حاكم و مهره‌بانى

شفق نيوز

له‌ عیراق زیاتر له‌ 23%ه‌ له‌ سه‌رجه‌م مه‌ردمه‌گه‌ى، یه‌یشه‌ وه‌و مه‌عناسه‌ ك نزیكه‌ى 9 میلیۆن كه‌س له‌عیراق تیر زگیان نان نیه‌خوه‌ن و له‌ خزمه‌تگوزاریه‌یل ته‌ندروستى و هه‌وه‌جه‌یل ڕووژانه‌ بیبه‌شن، یه‌یشه‌ گشتى له‌ سایه‌ى ئه‌و حكوومه‌ته‌ ك له‌ سه‌رده‌م دیموكراسى و شه‌فافیه‌ت ك زوورمى كاروه‌ده‌سه‌یلى له‌ سه‌رده‌م ڕژیم دیكتاتۆرى ڕه‌خنه‌ یا ئنتقاد ئه‌وه‌ له‌ ڕژیم گردیان ك ته‌نیا 5% له‌ بودجه‌ى عیراق ته‌رخان كردیه‌ ئه‌را خزمه‌تگوزارى و پرۆژه‌یل ئاوه‌دانكردن و ته‌ندروستى و خوه‌نین و كارت خوراكى (بتاقه‌ى ته‌موینى) و ئه‌و باقى 95% بودجه‌ى ته‌رخان كردیه‌ ئه‌را چه‌ك و تفاق سه‌ربازى و خوه‌شگوزرانى خوه‌ى و داروده‌سه‌ى حزبه‌گه‌ى،  وه‌ل ئه‌وه‌یشه‌وه‌؛ لاى كه‌م ماده‌یل كارت خوراكى هه‌م فره‌تر و هه‌میش مانگانه‌ ڕه‌سیاده‌ ده‌س مه‌ردم هه‌ژار و نرخ سووته‌مه‌نى و غاز و نه‌فت چشتیگ ڕه‌مزى بوى و ڕووژانه‌یش كاره‌با سێ سه‌عات هاتن و سێ سه‌عات بڕیان بوى... ئه‌گه‌ر بایمن و به‌راوردیگ له‌ حاڵ و گوزران عیراقیه‌یل بكه‌یم وه‌ل ئه‌و سه‌رده‌مه‌ ك عیراقیه‌یل هویچ هه‌قیگ نه‌یاشتن له‌ مردن زیاتر، ئیسه‌ بودجه‌ى عیراق ك ساڵانه‌ ڕه‌سێده‌ نزیكه‌ى 70 تا 80 ملیار دۆلار ئه‌وه‌ دوینیمن ك ئه‌وانه‌گ تانه‌ى دزى و خواردن دارایى و ماڵ و موڵك مه‌ردم بیچاره‌ى عیراق دیانه‌ ئه‌و ڕژیم گووڕوه‌گووڕه‌، ئاست ژیان مه‌ردم ڕه‌ساننه‌ ئه‌و ڕێژه‌ى فه‌قیریه‌ ك له‌ سه‌ره‌تاوه‌ له‌ زووان خود خوه‌یانه‌و هاوردیمنه‌سه‌ى و نه‌ ماده‌یل خوراكى وه‌ شیوه‌یگ خاس ڕه‌سیده‌ ده‌س مه‌ردم و نه‌یش له‌ لایه‌ن جووریه‌وه‌ ئه‌را وه‌كارهاوردن به‌شه‌رى وه‌كارتیه‌ن ئه‌وه‌ بیجگه‌ كه‌مه‌وكردن شماره‌یان ئه‌را ته‌نیا 5 ماده‌ و وه‌ل ئه‌وه‌یشا نرخ سووته‌مه‌نى گرانه‌و بویه‌ و كاره‌بایش ڕووژانه‌ له‌ یه‌ك یا دو سه‌عات زیاتر نیه‌وده‌ میوان ماڵ عیراقیه‌یل و ... و...هتد.

ئه‌رێ ئه‌وانه‌گ خوه‌مان وه‌ده‌س خوه‌مان ڕه‌سانیمنه‌دانه‌ بان ته‌خت ئى ده‌سڵاته‌ له‌ شووڕش وه‌نه‌وشه‌یى هه‌ڵوژاردنه‌یل، ئیوه‌ نیه‌زانم تاریخ خوه‌نینه‌و یا نه‌، ئه‌گه‌ر خوه‌نینه‌و خوو ئه‌وه‌ دیاره‌ ئه‌وه‌گ تویشمان تیه‌ید له‌ سه‌ر ده‌س ئیوه‌س و له‌ ژیر سه‌ر ئیوه‌س و ئه‌گه‌ریش نیه‌خوه‌نینه‌و به‌ون وه‌لمان ته‌نیا ئى وه‌سه‌رهات پڕ مه‌عنا بخوه‌ننه‌و به‌شكه‌م چشتیگ بكه‌فیده‌ هویردان ك خوداوه‌ن كه‌ریم كردیه‌سه‌ى یه‌كیگ له‌ ناوه‌یل موباره‌ك خوه‌ى ك مهره‌بانیه‌:

ئویشن حاكمیگ له‌ یه‌كیگ له‌ ولایه‌ته‌یل ئه‌مریكى بویه‌ وه‌ناو (لاگاردیا) ك وه‌ توندى له‌ لایگ  و دادپه‌روه‌رى و ئنسانیه‌ت له‌لایگ تره‌و ناوده‌ركردوى، ڕووژیگ له‌ ڕووژان پیره‌مه‌ردیگ ئه‌راى هاوردوین وه‌توومه‌ت دزى كردن نانیگ... ئى پیاوه‌ له‌ترسا له‌رزیاد و وت ك ناچار بویه‌ ئى نانه‌ بدزید ، وه‌نه‌ له‌ ورسێتى مردیاد، حاكمه‌گه‌ وه‌ختى ئى قسه‌یله‌ له‌لى ژنه‌فت وت:" جه‌نابد وه‌ى جووره‌ دگان نه‌یده‌ دزى كردن، و منیش له‌وه‌ر ئه‌وه‌ و وه‌گووره‌ى حوكم قانوون ناچارم سزاد بیه‌م وه‌ 10 دۆلار غه‌رامه‌ت". سكووتیگ پڕ سه‌رسوڕمان زاڵ بویه‌ بان ئه‌وانه‌گ له‌ دادگاگه‌ ئاماده‌بوین و ئى حاكمه‌ ئه‌و سكووته‌ وه‌وه‌ شكان ك ده‌س كرده‌ به‌خه‌ڵ خوه‌ى و 10 دۆلار دراورد و خسته‌ى خه‌زینه‌ى دادگا، تاگه‌ر دادپه‌روه‌رى و میهره‌بانى وه‌یه‌كا جه‌مه‌وبكه‌ید و ئنجا ڕوى كرده‌ ئاماده‌بویه‌یل و وته‌ پیان:"ئى 10 دۆلاره‌ به‌ش نیه‌كه‌ید و بایه‌ته‌ هه‌ر یه‌ك له‌ ئیوه‌یش سه‌ر و 10 دۆلار بیه‌ین چوینكه‌ له‌ى شار منه‌ جووره‌ ئایمیگ هه‌س له‌ ورسێیا ناچار بوود نانیگ بدزى تا زگ خوه‌ى تیر بكه‌ید... ئنجا حاكمه‌گه‌ كه‌ڵاوه‌گه‌ى كه‌نى و داره‌ى ده‌س كاروه‌ده‌سیگ و هیشته‌ى گڕ بخوه‌یده‌ بان ئاماده‌بویه‌یل و ئه‌و باجه‌ له‌ گشتیان سه‌ن ك وه‌ گشت خاترجه‌مییگه‌و دانه‌ى پى ك سه‌رجه‌مى بویه‌ 480 دۆلار و حاكمه‌گه‌ گشتى داوه‌ده‌س پیره‌مه‌رده‌گه‌ وه‌ل به‌ڵگه‌نامه‌یگ داواى وه‌خشینكردن له‌ لایه‌ن دادگاوه‌!!!.

 

ماجد سوێره‌ميری