شكست سیاسی

شفق نيوز

پرسياريگ فريه‌ ساده‌ به‌سه‌ ئه‌را ئه‌وه‌ك ئاده‌ميزاد له‌ راسيه‌گه‌ی ئه‌رای ده‌ربكه‌فيد، ك ئه‌ويش ئه‌وه‌سه‌: ئه‌گه‌ر مالكی بگونجياتاد وه‌ل سنيه‌يل و كيشه‌ی قويل نه‌ياشتاد وه‌ل كورد ئايا داعش تويه‌نستياد موسڵ و ناوچه‌يل تر بگريد؟ جواوه‌گه‌ نه‌خێر وه‌ دڵنياييه‌و.

پێشمه‌رگه‌ له‌ موسڵ نه‌ك هه‌ر توانای وه‌رگری، به‌ڵكوو توانای وه‌ره‌ونواچگنيش داشت، ته‌نانه‌ت له‌ شه‌و ته‌مام كه‌فتن شار موسڵيش(شه‌و ٩ له‌بان ١٠ی ئی مانگه‌)، وه‌لی پێشمه‌رگه‌ فه‌رمان وه‌ره‌و نواچگن و وه‌رگريكردن وه‌پی نه‌دريا، يه‌يش بڕيار غه‌ڵه‌تيگ نه‌وی. ئيسه‌يش پێشمه‌رگه‌ ئه‌و توانا ديريد، وه‌لی له‌ی بار ئيسه‌ هه‌وه‌جه‌ ناكا مه‌گه‌ر وه‌ ريككه‌فتيگ سياسی.

ئمجا ئی ريككه‌فتنيشه‌ بايه‌سه‌ سێ خاڵ گرينگ له‌تی بوود، ك بايه‌سه‌ يه‌كسه‌ر له‌لايه‌ن حكوومه‌ت به‌غداوه‌ جيوه‌جی بكريه‌ن، يه‌كه‌م: پێشمه‌رگه‌ له‌گشت ئه‌و ناوچه‌يله‌ بميننه‌و ك ئيسه‌ چينه‌سه‌ ناوی، دويه‌م: ده‌سوه‌جی مووچه‌و بودجه‌ی بڕياگ هه‌رێم كوردستان كلبكريه‌يد وه‌ بودجه‌ی پێشمه‌رگه‌يشه‌و، سێيه‌م: ريككه‌فتنيگ موور بكريه‌يد له‌بان كلكردن نه‌فت هه‌رێم كوردستان وه‌ كۆنترۆڵ هه‌رێم كوردستان و وه‌ ئاگاداری كومپانيای نيشتمانی نه‌فت عراق SOMO و به‌شداری حكوومه‌ت هه‌رێم كوردستان.

وه‌نا ئه‌گه‌ر له‌يوا نه‌ود به‌شداری پێشمه‌رگه‌ له‌ په‌لامار ئه‌را بان داعش له‌ ناوچه‌يل سنی ئه‌را حكوومه‌تيگ ك هويچ لايه‌نگرييگ له‌ناو سنی و هويچ خوه‌شه‌ويسييگ له‌ناو كورديش ئه‌رای نه‌مه‌ندگه‌ جووريگه‌ له‌ خوه‌يكوشتن سياسی له‌ ناوچه‌گه‌. نادێ سه‌ركردايه‌تی كورد بكه‌فيده‌ ژير كاريگه‌ری ئه‌و دعايه‌ی درووكانيه‌ ك بڕيگ له‌ سه‌ركرده‌يل شيعه‌ی عراق دروسی كردنه‌ ك گوايا ئه‌و پيشكه‌فتن داعشه‌ وه‌پلان كورد بويه‌ ئه‌را هه‌قه‌وكردن له‌ مالكی وه‌ بوونه‌ی بڕين مووچه‌و بودجه‌ی هه‌رێم كوردستان و ريگريكردن له‌ فرووشتن نه‌فت هه‌رێم كوردستان.

ريكخرياگ قاعيده‌و داعش بكه‌فنه‌ هه‌ر وڵاتيگ فريه‌ پيكهاته‌ی ئايينی و مه‌زه‌وی، ناكووكی ناوخوه‌يی فيشتر ئه‌كه‌ن و ره‌سننه‌ی راده‌ی جه‌نگ خويناوی فريه‌ سه‌ختيگ، ئيسه‌يش ك داعش وه‌و هيزه‌وه‌ جاريگتر كه‌فته‌ ناو عراق، دی بايه‌سه‌ چه‌وه‌ڕی فيشتربوين تون وتيژيه‌يل بكه‌يم له‌ ناونی شيعه‌و سنی، ك مالكی ريخوه‌شكردن خاسيگ ئه‌را هاتنيگ سه‌ركه‌فتگانه‌ی داعش كرد ئه‌را ناو عراق وه‌ سياسه‌ته‌يلی له‌ وه‌رانوه‌ر سنی و له‌وه‌رانوه‌ر بڕين گشت داواكاريه‌يل كورد.

ئمجا ئيسه‌يش رييگ فريه‌ ئاسان و ديار هه‌س ئه‌را ئارامه‌وكردن بار عراق، وه‌لی ئه‌و رييه‌ هه‌وه‌جه‌ وه‌ ئه‌قڵيگ فريه‌ خاس ديريد، ك ئه‌ويش گله‌وخواردنه‌ ئه‌را ته‌وافقيگ راسكانی ك هاوبه‌شی له‌ وه‌ڕيه‌وبردن ده‌سڵات وه‌ كرده‌وه‌ بوود نه‌ك وه‌ قسه‌ی بی كرده‌وه‌.

ئاكۆ محه‌مه‌د

ج . أ