گرده‌وكردن مێژوو

شفق نيوز

له‌گشت ملله‌تیگ گرنگى خاسیگ دریه‌یگه‌ مێژوو ، وه‌لى له‌ ملله‌تیگه‌و ئه‌را ملله‌تیگ تر جیاس، چوینكه‌ فریه‌یگ له‌ ملله‌ته‌یل له‌وه‌ر مه‌سه‌له‌ى داگیركارى و تاویانه‌وه‌ له‌ناو ملله‌ته‌یل تر نویسانن مێژوو شایه‌ت جوور قه‌یه‌غه‌یه‌یگ كاریگه‌رى خراو له‌لایان داشتگه‌، شایه‌ت ئى كاریشه‌ هووكار تایبه‌ت داشتوود، وه‌لى ئه‌و ملله‌ته‌یله‌ ك ژیرده‌سه‌و چه‌وسیاگ بوینه‌و هه‌میشه‌ چه‌وه‌ڕى خوه‌ر ئازادى كردنه‌، ئه‌وانه‌ بیگومان له‌ مێژوو جیاوه‌ نیه‌ون و رویداگه‌یل ڕووژگاریش له‌وه‌رچه‌و گرتنه‌و له‌وانه‌یش ملله‌ت سته‌مدیده‌ى كورد ك گرینگى ئه‌یاده‌ مێژوو و كلتوور و فه‌رهه‌نگ ره‌سه‌نایه‌تى خوه‌ى.

له‌یرا ئه‌تویه‌نیم بویشیم گرنگى رووژگار و سه‌رده‌مه‌یل گوزه‌یشت له‌لاى گشت ملله‌ت و نه‌ته‌وه‌یگ جوور یه‌ك نیه‌، چوینكه‌ ملله‌ته‌یل فریه‌یگ هه‌ن بیده‌نگ و ڕازیین وه‌ نه‌زانستن گوزه‌یشته‌ى خوه‌یان له‌وه‌ر هووكاره‌یلیگ ك شایه‌ت له‌ناچارى و ناڕووشنهویریه‌و سه‌رچه‌وه‌ گرتوید، وه‌لى ملله‌ته‌یلیگیش هه‌ن پابه‌ندن وه‌ریزگرتن له‌گوزه‌یشته‌ى خوه‌یان و هه‌میشه‌ هه‌وڵ زانستن رویداگه‌یل ئه‌یه‌ن.

وه‌ل ئه‌وه‌یشا نه‌ته‌وه‌یلیگیش هه‌ن كووكن وه‌ل بنه‌ڕه‌ت فكره‌ى ده‌وڵه‌ت و له‌بان بنه‌ماى چه‌سپانن مێژوو یا گرده‌وكردن كلتوور ره‌سه‌نایه‌تييش كار نه‌كردنه‌و ئه‌ڕاى چوینیان جیاوازه‌ وه‌ل ئه‌ڕاى چوین نه‌ته‌وه‌یل تر له‌ مه‌سه‌له‌ى گوزه‌یشته‌و ڕیخوه‌شكردن ئه‌را ده‌سكه‌فتن و مقه‌یه‌تیكردن تاریخه‌یلیان، یا دوینیم نه‌ته‌وه‌ى له‌یوایشه‌ هه‌س له‌بان بنه‌ڕه‌ت هویروڕاى ده‌وڵه‌ت و ده‌سڵات له‌وه‌رچه‌و ناگرن هویرو ڕایان له‌بان بنه‌ماى ژیان و بار ئه‌و سه‌رده‌مه‌ گڵووڵه‌ كردنه‌ ك هه‌وڵ جددى خواستگه‌و یه‌یش هه‌وه‌جه‌ وه‌ ئیراده‌ى بته‌ویگ داشتگه‌ له‌بان بنه‌ماى نه‌ته‌وه‌یى و نیشتمانپه‌روه‌رى، بیجگه‌ ئه‌وه‌یش نه‌ته‌وه‌ى له‌یوایشه‌ هه‌س مێژوو له‌لاى چیه‌سه‌ خانه‌ى داب ونه‌ریت و ناخوازن ده‌سوه‌ردارى بوون، چوینكه‌ له‌یوا زانن وه‌ل نه‌مه‌ندن ئه‌و داب ونه‌ریته‌ گشت چشتیگ له‌ده‌س چوودو ته‌مام ئه‌دێ، وه‌لى ئه‌تویه‌نیم بویشیم هه‌ر ملله‌تیگ له‌ى گووشه‌ى زه‌ویه‌ هه‌وه‌جه‌ وه‌ گرده‌وكردن مێژوو خوه‌ى دیرید.

محه‌مه‌د كه‌مال

ج . أ