زه‌ره‌ر‌ناسی ئه‌ده‌بیات كوردی خوارێن

شفق نيوز

مانا و ئه‌رزشتدان و كارگه‌ری ئێ دو ده‌يه‌ ئڕا هه‌ر مرۆڤ كوردێگ پڕگرانه‌. ئه‌ڵبه‌ت هه‌رچه‌ن ك دێر بويه‌‌ به‌ڵام چه‌ بكه‌یم ك چاره‌ێ ملله‌ت خوه‌مان وه‌ ده‌س كه‌سه‌یل تر بويه‌‌! ئێ ده‌رفه‌ته‌ ئڕامان نه‌قومیاويد یا نه‌یشتوين ك ئێ زووان و ئه‌ده‌بیاته‌ خوه‌‌ێ بناسنێد، تا یه‌گ دیرووك جارێتر و وه‌ شێوه‌ێ تر له‌‌ێ دو ده‌يه‌ ئافرانده‌ بوى...

 

مرۆڤ له‌ دریژایی ژیانێیا په‌یوه‌ندی دو لاێه‌نه‌ێ وه‌ل مقوله‌ی فه‌‌رهه‌‌نگا دێرێ. له‌ لاێگه‌وه‌ كه‌فێده‌ ژێر كاركرد فه‌رهه‌نگ و له‌ لاێگیشه‌وه‌ خوه‌ێ له‌ سه‌ر فه‌رهه‌نگ كار كه‌ێد و كاريگه‌ری و ئاڵشتكاریه‌یلێ له‌ سه‌رێ دێرێ. ئاكام ئێ كار كردنه‌ له‌ ڕوى نه‌وه‌ێ بانان كاريگه‌ری دێرێ و له‌ێواسه‌ ك فه‌رهه‌نگ په‌ێوه‌ندیده‌ر نه‌وه‌یل ویه‌رده‌ و ئێسه‌ و بانانه‌. له‌ لاێگه‌وه‌ له‌ ئستێماره‌ و له‌ لاێگیشه‌و خه‌ریك ئاڵشته‌وبوينه‌.

ئويشن: ئاێه‌میزاێ فه‌رهه‌‌نگ دروس كه‌ێد و فه‌رهه‌‌نگیش ئاێه‌م سازێ، ئێ وته‌‌ێ ساده‌، ناوه‌ند فره‌ گه‌وراێ فه‌رهه‌‌نگ ده‌سنیشان كه‌ێ.

فره‌ له‌ مامۆستايه‌یل و زووانناسه‌یل كورد و جیا له‌ كورد ك دیرووك و ئه‌ده‌بیات و زووان كوردی خوه‌نینه‌ له سه‌ر ئێ باوه‌ڕه‌‌نه ك كورده‌یل نه‌ته‌وه‌ێگن ك وه‌ دریژایی دیرووكا وه‌ ناوه‌یل جیاوازه‌و، ناوێیان بويه‌. هه‌ر ئه‌و جووره‌ ك به‌ڵگه‌نامه‌یل و میراته‌یل وه‌ جییه‌ومه‌نێ ئڕا ئیمه‌ دیارییه‌و كه‌ێ، كورده‌یل زیاتر له‌ چه‌ن هه‌زار ساڵه‌ له‌ێ وڵاته‌ ك وه‌ ناو «گاواره‌ێ شارستانیه‌ت و ژیار ئاێميزاد» ناسیاس‌، ژیه‌ن. هه‌ر ئه‌و جووره‌ ك دیرووك ئڕا ئیمه رووشنه‌و كه‌ێ ك له‌ نیشتمان كورده‌یل و رێ و ڕه‌وه‌نه‌یلتر ‌ك داشتنه‌ شارستانیه‌ته‌یل و ژیاره‌یل پێشكه‌فتێ فره‌ێ بوينه،‌ جوور:  شارستانییه‌ت ميزۆپۆتامیا، هیتیه‌یل، هوورییه‌یل، كاردوخییه‌یل، میتانه‌یل، ساسانیه‌یل و... هه‌ر ئه‌و جووره‌ ئایینه‌یل جووراێجوور تر له‌ێ وڵات پان و هه‌ڕاقه‌ بويه‌ و هه‌س، جوور میترائیسم «ئایین په‌رسين‌ خوه‌ر» ، مه‌زدايیسم « ئایین زه‌رده‌شتی»، یه‌هوودیه‌ت، ئسڵام، ئیزه‌دی، یارسان و... یانه‌ گشت ئێ راسییه‌ دیاری كه‌ن ك كورد خاوه‌ن‌‌ ئه‌ده‌بیات و زووان و هویروباوه‌‌ڕ ده‌ژ و شرینێگه‌ و له‌ رووژهه‌ڵات ناوين دیارییه‌.

سه‌ێر چه‌ن مه‌مه‌ريگ بكه‌يمن و بزانیم ئڕا ئه‌د‌ه‌بیات كوردی خوارێن له‌ یه‌ووه‌ر پێشنه‌كه‌فتێیه‌ و ئه‌وزینه‌ نه‌كردێه‌ و وه‌ێ جووره ده‌مه‌کی مه‌نيه‌.‌

مدووه‌یل دوياكه‌فتن ئه‌ده‌بیات و زووان كوردی خوارێن

1– كار نه‌کردن له‌ بان ئه‌ده‌‌بیات نويسانن وه‌تایبه‌ت ئه‌ده‌بیات فۆلكلۆریك ك میر‌‌ات ئێ ملله‌ته‌سه‌؛‌ ئه‌وه‌یش ئه‌د‌‌ه‌بیات ملله‌ت كورد ك له‌ هه‌ر باوه‌تێگه‌و شرین بێهاوتاس. هه‌‌ناێ ته‌ماشاێ ویه‌رده‌ێ خوه‌مان كه‌ێمن، جوور ئه‌ده‌بیات ده‌مه‌کی سێ سه‌ده‌ێ له‌ێه‌وه‌ر ناوچه‌یل ئیلام و كرماشان و وه‌ل ئه‌دبیات نه‌ته‌وه‌ته‌یل ترا هه‌ڵسه‌نگنیمن ئه‌و ئانه‌سه‌‌ له‌ ماناێ شارستانیه‌ت و ئه‌ده‌بیات ملله‌ت كورد ره‌سیمنه‌و (یه‌کێ له‌ ره‌فيقه‌یلم ک زووان فه‌ره‌نسه‌ خوه‌نیه‌، رووژێ له‌ زانکووێ بووعه‌لی هه‌مه‌دان داوه‌ت بوى و وتارێگ له‌ سه‌ر ئێ گه‌په‌ نويساويد«له‌يه‌كه‌وداين شێعر کوردی خوارێن وه‌ل شێعر فه‌ره‌نسه‌یا له‌ سێ چوار سه‌ده‌ێ وه‌رين» هه‌‌ناێ شێعره‌گان هه‌ڵسه‌نگانم، دیم ک ئێ نه‌ته‌وه‌‌ێ گوم بوى له‌ دیرووكه‌ چ ئه‌ده‌بیاتێگ داشتێیه‌.

2– له‌ێه‌ وه‌ر له‌ ناو بنه‌ماڵه‌یل گه‌ورا و خان وخه‌وانیه‌یل له‌ زووان كوردی ئڕا نويسان ئیستفاده‌ نه‌كردنه...‌

3– نه‌خوه‌نده‌واری زوورم خه‌ڵك(تود‌ه‌ عام)

4 - رووشنهويره‌یل له‌ێه‌وه‌ر كورد ده‌سماێه‌ێ رووشنهويری خوه‌ێان ئڕا ئه‌دەبیات تر وه‌ كار بردنه‌ و ئه‌ده‌بیات خوه‌ێان وه‌ ده‌سكه‌م گرتنه‌ و فره‌ ئڕاێان گرنگ نه‌ويه‌

5 – كاريگه‌ری سیسته‌م ده‌سه‌ڵاتداری ره‌زاخان له‌ ناوچه‌ كوردنشینه‌گان، واوڕێز له‌ كرماشان، ك ژینۆساید فه‌رهه‌نگی ئێ ناوڕووه‌ چووده‌و وه‌ سه‌رده‌م زڵم و زوور ئه‌و.

6 - دێر ده‌س وه‌ كار بوين ئڕا رێنــويس هاوبه‌شێ له‌ ناوه‌ێ كورده‌یل پارێزگایل ئیلام و كرماشان، چوين ئیمه‌ ئه‌یه‌ دو ده‌يه‌س دێریمن وه‌ رێنويس كوردی ده‌ق و وتار نويسیمن، وه‌لی ئێ كاره‌ له‌ ناو وڵاته‌یل تر زويتر ئه‌نجام درياس‌ جوور رێنويس ئه‌لف ‌و بێ ئه‌مریكایی ك مسیوونر مه‌سیحی له‌ ساڵ 406 زایینی وه‌ بوونه‌ێ به‌ڵگه‌ كردن ده‌قه‌یل مه‌زهه‌بی ئێ رێنــويسه‌ وه‌ كار برد، هه‌ر ئه‌و جووره‌ له‌ ناو عه‌ره‌‌به‌یل له‌ رێ ئایینه‌وه‌ جوور كتاو قورئان ك وه‌ زووان نويسان عه‌ره‌به‌یل ك زووان گشتێ عه‌ره‌به‌یله‌ نويسریاس.

7- نه‌ياشتن هووكاره‌كردن یا فێرگه‌ێ وه‌ زووان كوردی خوارێن

8 - نه‌ياشتن سینه‌ما و شانۆ کوردی ك بتويه‌نێ ئێ ملله‌ته‌ وره‌و شارستانیه‌ت مه‌یله‌واره‌و بكه‌ێد، چوينكه‌ وه‌ڕاسی سینه‌ما و تلڤزیوون كاريگه‌ری گه‌وراێ دێرێ له‌ بان كوومه‌‌ڵگا.

9 - ئه‌رزشت نه‌يان وه‌ ئه‌ده‌بیات نويسه‌كی له‌ سه‌ده‌ێ بیسه‌م، جوور كه‌سه‌یلێ ك له‌ نیم سه‌ده‌ێ گوزه‌يشته‌ هویر و هه‌ست كوردایه‌تی له‌ ناو زووان تر له‌ رێ مه‌ته‌ڵ و هه‌ڵبه‌سته‌و وه‌ كار بردن، ئه‌گه‌ر ئه‌وان ئه‌و سه‌رده‌مه‌ خزمه‌تێ وه‌ ئه‌ده‌بیات و كتاوخانه‌ێ كوردی بكردیان لانكه‌م ئێ كێشه‌(گیچه‌ڵه‌‌) وه‌ئێ شێوه‌‌ ك هه‌س، نه‌وى

10 – ناوچه‌خوازی شاعێره‌یل و نويسه‌ره‌یل ئێ دو پارێزگا‌ - ئه‌وه‌یش له‌ پان‌ئێرانیسته‌یله‌وه‌ - ، ك ئێ نويسه‌ره‌یله‌ ته‌نانه‌ت وه‌ هس ناسیونالیزمی نه‌ڕه‌سینه‌و وه‌ره‌و ئانارشیست مه‌یله‌واره‌و بوينه‌

11– ئاگاهی و شاره‌زايی كه‌م نويسه‌ره‌یل كورد وه‌ ئه‌ده‌بیات جه‌هان

12– نه‌ياشتن كتاوخانه‌ێ كوردی ك لانكه‌م كتاوه‌یلێ ك وه‌ێ شێوه‌زاره‌ چاپ كريانه‌، بارن

13– نه‌وين رووژنامه‌، هه‌فته‌نامه‌، مانگنا‌مه‌ێ ك ده‌رده‌یل ئێ ئه‌ده‌بیاته‌ بويشێ

14– نه‌نويسان وه‌ێ زووانه‌ ك وه‌پێ قسه‌ كه‌یمن

15– نه‌نويسان وتار(مه‌قاڵه)‌، مه‌ته‌ڵ، رۆمان، هه‌ر ئه‌وقه‌ره‌ ك رووشنهویره‌یل ئیمه‌ له‌ سه‌ر ئێ كێشه‌ ورده‌و نه‌وينه‌، كه‌سه‌یل خاواره‌ و لایه‌یل تر تێن و میرات ئیمه‌ وه‌ تاڵان به‌ن، نموونه‌ێ گه‌وراێ یه‌سه‌ ك چه‌ن ساڵ گوزه‌يشته‌ چه‌ن وتار‌ نويسیا و گشت شوونه‌وار و ئاجه‌ته‌یل نقره‌یی ك له‌ ناوچه‌ كوردنشینه‌گان دوینیاوه‌و نریا له‌ میرات ئاشوور و زوورم شوونه‌وار شارستانیه‌ت كورد كریا ناسنامه‌ێ تورك، یا ئه‌گه‌ر (خطوط کلی تاریخ و تمدن ترک) بخوه‌نید ئه‌و ئانه‌ زانی ک نه‌ته‌وه‌‌یل ده‌رهاوسا له‌ بان میرات کورد و گشت شارستانیه‌ته‌یل دنیا چ شانازیێ که‌ن، ئڕا نموونه‌ له‌ ساڵ 1930 وه‌ فه‌رمان که‌ماڵ موسته‌فا ئه‌تاتورک، شوون لوونێ ئڕا دیرووك تورک ده‌سنیشان کریا ک ئێ NGO ه‌، وه‌ سه‌رپه‌ره‌ستی عفت ئینان وه‌ڕێه‌و چێ. ته‌نیا ئامانجییانیش یه‌ بوى ک دیرووك خه‌یاڵیێ له‌ نه‌ته‌وه‌ێ تورک بنويسن و گشت شارستانیه‌ته‌یلێ جوور ميزۆپۆتامیا، هیتیه‌یل، سوومریه‌یل، ئاریاییه‌یل، ئیلام، شارستانییه‌ت چین، ئامریکاێ لاتین و...) بنه‌نه‌ میرات ئه‌وان. هه‌ميش له‌ چه‌ن ساڵ دوياێ ئه‌و کوومه‌ ک ئڕا دیرووك دانان، له‌ ساڵ 1932 شوونێگیش ئڕا ئه‌ده‌بیات و زووان تورک ده‌سنیشان کردن ک ئامانجێیان (ڕیشگناسی زووان تورکی و هه‌ره‌چه‌یلێ ک وه‌‌ل زووانه‌یل ترا دێرێ و وه‌ربڵاو بوين زووان تورکی بوى) یا مووسیقی چه‌ن هه‌زار ساڵه‌‌ێ كورد له‌ پساێ مووسیقیزانه‌یل و ژه‌نیاره‌یل كورد ئڕا بێگانه‌یل‌ لێ ئستفاده‌ كه‌ن و هويچ ناوێ له‌ خاوه‌ن ئه‌و مووسیقیه‌ نییه؛‌ جوور بنه‌ماڵه‌ێ ئاغه‌ێ ئه‌نده‌لیبی و تاتليسس و...

16– نه‌ياشتن ئێتیمۆلۆژیست فره‌ێ ك وه‌ شێوه‌ێ دڵسووزانه‌ێ ریشه‌ و بنچینه‌ێ وشه‌یل كوڕه‌مازگ و ره‌سه‌ن كوردی و غه‌ێركوردیێ ك هاتنه‌سه‌ ناو ئێ زووانه‌ یا وشه‌یلێ ك كوردیین و چێنه‌سه‌ ناو زووانه‌یل تره‌ك شیه‌و بكه‌ن و وه‌ شێوه‌ێ نويسمان بنه‌نه‌‌ێ خزمه‌ت كه‌سه‌یلێ ك له‌ بان ئێ ئه‌ده‌بیاته‌ كار كه‌ن تا ئه‌وانیش كه‌متر تــويش هه‌ڵه‌ بوون؛ چوين فره‌ وشه‌ێ كوردی چێیه‌سه‌ ناو زووانه‌یل و ئه‌ده‌بیاته‌یل تر ك ئه‌وان وه‌ پێیانه‌و شانازی كه‌ن و خوه‌ێان وه‌ خاوه‌ن ئه‌و وشه‌یله‌ زانن جوور:

(بارز) ئێ وشه‌ له‌ به‌رز كوردی وه‌ڕگيرياس‌‌

(ماێه‌شت) ئێ وشه‌ هويچ هه‌ره‌چێ وه‌ل «ماهیدشت»ا  نه‌ێرێ و له‌ وشه‌ێ ( مای یا ماد + ده‌شت) وه‌ ماناێ ده‌یشت ماد ئاویتار بويه‌

(لێوان) ئێ وشه‌ له‌ (لێو+ وان) هاميته‌ بويه.‌ ( لێو = لب) و (وان = بان) پاشگر جه‌مێگه‌ له‌ زووان كوردی

(مه‌له‌وان) ئێ وشه‌‌ ك له‌ شوونه‌یل تر ناوڕوو كوردنشین مه‌لیه‌وان یش وه‌پێ ئويشن ك هاوتاێگه‌‌ ئڕا (شناگر) فارسی، ئێ وشه‌ له‌ (مه‌له‌ + وان ) ئامێته‌ بويه‌  ك مه‌له‌ له‌ زووان فارسی بووده‌ (شنا) و (وان)یش پێشگر‌ێگه‌ له‌ زووان كوردی وه‌ ماناێ (بان) یا (نگهبان)

و...

17- پسپووڕ(تاقیكار) كوردێ ك له‌ كار خوه‌ێ وه‌ شێوه‌ێ زانستیێ كارامه‌ و زانا نییه‌ ئڕا خوه‌ێ گه‌ورا كردن و منێ منێ كردن و كه‌م ئه‌رزشت كردن ئه‌ده‌بیات و ناسیونالیسم له‌ لاێ خاواره‌ یا پشتیوانی كردن له‌ یه‌ێ فه‌رهه‌نگ عه‌شایه‌ری، هه‌ميش هه‌ساو نه‌كردن میرات نه‌ته‌وه‌ی زیان فره‌ێ ره‌سنێده‌ ئه‌ده‌بیات كوردی

18- نه‌كردن ئه‌ده‌بیات ده‌مه‌كی وه‌ نويسه‌كی؛ من وه‌ێ باوه‌ڕه‌مه‌ ك هه‌ر خه‌ڵكێ ئه‌وه‌یش جوور كورد ك تا ئێسه‌‌ له‌ سه‌ر ئه‌ده‌بیات و فۆلكلۆرێان فره‌ كه‌م كار كردنه‌ له‌یه‌ ئه‌و دويایش ئه‌گه‌ر داته‌ك (قانوون) نويساین وه‌ جی نارن یا رێنويس و رێزووان فره‌ێ وه‌ ئێ شێوه‌زاره‌ نه‌نويسن، ئێ ئه‌ده‌بیاته‌ تــويشْ گیچه‌ڵ فره‌ترێ تێ. هه‌ر ئه‌و جووره‌ ك زانین شێوه‌زاره‌یل تر زووان كوردی جوور سۆرانی ك ئه‌وه‌ێش زاراوه‌ێگه‌ له‌ێ زووانه‌ وه‌ چ مدووێ تـويه‌نسێه‌ له‌ سه‌ده‌ێ بیس و یه‌ك ده‌‌نگ خوه‌ێ وه‌ گووشْ جه‌هان بڕه‌سنێ، وه‌ هه‌ر هاڵ هیچ غه‌ێركوردێگ نه‌هاتێیه‌ و ئێ كاره‌ بكه‌ێ به‌ڵكم ته‌نیا وه‌ یاری و دڵسووزی نويسه‌ره‌یل گه‌وراێ خوه‌ێان بويه‌‌ جوور هێمن، هه‌ژار، گۆران، نالی و... وه‌ نويسه‌ره‌یل هاوچه‌رخ جوور شێركو بێكه‌س، عه‌بدوڵڵا په‌شێو، فه‌رهاد پیرباڵ، شێرزاد حه‌سه‌ن، له‌تیف هه‌ڵمه‌ت، به‌ختێار عه‌لی، ره‌فیق سابير، ئه‌تا نه‌هائی و... ك ئه‌ده‌بیات خوه‌ێان پێشخستنه‌ ئه‌وه‌یش وه‌ شێوه‌ێ ك ئه‌ده‌بیات ده‌مه‌كی له‌ نويسان جیاوه‌ كردنه‌، چوين هه‌ر كام له‌ێ نويسه‌ره‌یله‌ نه‌هاتنه‌ وه‌ زووان لاواز و بێبنه‌ماێ بنويسن یا ئه‌ده‌بیات عه‌شایه‌ریێگ ئافرانده بكه‌ن. ئێسه‌ دوینیمن شاعێرێ جوور شێركو بێكه‌س خه‌ڵات توخولسكی گرێ، ته‌نیا مدووێ ئه‌وه‌سه‌ ك له‌ سه‌ر ئه‌ده‌بیات وه‌ شێوه‌ێ زانستیێ كار كردێه‌ و هويرێ وه‌ره‌و جه‌هانی فكر كردن چێیه‌. یا مه‌ته‌ڵنويس گه‌وراێ جوور شێرزاد حه‌سه‌ن، مه‌ته‌ڵه‌گانێ وه‌ دووانزه‌ زووان زینێ دنیا هه‌ڵگه‌ردیانه‌سه‌و. وه‌داخه‌و ئیمه‌ هه‌رده‌مێ ك خوازیمن له‌ سه‌ر ئێ کیشه‌ێ ‌سه‌خته‌ قسه‌ بكه‌یمن ك كاريگه‌ری فره‌ێ له‌ بانان ئه‌ده‌بیات كوردی خوارێن دێرێ، كه‌سه‌یلێ ك لانكه‌م لایه‌نگر ئه‌ده‌بیاتن – یان هه‌ر له‌ ئه‌ده‌بیات كوردی نه‌ڕه‌سینه‌سه‌و - بوونه‌ دژ ئێ ئامانجه‌نه‌‌ و ئويشن كوردی كه‌ێ ئه‌ده‌بیات نويسه‌كی (نويسین) دێرێ؛ وه‌لی هوير نیه‌كه‌‌ن ئه‌ده‌بیاته‌یل پێشكه‌فتێ دنیا چوين هه‌ڵكڕانن و ئه‌وزینه‌ كردن و وه‌ ده‌س كی ده‌رباز بوينه‌، یا فره‌ دويره‌و نه‌كه‌فیم هه‌ر ئه‌و جووره‌ ك له‌ سه‌ره‌و ئاماژه‌ كردیمن ئه‌ده‌بیات كوردی سۆرانی، كی له‌ پشتێ بوى و بويه‌ بایس پێشكه‌فتنێ؟ ته‌نیا رێكار ئڕا هه‌ڵكڕانن و پێشكه‌فتن ئه‌ده‌بیات كورد خوارێن و لانكه‌م ئڕا یه‌گ كه‌متر بچووده‌ تاڵان یه‌سه‌ ك نويسه‌ره‌یلێ ك وه‌ێ شێوه‌زاره‌ نويسن بان و ئێ كیشه‌یله‌ چاره‌سه‌ر بكه‌ن.

به‌ڵێ خوه‌یشك و براێ نازار، ئێ چه‌ن خاڵه‌ ك له‌ سه‌ره‌و ئاماژه‌‌ وه‌ پێیان كردیمن، له‌ مدووه‌یل پاشكه‌فتن ئه‌ده‌بیات و فه‌رهه‌نگ و زووان كوردی بوين ك ئه‌گه‌ر ئێجوور به‌ردێ وه‌ مل ئه‌ده‌بیات كورد خوارێنا نه‌هاتیاد، ئێ ئه‌ده‌بیاتیشه‌ ئێرنگه‌ جوور ئه‌ودوياێ ئه‌ده‌بیاته‌یل تر پێشكه‌فتگ بوى، هه‌ر چه‌ن ئه‌ده‌بیات كوردی له‌ باوه‌ت ده‌مه‌كییه‌و له‌ پڕهێزترین ئه‌ده‌بیاته‌یل رۆژهه‌ڵات ناوێنه‌، وه‌لی له‌ بوار نويسینه‌و فره‌ دێر جمیاسه‌و، ئه‌گه‌ریش بخوازیم زووان و ئه‌ده‌بیاتمان پێشبكه‌فێ بێگومان باێه‌س فره‌تر و زانستی‌تر له‌ سه‌ر ژانره‌یل جیاواز ئه‌ده‌بیات و زووان ورده‌و بويمن، هه‌ميش فره‌تر تێبكووشیم وره‌و ئه‌ده‌بیات نويسین نه‌ك ئه‌ده‌بیات ده‌مه‌كی. چوين ئیسه‌ سه‌رچه‌وه‌ێ هه‌ر فه‌رهه‌نگ و زووانێ ته‌نیا ئه‌ده‌بیات نويسینه‌‌، نه‌ ده‌مه‌كی. رێكاره‌یلێ ك تــويه‌نێ له ئێ زیان و زه‌ره‌ره‌‌‌ ك وه‌ سه‌ر زووان و ئه‌ده‌بیات كوردییا هاتێه‌ وه‌رگری بكه‌ێ، یه‌سه‌ ك وه‌رجه‌ هه‌ر چشت ئه‌و خاڵه‌یله‌ ك له‌ سه‌روه‌و وه‌ پێیان ئاماژه‌ كردیمن جێوه‌جێ بوون و به‌رهه‌ڤكاره‌یل و تاقیكاره‌یل بان و فه‌رهه‌نگ و فۆلكلۆریك ملله‌ته‌گه‌ێان جه‌مه‌‌و بكه‌ن تا له‌ یه‌ زێاتر له‌ هويره‌و نه‌چێیه‌، هه‌ميش زووانناسه‌یل بان و وشه‌تاشی ئڕا هاوتاێ وشه‌یل بێگانه‌ بكه‌ن و له‌ گشتێ گرانتر یه‌سه‌ ئه‌دیبه‌یل نووخوازیش وه‌ هوير و هزر نووێگه‌و بان و ئه‌ده‌بیات مودێڕن و نووێ ئافرانده‌ بكه‌ن‌.

 

س.ج «ژیار»