چوار ژن و یه‌ك پیاو!!
كاريگ فريه ئاسان نيه پياو بتويه‌نيد وه يه‌كسانی و گونجيان وه‌ل هه‌ر چوار ژنه‌گه‌ی هه‌ڵسووكه‌فت بكا، چوينكه شايه‌ت سروشت و ره‌فتار و په‌روه‌رده‌ی هه‌ر يه‌كيگ له‌و ژنه‌يله له ماڵ باوگيان يا وه‌رجه ئه‌وه‌ك شوی وه كابرا بكه‌ن جوراوجوور بدێ و هه‌ر يه‌كيگ له‌ليان له كه‌ش وهه‌وايگ جيا ژياويد و په‌روه‌رده كرياويد.
راسه پياو ئه‌تويه‌نيد چوار كراس ئه‌را هه‌ر چوار ژنه‌گه‌ی بسينيد جوور يه‌ك، يا چوار گووشخاره‌ی ته‌ڵا ئه‌را هه‌ر چواريان جوور يك بسينيد يا چوار غورفه‌ی خه‌فتن ساز بكا ئه‌را هه‌ر يه‌ك له‌و ژنه‌يله، وه‌لی ئايا چوين ئه‌تويه‌نيد هس خوه‌شه‌ويسی خوه‌ی دابه‌ش بكا له‌بان چوار ژن؟
ئه‌يه كاريگ قورسه‌و ناتويه‌نيد وه‌هويچ شيوه‌يگ جيوه‌جی ئی ئحساسه بكا، چوينكه ژنه‌يل گشتيان جوور يه‌ك نين، ژن هه‌س وه نازه، ژن هه‌س مه‌كربازه، ژن هه‌س خوه‌ی نيشان ئه‌ياد و هس خوه‌شه‌ويسی ده‌رئه‌خاد، ژن هه‌س ژانه جوور ئه‌وه‌ك پيشينه‌يل وتنه(ژن هه‌سه‌و ژانيش هه‌س). ژن هه‌س ماف خورياگه، ژن هه‌س رووشنهويره، ژن هه‌س كه‌سايه‌تی كزيگ ديريد و متمانه وه خوه‌ی نه‌يريد و بی ده‌نگه‌و رازيه وه‌گشت چشتيگ، ژن هه‌س بشيوونه‌و حه‌زه‌و ئاژاوه‌س، ژن هه‌س نه‌رم و ئارام وشه‌رمنه، ژن هه‌س چالاكه، ژن هه‌س ته‌مه‌ڵه، ژن هه‌س فريه راسگووه، ژن هه‌س قسه‌يلی دويرن له‌ڕاسی.
هه‌ر وه‌و خاتريشه هويچ پياويگ ناتويه‌نيد وه يه‌كسانی و دادگه‌ری وه‌ل چوار ژنه‌گه‌ی هه‌ڵسووكه‌فت بكاو بجويليه‌يد، گشت ژنه‌يل له شيواز ره‌فتار و هه‌ڵسووكه‌فت و روخسار جياوازن وه‌ل يه‌كتری، مانای ئه‌وه‌سه يه‌يش به‌شيگه له‌و تون وتيژيه‌يله ك دژ وه ژنه‌يله ئه‌نجام ئه‌دريه‌يد و ئه‌كه‌فيده چوارچيوه‌ی پاشيلكردن مافه‌يل ژن.
بێريڤان سه‌رهه‌نگ
ج . أ
