خاڵه‌یل وشكانن..هه‌وه‌جه‌یگ ئاسایشیه‌ تا په‌خشبوین كوورانه‌؟

شفق نيوز

هیزه‌یل چه‌كدار نورى مالكى وه‌ بوونه‌ى كه‌مه‌وكردن ئه‌و خاڵه‌یل وشكاننه‌ ك هه‌وه‌جه‌ نه‌یریم وه‌پیان و له‌هه‌مان وه‌خت ئاڵشتكردن نه‌خشه‌ى عه‌سكه‌رى وه‌جووریگ بگونجیه‌یگ وه‌ل گویڕانكارى ئه‌منیا له‌به‌غداو پاریزگایه‌یل.

ئه‌و مزگانى و خوه‌شیه‌ ك دریا پیمان، خوه‌ى له‌چه‌ن مه‌سه‌له‌یگ دوینیگه‌وه‌، یه‌كمیان ئه‌وه‌سه‌ بیگومان ك ئه‌و داوا وه‌پیه‌وه‌ دیاره‌ ك هس وه‌ خاسبوین فره‌یگ بكریه‌یگ له‌لایه‌ن وه‌زع ئه‌منیه‌وه‌، ئه‌یه‌ بیجگه‌ ئاڵشتكردن پلان ئه‌منى و ستراتیجیه‌ت تازه‌. وه‌ل ئه‌وه‌یشا ك قاسم عه‌تا وه‌رجه‌ ماوه‌یگ وه‌هه‌مان جوور باس له‌ كه‌مه‌وكردن خاڵه‌یل وشكانن كرد له‌ پایته‌خت به‌غدا، وه‌لى له‌یوا دیاره‌ ئه‌و خوه‌شیه‌ وه‌رده‌وامى نه‌یاشت و خاڵه‌یل وشكانن زیاتره‌و بوى و بیجگه‌ ئه‌وه‌یش مه‌سه‌له‌ى كوشتن وه‌ ده‌مانچه‌یل بیده‌نگ په‌یا بوى ك شماره‌یگ له‌ ئه‌فسه‌ره‌یل ده‌زگاى ئه‌منى خاوه‌ن ئه‌زموون و شماره‌یگ له‌ هاووڵاتیه‌یلیش گرته‌ نیشان.

ئیمه‌ زانیم ك ئه‌وخاڵه‌یله‌ له‌ى دویاخره‌ په‌خشه‌و بوین له‌ جاده‌یل به‌غدا، له‌ ئه‌نجام به‌رزه‌وبوین ئه‌و كاره‌یل كوشتنه‌ بوى، وه‌لى شماره‌و شوونه‌یل خاڵه‌یل پرسیاره‌یل فره‌یگ تیه‌ریگه‌ هویرمان له‌باوه‌ت ستراتیجیه‌ت وه‌رده‌وام و ده‌سنیشانكردن شوونه‌یل وه‌تایبه‌ت وجوود قه‌ره‌باڵغى له‌ هاتوچووكردن و سه‌رهه‌ڵداین ناڕه‌حه‌تى له‌ناونى گشت هاوڵاتیه‌یل وه‌تایبه‌ت له‌لاى خوه‌ندكار و كارمه‌نده‌یل، ئمجا جاده‌ى ته‌یاره‌خانه‌ى موسه‌نا ك له‌محه‌ته‌ى شه‌مه‌نده‌فه‌ر كویه‌ن ناوچه‌ى عه‌لاوى حله‌ ده‌س وه‌پى ئه‌كا تا ڕه‌سیگه‌ پیه‌ڵ 14ى ڕه‌مه‌زان ك دریژیه‌گه‌ى له‌ 2000 مه‌تر نیه‌په‌ڕیگه‌وه‌، ئه‌مجا ئه‌را نموونه‌: پیكهاتگه‌ له‌ 3 خاڵ وشكانن ك گشتیان نزیكن له‌یه‌كه‌وه‌و قه‌ره‌باڵغى فره‌یگ دروسكردنه‌و بیجگه‌ ئه‌وه‌یش ئه‌و سه‌ربازه‌یل هیز سوپا ك له‌و خاڵه‌یله‌ وجوود دیرن هویچ سه‌یاره‌یگ نیه‌وشكنن مه‌گه‌ر تاكمه‌جاریگ نه‌وگ چه‌ن سه‌یاره‌یگ وشكنن، دى وه‌و جووره‌ كار كقه‌یه‌تیكردن ئه‌منى له‌لایان بویه‌سه‌ ریكخستن سه‌یاره‌یل، ئمجا له‌یرا پرسیار ئه‌وه‌ كه‌یم ك ئایا قانجاز ئه‌و خاڵه‌یل وشكاننه‌ چه‌ بووگ ئه‌را مه‌ردم؟

بیگومان ئیمه‌ دژ وجوود ئه‌و خاڵه‌یله‌ نیمن، وه‌لى دیاره‌ ئه‌و ته‌سریحه‌یل سه‌رۆك وه‌زیره‌یله‌ مه‌حاڵه‌ له‌ناونى شه‌و وڕووژیگ جى وه‌جى بكریه‌یگ، هه‌ر له‌وه‌ر ئه‌وه‌یش ئومیده‌واریم ك پلان خاسیگ دابنریه‌یگ ئه‌را هه‌ڵوژانن ئه‌و شوونه‌یله‌ ك خاڵ وشكانن له‌تیان خواسته‌ له‌وه‌ر خاتر ئاسایش گشتى.