كاریگه‌رى فیلم له‌بان كومه‌ڵگا

شفق نيوز

راده‌ى ئى كاریگه‌ریه‌ له‌مه‌یدان فه‌رهه‌نگ و كلتوور و كرده‌وه‌و باوه‌ڕ دوینه‌ر وه‌ گووره‌ى ته‌ماشاكردن فیلمه‌یل تیه‌یگه‌ ده‌س.

له‌ڕاسى جه‌هان ئمڕوو ئیمه‌ به‌سیاسه‌ دونیاى ره‌سمه‌یله‌وه‌، ئاده‌میزاد ئى سه‌رده‌مه‌ هه‌ر له‌ قوناغ مناڵى وه‌ل ره‌سمه‌یلا گه‌ورا بووگ، ك به‌رنامه‌یل ته‌له‌فزیۆن هه‌ر له‌ فیلم ریكلامى بگر تا زنجیره‌ درامیه‌یل، كاریگه‌رى فره‌ گه‌ورایگ دیرن له‌بانى و كاریگه‌رى دیرن له‌ په‌روه‌رده‌كردن كه‌سایه‌تى مناڵ له‌ دویاڕووژ.

بیگومان گشت میدیایه‌یل وه‌ تایبه‌ت ته‌له‌فزیۆن ك یه‌كیگه‌ له‌و وه‌سیله‌یله‌ ك ساڵه‌یل فره‌یگه‌ له‌ناو كومه‌ڵگا شوون خوه‌ى كرده‌سه‌وه‌و بویه‌سه‌ یه‌كیگ له‌ ره‌فیقه‌یل كویه‌ن ئاده‌میزاد، كاریگه‌ گه‌ورایگ دیریگ ، ئنجا وه‌داخه‌وه‌ ئیمه‌ له‌و كومه‌ڵگا ژیه‌یم ك مه‌رزیگ دانه‌نریاگه‌ ئه‌را ته‌ماشاكردن به‌رنامه‌یل ته‌له‌فزیۆن، ك وه‌ختى درامایگ یا به‌رنامه‌یگ په‌خش كریه‌یگ گشت ئه‌ندامه‌یل خیزان ته‌ماشاى كه‌ن و ئه‌وه‌ له‌وه‌رچه‌و نیه‌گرن ك ئى به‌رنامه‌ ته‌نیا ئه‌را عومریگ دیاریكریاگ هاوریاسه‌ به‌رهه‌م، بیگومان یه‌یش ره‌نگه‌وداین خراویگ له‌لى كه‌فیگه‌وه‌، ئنجا وه‌داخه‌وه‌ مناڵه‌یل زیاتر له‌ ئه‌ندامه‌یل تر خیزان كیشه‌ ئه‌ڕایان دروس بووگ و كاریگه‌رى خراویگ دانه‌یگ له‌بان روح و ده‌روینیان.

هه‌ر له‌وه‌ر ئه‌وه‌یش ماوه‌ى چه‌ن ساڵیگه‌ له‌وڵات ئیمه‌ ره‌سانن یا ئعلام په‌ره‌ وه‌پى دریاگه‌و یه‌یش مایه‌ى خوه‌شحاڵیه‌ ك ئیمه‌یش وه‌ك وڵاته‌یل تر دونیا تویه‌نیم له‌ناو قه‌یرى به‌رنامه‌ ئه‌و به‌رنامه‌ ئه‌ڵوژنیم ك وه‌ل هویر وباوه‌ڕمانا بگونجیه‌یگ  و ته‌ماشاى بكه‌یم، وه‌لى له‌لایگ تره‌وه‌ جى داخه‌ ئیمه‌ وه‌ك وڵاته‌یل پیشكه‌فتگ كلتوور و فه‌رهه‌نگ وه‌كارهاوردن دروس ته‌له‌فزیۆن نه‌یریم و هویچ هه‌وڵیگیش نیه‌دریه‌یگ ئه‌را ئه‌وه‌ك ئى فه‌رهه‌نگ و كلتووره‌ له‌ناو كومه‌ڵگا په‌ره‌ وه‌پى بدریه‌یگ  تا ئه‌و كاریگه‌رى خراوه‌ ك دیریگه‌ى له‌بان جایه‌ڵ و مناڵه‌یلمان كه‌مه‌و بكریه‌یگ.

كه‌ناڵه‌یل ته‌له‌فزیۆنى بایه‌سه‌ ئى خاڵه‌ له‌وه‌رچه‌و بگرن ك له‌كومه‌ڵگاى ئیمه‌ مه‌رزیگ نیه‌ ئه‌را ته‌ماشاكردن به‌رنامه‌یل و هه‌وڵ دروسكردن ده‌سه‌ى شاره‌زایگ بیه‌ن له‌ى مه‌یدانه‌و گشت به‌رنامه‌و درامایگ په‌خشه‌و نه‌كه‌ن ك وه‌ل كلتوور كومه‌ڵگاى ئیمه‌یا نیه‌گونجیه‌یگ . وه‌ داخه‌وه‌ له‌وه‌ر كزى وڵات ئیمه‌ له‌مه‌یدان به‌رهه‌مهاوردن فیلم و دراما دوینید كه‌ناڵه‌یل ته‌له‌فزیۆنمان په‌نا به‌نه‌وه‌ر په‌خشكردن داماى وڵاته‌یل ترن ك كلتووریان جیاوازه‌ وه‌ل كلتوور ئیمه‌یاو هویچ له‌یه‌كه‌وداینیگ له‌بان ئه‌و فیلمه‌یله‌ نیه‌كریه‌یگ ك ئایا تا چ ڕاده‌یگ كاریگه‌رى خراو دیریگ له‌بان كومه‌ڵگامان؟ یا ئایا تا چ ڕاده‌یگ تویه‌نیگ كاریگه‌رى خاس داشتووگ له‌بان كومه‌ڵگاى خوه‌مان؟ یا ئایا تویه‌نیگ وه‌ل باوه‌ڕه‌یل كومه‌ڵگاى ئیمه‌یا بگونجیه‌یگ ؟ هه‌ر له‌وه‌ر ئه‌وه‌یش دوینید فره‌ وه‌ گورجى ئه‌و فیلمه‌یله‌ دۆبلاج كزیگ ئه‌راى كه‌ن و ره‌وانه‌ى كه‌ن ئه‌ڕا په‌خشكردن وه‌بى ئه‌وه‌ك بزانن ك ئى فیلمه‌یله‌ كاریگه‌رى خراویگ دیرن له‌بان جایه‌ڵ جوانه‌یل و مناڵه‌یل كومه‌ڵگا، ئنجا ئه‌رك گشت چین و لایه‌نه‌یل كومه‌ڵگاس هه‌وڵ بیه‌ن ئه‌را ئه‌وه‌ك فه‌رهه‌نگ و كلتووریگ دروس بووگ ك هه‌م كه‌ناڵه‌یل ته‌له‌فزیۆن به‌رنامه‌یلیان دیارى بكه‌ن ئه‌را عومر گونجیاگ و له‌وه‌خت گونجیاگیش ئه‌و به‌رنامه‌یله‌ په‌خشه‌و بكه‌ن و هه‌م خیزانه‌یلیش هه‌وڵ بیه‌ن مناڵه‌یلیان هووكاره‌ بكه‌ن ك ئه‌و به‌رنامه‌یله‌ ئه‌را عومر ئه‌وان نیه‌وگ و ته‌ماشاى نه‌كه‌ن، به‌ڵكوو وه‌خت خوه‌یان دابنه‌ن ئه‌را به‌رنامه‌ى تایبه‌ت وه‌خوه‌یان.