یل و توانایى ئاده‌میزاد ژیاره‌یل كویه‌نمان، وه‌لى ئایا باس له‌بان رووژگار ئیسه‌مان كردنه‌و له‌بان نه‌خشه‌یل خواست و پڕ هه‌وه‌جه‌ له‌وه‌ر خاتر خزمه‌تكردن وه‌ نه‌وه‌یل ئیسه‌و ئاینده‌؟

باس له‌بان گشت ئه‌و چشته‌یله‌ كه‌ن ك په‌یوه‌ندى داشتووگ وه‌ گوزه‌یشته‌وه‌و قه‌ور مردگه‌یل هه‌ڵه‌و ده‌ن له‌وه‌ر خاتر باوه‌ڕكردن وه‌ قسه‌یلیان و ئه‌وانه‌یش زنگن له‌هویره‌و بریه‌ن و پشتگووش خریه‌ن و باس له‌ هه‌وه‌جه‌و خواست و داواكاریه‌یلیان نیه‌كه‌ن جویر شوون نیشته‌جى و كار و سه‌قامگیرى و ژیان شایسته‌و به‌خته‌وه‌ر.

ئمجا چه‌نیگ  خوه‌شه‌ وه‌ختى وه‌ شانازیه‌وه‌ باس له‌ كرده‌وه‌یل عه‌ره‌ب كه‌ن له‌ مه‌یدانه‌یل پزیشكى و ئه‌ندازیارى و هویركارى و كیمیاو زانسته‌یل تر، یا چه‌نیگ  خوه‌شه‌ وه‌پیان وه‌ ختى دوینن ئۆرپا نه‌ف وه‌رگرتگه‌ له‌ زانست عه‌ره‌ب و په‌ره‌ ده‌نه‌پى و داهینان یا ئبداع زیاتر له‌لى كه‌ن، وه‌لى دوینیم خوه‌مانیش لایه‌ن ته‌مه‌ڵى گرتیمنه‌و هویچ قانجازیگ له‌و زانسته‌یله‌ نیه‌كه‌یم و پشتگووشى خستیمنه‌، وه‌ل ئه‌وه‌یشا قانجازى چه‌ بووگ باسكردنمان له‌بان هه‌زاره‌ها ساڵ وه‌رجه‌ زایین و قانجازى چه‌س له‌ى رووژگارمانه‌و په‌یوه‌ندییگ نیه‌ له‌ناونى ئه‌وساو ئیسه‌، چوینكه‌ ئیسه‌ هه‌وه‌جه‌ وه‌چشته‌یل فره‌یگ كرده‌وه‌یى دیریم و باوه‌ڕ نیه‌كه‌یم چشته‌یل كویه‌ن و باس كویه‌نه‌ وه‌كارمان بایگ له‌ى وه‌خته‌یله‌، ك دوینید سوید و دانیمارك یا ئه‌مریكاى باكوور تاریخیگ  جویر تاریخ ئیمه‌ نه‌یرن له‌ڕوى زانسته‌وه‌، وه‌لى ئایا چشتیگ ئه‌را كوومه‌ڵگامان كردیمنه‌ بووگه‌ مایه‌ى به‌خته‌وه‌رى و خوه‌شى و سه‌قامگیرى جویر ئه‌و ده‌وڵه‌ته‌یله‌؟ هه‌ر له‌وه‌ر ئه‌وه‌یش بایه‌سه‌ له‌بانمان چشتیگ  بكه‌یم ئه‌را ئى رووژگار ئیسه‌مانه‌و له‌ هه‌مان وه‌خت نه‌خشه‌یش دابنه‌یم ئه‌را ئاینده‌یگ خاستر له‌وه‌ر خاتر نه‌وه‌یلمان و گشت قسه‌و باسیگ له‌بان گوزه‌یشته‌ بیلیمنه‌ زگ تاریخ و كتاوه‌یل.

ئیمه‌ ئه‌وه‌نه‌ به‌دبه‌ختى وه‌چه‌و دیمنه‌، دى نیه‌تویه‌نیم باوه‌ڕ وه‌ چشته‌یل گوزه‌یشته‌ بكه‌یم ئه‌را دروسكردن رووژگار ئیسه‌مان، ك بیگومان گشت سیماو هه‌وه‌جه‌یل ئاده‌میزادى فره‌سه‌ وه‌ به‌راورد یا مقارنه‌ وه‌ل گوزه‌یشته‌یا. ئیمه‌ ئیسه‌و دویا راسه‌ بایه‌سه‌ حورمه‌ت له‌ گوزه‌یشته‌ بنه‌یم، وه‌لى بایه‌سه‌ نه‌خشه‌ دابنه‌یم ئه‌را ئى ڕووژگاره‌و ئه‌را ئاینده‌ى نه‌وه‌یلمان.

 

هه‌ڵه‌وگه‌ردانن: جه‌مال ئه‌ركه‌وازى