كورد، چاره‌سه‌ره‌ یا كێشه‌؟

شفق نيوز

په‌یا بویه‌، چه‌ن سفه‌تیگ ستراتیجى و جیۆسیاسى دیرێد له‌بان خوه‌رهه‌ڵات ناوین و گشت ناوچه‌گه‌، له‌یره‌ ملله‌تیگ هه‌س شوماره‌ى زیاتر له‌ چل ملیۆنه‌و دابه‌ش بویه‌ له‌ناونى توركیاو ئیران و عراق و سوریا، ئى چوار وڵاته‌ تا تویه‌نستنه‌ سته‌م له‌ى ملله‌ته‌ كردنه‌ ك ماوه‌ى چه‌ن سه‌ده‌یگه‌ وه‌بى ئه‌وه‌ك هویچ وڵاتیگ مقه‌یه‌تى له‌لى بكا مه‌ندگه‌، هه‌ر له‌وه‌ر ئه‌وه‌یش په‌نا بردگه‌سه‌ وه‌ر گشت هووكاریگ  ئه‌را مقه‌یه‌تیكردن خوه‌ى له‌ سته‌م ئه‌و ده‌وڵه‌ته‌یله‌ ك بازى وه‌ چاره‌نویسى كردنه‌.

وه‌لى ئمڕوو بنه‌مایه‌یل بازى سیاسى ئاڵشت بویه‌و كورد تویه‌نستگه‌ ئسبات ئه‌وه‌ بكا ك به‌شیگه‌ له‌و بازى خوه‌رهه‌ڵات ناوینه‌و هێزیگ كاریگه‌ره‌ ئه‌را دروسكردن هاوسه‌نگى له‌گرنگترین چوار وڵات ناوچه‌گه‌و ئه‌گه‌ریش له‌ڕوى سیاسى و ئابوورى و سه‌ربازى و مه‌ردمیه‌و گوزارشكردنه‌گه‌ راس بوود ئه‌وه‌ كورد به‌شیگه‌ له‌ چاره‌سه‌ر نه‌ك به‌شیگ له‌ كێشه‌. كورد ئسبات ئه‌وه‌یش كرد ك تویه‌نێ بووده‌ هێزیگ سیاسى قسه‌ ژنه‌فیاگ له‌ وڵاته‌یل یه‌كگرتگ و ده‌وڵه‌ته‌یل خوه‌رئاواو تواناى جیوازكردن دیرێ له‌ كار سه‌ربازى رێكخریاگه‌یله‌و ئه‌را كار سیاسى و رێكخریاگه‌یل تر.

هه‌وڵ كیشان كورد ئه‌را ناو كیشمه‌كیش چه‌كداریه‌ بیجگه‌ هه‌وڵیگ ئه‌را فراوانكردن بازنه‌ى جه‌نگ چه‌كدارانه‌ له‌ دژ كورد له‌ ناوچه‌گه‌ هویچ تر نییه‌، ك چه‌ن هێزیگ له‌ى چوار ده‌وڵه‌ته‌ هانه‌ پشتى و له‌وه‌رجه‌ گشتیانیش توركیا، چوینكه‌ دویاى سه‌ده‌ها ساڵ له‌ چه‌وساننه‌وه‌ى ئى ملله‌ته‌و بیبه‌شكردنى له‌ هه‌قه‌یل رووشنهویرى و سیاسى و نیشتمانى و ئنسانى مه‌ردمانیگ هه‌ن جاریگ تر هه‌وڵ بیبه‌شكردن ئى نه‌ته‌وه‌ ده‌ن له‌ داواكردن هه‌قه‌یل ره‌واى و هه‌وڵ كیشانن كورد ده‌ن ئه‌را ناو كیشمه‌كیش چه‌كدارانه‌ له‌وه‌ر خاتر له‌ناوبردن قه‌واره‌گه‌ى وه‌ هه‌ر شیوه‌یگ .

له‌ڕاسى ئیسه‌ په‌ره‌سه‌ندن تازه‌ هاتگه‌سه‌ وجوود، وه‌تایبه‌ت له‌ى دویاخره‌، ك وه‌ل ئاڵشتكردن خاك سوریا ئه‌را شانۆگه‌رییگ ك هه‌ركه‌سیگ بخوازێد بازى له‌تى ئه‌كاو هه‌ر لایه‌نیگ هه‌وڵ نه‌فوه‌رگرتن له‌ى ده‌رفه‌ته‌ ئه‌یاد ئه‌را وه‌دیهاوردن قانجاز له‌ گشت بواره‌یل له‌سایه‌ى په‌رووشى كورد ك ئه‌ڕاچه‌ نه‌چینه‌سه‌ ناو ئه‌و كوشت و كوشتاره‌یله‌ ك روى ئه‌یاد له‌ناونى سوریاو هێزه‌یل چه‌كدار ئۆپۆزسیۆن و گرووپه‌یل جیهادى و ئسلامیه‌یل و لایه‌نه‌یل ده‌ره‌كى جوور توركیا، ك هه‌وڵ فره‌یگ ئه‌یاد كورد بكیشێده‌ ناو ئه‌و جه‌نگ ناوخوه‌ییه‌ جوور ئه‌وه‌ك له‌ ناوچه‌ى ئه‌شره‌فیه‌و شێخ مه‌قسود له‌ حه‌له‌ب و ناوچه‌ى سه‌رى كانى رویدا. وه‌ل ئه‌وه‌یشا بوردمانه‌یل توركیا ئه‌را ناو سوریا ئه‌را بان ناوچه‌یل كورد ك كه‌ناڵه‌یل میدیایى باسى ناكه‌ن و ته‌نیا چه‌وه‌ڕێ ئه‌وه‌ كه‌ن باس له‌ جه‌نگ ناونى سوپاى ئازاد و گرووپه‌یل كوردى بكه‌ن!! بیجگه‌ ئه‌وه‌یش هێزیگ تر هه‌س له‌بان مه‌رز ناونى سوریاو توركیا له‌ناوچه‌یل كوردى جیگیر كریانه‌و چه‌وه‌ڕێ فه‌رمانن ئه‌را ده‌سوه‌پیكردن جه‌نگ .

كورد ملله‌تیگه‌ جوور ملله‌ته‌یل تر ناوچه‌گه‌و جه‌هان، جوور ئه‌و ملله‌ته‌یله‌ ك هه‌ق له‌ پیاده‌كردن هاووڵاتیبوین و كار سیاسى و مقه‌یه‌تیكردن زووان و رووشنهویرى و رووڵه‌یلى دیرێد.

كورد كێشه‌ نییه‌، به‌ڵكوو چاره‌سه‌ره‌ له‌ جیوازكردن ئه‌را قوناغیگ ك گشتى وه‌ یه‌كسانى له‌تى بژیه‌ن و هه‌ق داشتوون و ئه‌رك له‌بانیان بوود، وه‌لى ئایا ئى جاره‌ مێژوو دادپه‌روه‌ره‌ وه‌لیا؟ یا جوور هه‌میشه‌ كارت كورد تیه‌رێده‌ كار ئه‌را وه‌دیهاوردن ده‌سكه‌فت تر ئه‌را بڕێگ ده‌وڵه‌ت؟ یا كورد خوه‌یان مێژوو ئه‌را خوه‌یان تومار كه‌ن؟

پترۆس پترۆسیان