ئاینده‌‌مان وه‌‌ره‌‌و كاملا چوود؟!

شفق نيوز

بویچگمانه‌‌ وه‌‌لى ئیمه‌‌ شماره‌‌یگ شیوه‌‌زووان و شماره‌‌یگ پێكه‌اته‌‌ و بڕبڕ مه‌‌ردمیگ دیریمن ك فیشتر له‌‌ هس نه‌‌ته‌‌وه‌‌یى دڵیان ها لاى ئێڵ و هووز خوه‌‌یان و هێمان ئه‌‌و باوه‌‌ڕه‌ لایان پا نه‌‌گرتگه‌‌ ك مانای نه‌‌ته‌‌وه‌‌یى بوین وه‌‌مانای دویركه‌‌فتن له‌‌ زێد و ماوا و میلكان خوه‌‌یان نیه‌‌ و هێمان نیشتمان هه‌ر ئه‌‌و خاكه‌‌سه‌‌ وه‌‌چه‌‌و دویننه‌‌ێ، وه‌‌لى چه‌‌ بكه‌‌یمن؟! خاكمان چنه‌‌ گه‌‌وراس ك كوردێگ نیشته‌‌جاى شار به‌‌دره‌‌ ناتویه‌‌نێ ده‌‌نگێ بڕه‌سنێده‌‌ كوردێگ ئامه‌‌د، وه‌‌ كوردێگ هه‌ولێرى ناتویه‌‌نێ هاوزووان خوه‌‌ى له‌‌ مه‌‌نه‌‌لى بوینێ، و كوردێگ سلێمانى ناتویه‌‌نێ براى خوه‌‌ى ك نیشته‌‌جاى ئیلامه‌‌ بناسێ!

له‌‌ خه‌‌یاڵ خوه‌‌مان یه‌‌ك ملله‌‌تیمن، وه‌‌باوه‌‌ڕ خوه‌‌مان یه‌‌ك قبڵه‌‌ دیریمن، وه‌‌لى له‌‌ مه‌‌یدان ژیان ئى باوه‌‌ڕ و خه‌‌یاڵه‌‌ ئاواره‌‌و بێكه‌‌سه‌‌ و ئه‌‌وه‌‌ى كه‌‌ ده‌‌نگێ بڵێنه‌‌ و باڵاى به‌‌رزه‌‌ غه‌ریبی خوه‌‌نێ و ئی په‌‌یامه‌‌ ڕه‌سنێ ك چه‌‌واشه‌‌ی دڵخوه‌‌شیمان، كورد فیشتر له‌‌ هه‌ر وه‌‌ختێگ بێكه‌‌سه‌‌.

ئیمه‌‌ ملله‌‌تێگ دیریمن ك تویه‌‌مێگ هاده‌‌سێ، وه‌‌لى ناتویه‌‌نێ له‌‌ بان خاك خوه‌‌ێ بكاڵێده‌‌ى و زووانیگ دیریمن ك ناخوازیمن وه‌‌ده‌‌نگ بڵێن باس هویره‌‌یلمان بكا.

ئیوه‌‌و وژداندان..! ئى هه‌مگه‌‌ێ وشه‌‌یل په‌‌تیه‌‌، ئى هه‌مگه‌‌ێ هویره‌‌یل ته‌‌ڕ و تازه‌‌، ئى هه‌مگه‌‌ێ ئراده‌‌ى به‌‌ندكریاگه‌‌ له‌‌ناو قه‌‌فه‌‌س ترس و ئى هه‌مگه‌‌ێ مه‌‌ردم سه‌‌رگه‌‌ردانه‌‌ له‌‌ناونى كه‌‌ل و كویچه‌‌یل ئینترنێت و فه‌‌یسبوك و ئى هه‌مگه‌‌ چه‌‌وه‌‌یل زاقه‌‌ له‌‌ وه‌‌راوه‌‌ر كه‌‌ناڵه‌‌یل ئاسمانى و ئى هه‌مگه‌ێ گووشه‌‌یله‌‌ ك هانه‌‌ كه‌‌مین ده‌‌نگه‌‌یل نه‌‌ناس، ئه‌‌را ناتویه‌‌نن شۆڕشێگ ئه‌‌را زینگه‌‌وكردن ئه‌‌وه‌‌ی ك مه‌‌نیه‌‌ له‌‌ زووان و تاریخ و له‌‌ باوه‌‌ڕه‌یلیگ ك تویه‌‌نێ ئاینده‌‌ و ئمڕوومان وه‌‌یه‌‌ك بڕه‌سنێ وه‌‌رپا بكه‌‌ن؟!.

خوه‌‌دان و وژداندان..! ئى مه‌‌ردم خوه‌‌مانه‌‌ ئه‌‌را ‌تویه‌‌نن له‌‌ هه‌ر گووشه‌‌یگ دنیا وه‌‌ل گشت مه‌‌ردمێگ بوه‌‌نه‌‌و سه‌‌ر و زووانیان و فه‌‌رهه‌‌نگیان بگرنه‌‌و، وه‌‌لى ناتویه‌‌نن وه‌‌ل خوه‌‌یان و هاوزووان خوه‌‌یان تاویگ بوه‌‌نه‌‌و سه‌‌ر؟!.

ئه‌‌و ڕووژه‌‌یل ته‌‌نیاییه‌‌ خه‌‌مه‌‌و هویر ك له‌‌ سكوت غوربه‌‌ت ده‌‌نگ ئاشنایگ گه‌‌وراترین خه‌ڵاته‌‌، ئه‌‌و وه‌‌خته‌‌یله‌‌ خه‌‌مه‌‌و هویر ك له‌‌بان دیوار سه‌‌رد غوربه‌‌ت ناو ئاشنایگ وه‌‌گه‌‌رمى خوه‌‌نیمن، ئه‌‌و ڕووژه‌‌یله‌‌ خه‌‌مه‌‌و هویر ك له‌‌ناو هات و هاوار بازاڕ، فرووشیار وه‌‌ده‌‌نگ به‌‌رز هاوار ئه‌‌كا ئى كاڵا خۆماڵیه‌‌ و ئى وه‌‌خته‌‌یلیشه‌‌ خه‌‌مه‌‌ هویر ك وه‌‌لاى یه‌‌ك گوزه‌‌ر ئه‌‌كه‌‌یمن، بێ ئه‌‌وه‌‌ى ك یه‌‌ك بناسیمن! بێ ئه‌‌وه‌ێ ك گووش ئه‌‌را یه‌‌ك بته‌‌كنیمن!.

تا دویه‌‌كه‌‌ شه‌‌فه‌‌ق، له‌‌ جه‌‌نگ تیرۆریسته‌‌یل بى، ئمڕوو ده‌‌وڵه‌‌ته‌‌یلیش هاتنه‌‌سه‌‌ جه‌‌نگێ؛ ئاینده‌‌مان وه‌‌ره‌‌و هه‌رلا بچوود ئى زووانه‌‌ وه‌‌ل خوه‌‌مانا به‌‌یمن و چه‌‌نێ تر چه‌‌پاومان بكه‌‌ن، ناتویه‌‌نن ناسنامه‌‌مان له‌‌لیمان بگرن، چونكه‌‌ ئیمه‌‌ وه‌‌ى زووان و ناسنامه‌‌ هایمنه‌‌ پاوه‌‌.

 

عه‌‌لی حوسێن فه‌‌یلى