خانه‌قين له‌ده‌س مه‌يه‌ن

شـه‌فه‌ق نيـوز

شه‌فه‌ق نيوز/ ئه‌و شار خاسه‌ وه‌ ئه‌خلاق مه‌ردمه‌گه‌ى و رووشنهويرى و خاسى و په‌يوه‌سبوينيان وه‌ ره‌سه‌نايه‌تى كوردايه‌تى و ئنتمايان ئه‌را كوردستان، وه‌ دريژايى ده‌يان ساڵ گوزه‌يشت له‌ڕوى زوڵم و ديكتاتۆريه‌ت شوفێنى وسيان و قوربانى و شه‌هيد و زه‌خمداريش دانه‌و ئه‌يه‌ن له‌وه‌ر په‌يوه‌س نه‌ته‌وه‌يى وه‌ل ئه‌و هه‌مگه‌ هه‌وڵه‌يل فريه‌يشه‌ ك له‌لايه‌ن حكومه‌ت به‌غداوه‌ ئه‌را ئغرا كردنيان هاوريا كار و ته‌نانه‌ت له‌ شوون ساڵ 2003يش.

 

ئه‌و شاره‌ ناڵنێد وه‌ده‌س چشته‌يل فريه‌يگ له‌ساى كزى ئابووى له‌ عراق وه‌شيوه‌يگ گشتى و له‌ كوردستان وه‌شيوه‌يگ تايبه‌ت، هه‌ر وه‌و خاتريشه‌ ده‌رفه‌ت كار ئه‌را جايه‌ڵه‌يلى فريه‌ كه‌مه‌و دامه‌زراننيش بويه‌سه‌ نيمه‌چه‌ گوميگ، يه‌يش بيجگه‌ خراوى بار خزمه‌تگوزارى له‌ شاره‌گه‌، ك يه‌يش له‌يوا كردگه‌ دڵته‌نگى فريه‌يگ له‌ ده‌روين مه‌ردم نيشته‌جى خانه‌قين دروس بدێ وه‌ گووره‌ى ئه‌و بار خراوه‌ ك ده‌وريان داگه‌و دوياخريش وه‌و خاتره‌ كوردستان عونسريگ گرينگ له‌ عونسره‌يل هه‌رێم له‌ده‌س ئه‌ياد، وه‌تايبه‌ت ك خانه‌قين و مه‌نه‌لى هاوساى ده‌روازه‌يل باشوور ئه‌را كوردستان پيك ئه‌يه‌رن و خاوه‌ن داهات گرينگن و حكومه‌ت هه‌رێم هه‌وڵ ئستغلالكردنى نايه‌ێد، ك ئه‌ويش نه‌فت و غاز سروشتيه‌ له‌ نه‌فتخانه‌.

 

ئه‌و سه‌رچه‌وه‌يل نه‌تيه‌ تواناى وه‌به‌رهاوردن سه‌دان هه‌زار به‌رميله‌ نه‌فت رووژانه‌ ديرن له‌ حاڵه‌تيگ ئه‌گه‌ر په‌ره‌ وه‌پيان بدريه‌ێد و ته‌كنيكه‌يل تازه‌ ئه‌را دراوردن و پاڵين به‌رهه‌مه‌يل نه‌فت و غاز سروشتى باريه‌ێده‌ كار، يه‌يش هه‌رچه‌نى ك گشت كه‌سيگ هووكاره‌يل راسكانى پيشگووشخستن نه‌فتخانه‌و باس نه‌كردنى له‌لايه‌ن حكومه‌ت ناوه‌نديه‌و ئه‌زانێد، وه‌لێ ئيراده‌ى كوردستانى ئه‌گه‌ر جيوه‌جى بدێ و نيازه‌يل پاكيگ باێده‌ وجوود له‌ناونى لايه‌نه‌يل جياجياى كوردستانى و روێ قوبڵه‌نماگه‌ كردن وه‌ره‌و خانه‌قين، ئه‌وه‌ ئاكامه‌گه‌ ئه‌را خانه‌قين و كوردستان وه‌خاس ئه‌نيشێد و شاره‌گه‌ له‌ بار خاسيگ ئابوورى ژيه‌ێد و تواناى ئه‌وه‌ ديرێد بدێده‌ داهاتيگ خاس ئابوورى و ده‌سميه‌ت كوردستان بيه‌ێد له‌ساى ئى قه‌يران داراييه‌ ك هاته‌سه‌ تويشى له‌ئاكام ناكووكى ناونى هه‌رێم و حكومه‌ت ناوه‌ندى.

 

وه‌ل ئه‌وه‌يشا خانه‌قين خاوه‌ن كادره‌يل ته‌كنيكى و ئدرايه‌ له‌بان ئاست به‌رزيگ له‌ڕوى ئابووريه‌و، ك تواناى ئه‌وه‌ ديرن هه‌ر پلانيگ ئابوورى دامه‌زرنن ئه‌را په‌ره‌داينن وه‌ سه‌رچه‌وه‌يل نه‌فتخانه‌و زيايكردن به‌رهه‌مه‌گه‌ى، يه‌يش ماناى ئه‌وه‌سه‌ پشت وه‌ مه‌ردم شاره‌گه‌يش به‌سيه‌ێد وه‌گووره‌ى ئه‌و گوزاره‌ ك ئويشێد(مه‌ردم مه‌ككه‌ وه‌ ملله‌ته‌يل خوه‌يان زانن)، ك دوياخريش نواگيرى له‌ مه‌يل كه‌سه‌يل شاره‌زايش ئه‌كريه‌ێد ئه‌را كووچكردن وه‌ره‌و ده‌يشت وڵات دوياى ئه‌وه‌گ دڵته‌نگى فريه‌يگ هاته‌سه‌ تويشيان له‌ پشتگووشخستن له‌ وڵات و شاره‌يليان.

 

يه‌يش بيجگه‌ ئه‌وه‌يش ك مه‌سه‌له‌ى وه‌ختيش هووكاريگه‌ يه‌كلاكه‌ر له‌ وه‌رگرتن برياريگ له‌ى باوه‌ته‌و، ك هه‌رچى زويتر ده‌س بكريه‌ێد له‌وه‌رگرتن رى وشوون ئه‌را په‌ره‌داين نه‌فتخانه‌، ئه‌وه‌نه‌ زويتر خوه‌مان له‌ قوڕگ ئه‌و شيشه‌ى قه‌يران ئابووريه‌ قورتار ئه‌كه‌يم، وه‌لێ پشتگووشخستن و په‌كخستن و دوياخستن ڕى وشوونه‌يل ئدارى و ته‌كنيكى و مناكردن لايه‌نه‌يل په‌يوه‌نديدار له‌ناونى خوه‌يان زه‌ره‌د ره‌سننه‌ گشتلايگ و له‌لايه‌ن ئه‌و مه‌ردمانه‌و ئستغلال ئه‌كريه‌ن ك وه‌ سه‌بر فريه‌يگه‌و چه‌وه‌ڕى زيايبوين ناكووكيه‌يل ئه‌كه‌ن و ئه‌خوازن كه‌لين ناونى لايه‌نه‌يل كوردستانى فيشتره‌و بدێ، وه‌ل ئه‌وه‌يشا مه‌ردم خانه‌قينيش وه‌ سه‌بر فريه‌يگه‌و چه‌وه‌ڕى ئه‌وه‌ ئه‌كه‌ن كه‌سيگ پشتگيريان بدێ له‌و به‌دبه‌ختيه‌ ك هاته‌ تويشيان وه‌رجه‌ ئه‌وه‌گ كار له‌ كار بترازيه‌ێد و كوردبوين شاره‌گه‌ له‌ده‌س بچوود.

موشتاق ره‌مه‌زان