سه‌رده‌م دروو

شفق نيوز

ئيمه‌ زانيم ك ئمڕوو عراق وه‌ بار سه‌ختيگ گوزه‌ر ئه‌كاو شه‌ڕ و كوشتار بی ئامانيگ يه‌قه‌ی ملله‌ته‌گه‌ی كرتگه‌و رووژانه‌يش ده‌يه‌ها و بگر سه‌دان هاووڵاتی بيتاوانيش كوشيه‌ن و گيريه‌ن و رواكريه‌ن و قه‌تڵ وعام كريه‌ن و ته‌نانه‌ت مناڵ و پيره‌يليش سزا دريه‌ن و هه‌زاران ئافره‌تيش ده‌سوه‌سه‌ر كريانه‌ له‌ زيندانه‌يل زووره‌ملی ترۆريسته‌يل ريكخرياگ داعش و شوونه‌يل وه‌رفراوانيگ خسته‌سه‌ ژير كۆنترۆڵ خوه‌ی.

ئه‌ڵڵاجه‌وی ها له‌ورا تا ئيسه‌ هيمان ئه‌مريكاو وڵاته‌يل هاوپه‌يمانی و هيزه‌يل سوپای عراقی و له‌ی دوياخريشه‌ هيزه‌يل مه‌ردم(الحشد الشعبی)و بوردمانكردن رووژانه‌ی هيزه‌يل ئاسمانييش وه‌ يه‌كجاری بنبڕ ئی هيزه‌يل شه‌يتانی داعشه‌ نه‌كردنه‌و له‌ولايشه‌و هيز پێشمه‌رگه‌ی كوردستانيش كه‌فته‌سه‌ جه‌نگ و هه‌وڵ ئازادكردن ناوچه‌يل كوردستانی ده‌يشت هه‌رێم و تا ئيسه‌يش جه‌نگ و كوشتار هه‌ر وه‌رده‌وامه‌.

ئه‌گه‌ريش گووش بيه‌يمنه‌ لێدوان سياسی و گفت وه‌رپرسه‌يل عراقيش، دوينيم ك ئه‌وانيش هه‌ر هانه‌ هووڵ بردن مال مفت و تاڵانكردن دارايی ملله‌ت و هويچ وه‌ختيگ هه‌وڵ ئه‌وه‌ نه‌يانه‌ به‌رژه‌وه‌ندی ملله‌ت بخه‌نه‌ نوای به‌رژه‌وه‌نديه‌يل خوه‌يان و دروو بويه‌سه‌ به‌شيگ له‌ ژيان رووژانه‌يان!

وڵاته‌يل گه‌وراهيز و ده‌وڵه‌ته‌يل هاوسای عراقيش هه‌ر يه‌كيگ له‌ليان وه‌ جووريگ پلان سه‌ركه‌فتن مه‌رامه‌يلی داناگه‌ ك هويچ وه‌ختيگ جه‌نگ يه‌قه‌ی ئی وڵاته‌ وه‌رنه‌يه‌يدو خه‌ير و به‌يره‌گه‌ی ئه‌را ئه‌وان بوود، چوينكه‌ هه‌رچه‌نی له‌ كۆنگره‌ی و دانيشتنه‌يليان باس له‌ به‌شداری دژايه‌تی ترۆر ئه‌كه‌ن، وه‌لی له‌هه‌مان وه‌خت ئاماده‌يش نين له‌بان زه‌وی واقع جيوه‌جی قه‌وڵه‌يليان بكه‌ن، ك يه‌يش بيجگه‌ دروو هويچ هه‌ڵويستيگ تر ئنسانی له‌لی نه‌كه‌فته‌سه‌و.

له گشت ئه‌يانه‌يش درووتر ئه‌وه‌سه‌ ك خود حكوومه‌ت ناوه‌ندی چ ئه‌وساو چ ئيسه‌ ده‌سه‌خڕه‌ی ئی ملله‌ته‌ كردگه‌ وه‌ قه‌وڵ و گفته‌يل دروو! نه‌ يه‌ی دڵی له‌و باقی هاوپه‌يمانه‌يلی پاكه‌، نه‌ ئه‌وانيش متمانه‌ وه‌پی ديرن. چاره‌نويس مه‌ردميش زينگ وه‌چاڵ كردنه‌و به‌ش فريه‌يگ له‌ درامه‌ت ودارايی ئی وڵاتيشه‌ له‌ ئاكام ناكووكی وكيشمه‌يكش يه‌كتری كردنه‌ نسيو ترۆريسته‌يل له‌وه‌خت زاڵبوينيان له‌بان شار موسڵ و شوونه‌يل تر عراق.

كيشه‌گه‌ ها له‌ورا گشت ئوميد و ئه‌زره‌تيگمان له‌ سايه‌ی دروو ژيه‌يدو خوه‌شباوه‌ڕی ئاده‌ميزاديش له‌يوا كردگه‌ فيشتر چه‌وه‌ڕی مه‌ينه‌تی و كاره‌سات بكريه‌يد وه‌بی گووشداين وه‌ بنياتناين ئاينده‌يگ دوير ده‌رده‌سه‌ری و دروو.

دانيال حه‌سه‌ن

ج . أ