له‌ شه‌نگاڵه‌و ئه‌را كۆبانی

شفق نيوز

من باوه‌ڕم ئه‌وه‌سه پيلانيگ هه‌رێمی و ناوچه‌يی وجوود ديريد ئه‌را شيوانن و له‌باربردن ئه‌زموون حوكمڕانی كوردی و شيوانن كيشه‌ی كورد له‌ كوومه‌ڵگای ناوده‌وڵه‌تی و ريگری له‌ پيكه‌فتن مه‌سه‌له‌ی كورد و ره‌سين وه‌ ئامانج و ئاره‌زوو مێژووييمان ك سه‌روه‌خۆيی و ئاشكراكردن ده‌وڵه‌ت كوردستانه‌.‌

ئيسه‌ كوردستان باشوور قوناغ فريه‌ خاسيگ بڕيه‌و نزيكه‌و بويه‌ له‌ ئاشكراكردن سه‌روه‌خۆيی و كوردستان خوه‌رئاوايش ها له‌سه‌ره‌تای ڕی و خه‌ريكه‌ وه‌ره‌و هه‌رێميگ سه‌روه‌خوه‌ی گام ئه‌نه‌ێد له‌ چوارچيوه‌ی فيدراڵی.

دياره‌ كه‌ره‌سه‌ی جيوه‌جيكردن ئه‌و پيلانه‌ ريكخرياگ ترۆريستی داعشه‌ ك ئيسه‌ كوردستان باشوور و كوردستان خوه‌رئاوا كردنه‌سه‌ ئامانج ئه‌را نواگرتن له‌ پيشكه‌فتن مه‌سه‌له‌ی كورد. ئمجا دڵنيايم ك ستراتيجيه‌ت داعش ته‌نيا ئامانج له‌لی نه‌ته‌وه‌ی كورد و كوردستانه‌، وه‌نا له‌وه‌رچه‌ وه‌ی جووره‌ په‌لامار حكوومه‌ته‌گه‌ی به‌شار ئه‌سه‌د نادريه‌يد؟ يا خه‌يره‌ سوپايگ ٦٠ هه‌زار كه‌سی وه‌ چه‌ك قورسه‌و خوه‌ی ئه‌ياده‌ ده‌س داعشه‌و؟ يا ئه‌گه‌ر ئه‌وان دژ كافره‌يل و بی ئايينه‌يل جه‌نگ ئه‌كه‌ن خێره‌ له‌يوا په‌لامار روسياو چين و كووباو كۆرياو....نايه‌ن؟

هه‌ر وه‌و خاتريشه‌ من باوه‌ڕم ئه‌وه‌سه‌ ئه‌و داعش و ئه‌و جه‌نگه‌ هويچ په‌يوه‌ندييگ وه‌ ئايين و بی ئايينييه‌و نه‌يريد، به‌ڵكوو ئه‌و ريكخرياگ ترۆريستيه‌ دژ كورده‌و جه‌نگه‌گه‌يش جه‌نگ كورد و دوشمنه‌يليه‌و هاوكاريكردن كوومه‌ڵگای ناوده‌وڵه‌تی و پڕچه‌ككردن هيز پێشمه‌رگه‌يش پشتگيری گه‌وراو بته‌ويگه‌ ئه‌را كوردستان و مسۆگه‌ركردن و سه‌ركه‌فتن له‌و جه‌نگ چه‌سپياگه‌.

ئمجا ئه‌را ئه‌وه‌ك رويداگيگ تر هاوشيوه‌ی شه‌نگاڵ له‌ كۆبانی دوباره‌وه‌ نه‌دێ، كاره‌گه‌ ئه‌وه‌ ئه‌خوازێد ك كورده‌يل هه‌رچوار پارچه‌ی كوردتان يه‌كگرتگ و يه‌كهه‌ڵويست بوون و هيزيگ يه‌كگرتگ دامه‌زريه‌يد له‌ ژير فه‌رمان يه‌ك سه‌ركرده‌و يه‌ك فه‌رمانده‌، هيز پێشمه‌رگه‌ی كوردستان بخريه‌يده‌ ئاماده‌باشی و جموجويل، نه‌ك حزب فه‌رمان وه‌ هيز پێشمه‌رگه‌ بكا.

ئيسه‌يش وه‌خت ئه‌وه‌ هاتگه‌ ناكوكيه‌يل خودی و حزبی بخريه‌يده‌ كنار و دی باڵاده‌سی و ته‌كحزبی و گووشه‌گيری له‌ هويچ ناوچه‌يگ نه‌مينيد و گشت پارته‌يل كوردستانی وه‌ يه‌كه‌و خه‌ريك نه‌خشه‌ڕييگ بوون ئه‌را روی وه‌ڕوی بوينه‌وه‌ی ترۆر و پيلانگه‌ری وڵاته‌يل و مقه‌يه‌تی خاك كوردستان و ئه‌زموون حوكمڕانی و مقه‌يه‌تيكردن ده‌سكه‌فته‌يل و جيوه‌جيكردن ئامانج مێژوويی نه‌ته‌وه‌ييمان.

فه‌ره‌يدون بێوار

ج . أ