نه‌ فه‌یلیه‌یل نه‌ته‌وه‌ن و نه‌یش شیوه‌زاره‌گه‌یان زووانه‌

شفق نيوز

ك نزیكه‌ى ده‌ ساڵێگه‌ نویسامه‌سه‌ى له‌باوه‌ت شۆماره‌ى گه‌ورایگ له‌وانه‌ك په‌یوه‌ندى كوومه‌ڵایه‌تى و پیشه‌یى وه‌لمانا دیرن.

 

 

له‌و یادگاریه‌یله‌ ك ئیسه‌ ئه‌یه‌یده‌ هویرم، ئه‌وه‌ بوى خوه‌م زیاتر له‌ سووزدارییم دیمه‌و تا پیشه‌گه‌م له‌ بڕێگ مه‌سه‌له‌ ك شایسته‌ى باسكردن نییه‌، تائیسه‌یش باوه‌ڕم ئه‌وه‌سه‌ ك كه‌رامه‌ت ئاده‌میزاد گه‌وراتره‌ له‌ هه‌وڵ ناوبردن كه‌سه‌یل تر له‌ڕێ هووكاره‌یل په‌یوه‌ندى جووراوجووره‌و. یه‌یش بێجگه‌ ئه‌وه‌ك كه‌سه‌یلیگ هه‌ن هه‌وڵ ئه‌وه‌ ئه‌یه‌ن گشت وه‌سیله‌ى خراویگ بارنه‌ كار وه‌ناوه‌یل نه‌ناسریاگ و زووان ناشرین ئه‌را له‌كه‌داركردن كێشه‌گه‌مان و لاداینى له‌ رێڕه‌و  راسكانى خوه‌ى.

 

عه‌ره‌ب قه‌بول ناكه‌ن كه‌س بازى یا ده‌سكارى بنه‌ماى زووانه‌گه‌یان بكا، هه‌رچه‌ن شیوه‌زووان جووراوجوور ناوچه‌ییش دیرن و ئیسه‌یش ئى شیوه‌زووانه‌یلیانه‌ ئه‌یه‌رنه‌ كار له‌ناونى ده‌وڵه‌ته‌یل عه‌ره‌بى و نه‌ویه‌سه‌ هووكار دروسكردن كه‌ندڕیگ له‌ زووانه‌گه‌یان جوور نه‌ته‌وه‌و ئه‌وان پابه‌ندن وه‌و زووانه‌ جوور جامه‌كیگ ك لایه‌نه‌یل جووراوجوور ژیان له‌تیه‌و دیار بوود و گوزارش له‌لیان بكا جوور نه‌ته‌وه‌. ئمجا له‌یره‌ پرسیارم ئه‌وه‌سه‌ له‌وانه‌ك كورد فه‌یلى وه‌ نه‌ته‌وه‌و شیوه‌زاره‌گه‌یان وه‌ زووان زانن، ئایا پێوه‌ر زانستیدان چه‌س له‌ ده‌سنیشانكردن ئى ده‌سه‌واژه‌ى "نه‌ته‌وه‌" ئه‌را كورده‌یل فه‌یلى و "زووان" ئه‌را شیوه‌زاره‌گه‌یان؟ ئایا ئى چشته‌ ئجتهادیگه‌ له‌ ده‌نگه‌یل ناسازه‌و  یا رویوه‌ڕوى بوینه‌وه‌ى مه‌سه‌له‌ى ئه‌وانه‌سه‌ هه‌قه‌یل فه‌رامووش كردنه‌و تویه‌نستن حوكم بڕیار چاره‌نویس ئى پێكهاته‌ ده‌ربكه‌ن جوور چینیگ خاوه‌ن ئنتماو مێژوو و ریشگ كویه‌ن و ئه‌و زووانه‌ ك بڕێگ شیوه‌زووان كه‌فتگه‌سه‌ ژێر ساى و یه‌كیگیان تایبه‌ته‌ وه‌ كورد باشوور ك كورده‌یل فه‌یلى وه‌پى قسه‌ كه‌ن؟

 

من له‌لاى خوه‌مه‌و ئویشم كورده‌یل فه‌یلى وه‌ ئه‌و زوڵمه‌ ك له‌لیان كریا راسه‌ نه‌ته‌وه‌ن و مێژوو و ده‌وڵه‌مه‌نى شیوه‌زاره‌گه‌یان راسه‌ زووانه‌، وه‌لى كه‌سه‌یلیگ هویره‌یلیان تێكده‌رانه‌س و خوازن وه‌ى ده‌سه‌واژه‌ى نه‌ته‌وه‌ رویوه‌ڕوى نه‌ته‌وه‌ى كورد بوونه‌و، ئمجا ئه‌وانه‌ بایه‌د هویر له‌وه‌ بكه‌نه‌و ك جیایى رێنمایه‌یل سیاسییان ماناى ئه‌وه‌ نییه‌ جیایى دروس بكه‌ن له‌ ره‌گه‌ز و نه‌ته‌وه‌.

 

له‌ باوه‌تیگ تر ك ئه‌ویش باوه‌ت ژیاننامه‌س ك وه‌پێ ئویشن"CV" و جوور كارت ئاشنایى ناونى ئه‌وانه‌ك مینه‌ى كار كه‌ن و ئه‌وانه‌ك خاوه‌ن بڕیارن، دوینید وه‌ل ئه‌وه‌یشا بڕێگ تر زانیارى خودى له‌بان شاره‌زایى زانستى و پیشه‌یى گرێده‌ خوه‌ى، له‌ ده‌وڵه‌ته‌یل پێشكه‌فتگ له‌ هه‌ر پرۆژه‌یگ حكوومى یا ناحكوومى هه‌وه‌جه‌ وه‌ داشتن شاره‌زایى و توانایى دیاریكریاگ ئه‌كریه‌ێد، هه‌ر له‌وه‌ر ئه‌وه‌یش داواكردن ژیاننامه‌ مه‌سه‌له‌یگ ئاساییه‌و بایه‌د پێشكه‌ش بكریه‌ێد، وه‌لى ئى مه‌سه‌له‌ لاى فه‌یلیه‌یل ئه‌ڵڵاجه‌ویه‌ وه‌تایبه‌ت له‌ بوار ره‌سانن، چوینكه‌ گشت كه‌سێگ مه‌ینه‌تى گوزه‌یشته‌ى ئى پێكهاته‌ زانێد و ته‌نیا مه‌شق ژیان ئاسایى كردنه‌ له‌وه‌ر ئه‌و رویداگه‌یله‌ ك هاته‌ تویشیان له‌ حاڵ و له‌ماڵ، یه‌یش هیلێد پرسیاریگ بكه‌یم و بویشیم: چوین تویه‌نین شاره‌زایى وه‌ده‌س بارین و بنویسینه‌ى له‌ ژیاننامه‌دان له‌وه‌ختیگ ك ئه‌و ده‌رفه‌ت و توانا نه‌یاشتینه‌؟ من وه‌گشت ساده‌یى و شانازیه‌و ئویشم" شه‌فه‌ق " CV فره‌یگ  له‌ رووڵه‌یل پێكهاته‌گه‌مان پێشكه‌ش كرد و له‌سه‌ره‌تاوه‌ هویچ له‌لیان نه‌خوازى و له‌بار راسكانیان زانست جوور ئه‌وه‌ك بتویه‌نن كار له‌ى بواره‌ بكه‌ن، وه‌لى هه‌ق خوه‌یانیشه‌ بڕه‌سنه‌ قوناغ داشتن ئه‌و ژیاننامه‌ى به‌رز و پڕ له‌ توانایى و شاره‌زاییه‌.

 

لایه‌نیگ تر ك گرنگه‌ ئه‌ڕام، ئه‌ویش لایه‌ن ئنسانى و پابه‌ندى ئه‌خلاقیه‌، ئمجا" CV" هه‌ر بایه‌د بڕێگ متمانه‌ بگرێده‌ خوه‌ى و زه‌مانه‌ت ئه‌وه‌ بكا ك خاوه‌نه‌گه‌ى گه‌ردیده‌ شوون پێشكه‌شكردن خزمه‌ت نه‌ك خیانه‌ت و كاولكارى، ئمجا كێشه‌گه‌ى ئیمه‌یش ئى تایبه‌تمه‌ندیه‌ خوازێد وه‌ چه‌واشه‌ى بواره‌یل تر.

 

وه‌ ئاشكرا ئویشم: كه‌سه‌یلیگ ك ئه‌و " CV" له‌كه‌داره‌ دیرن و بڕێگ كێشه‌ى مێژوویى گرتگه‌سه‌ خوه‌ى و حه‌ز ناكه‌ن ده‌ریخه‌ن ئه‌را كه‌سه‌یل تر، هه‌ر ئه‌وانه‌ن گه‌ردنه‌ شوون ناوناین و ده‌سه‌واژه‌ى ناپه‌سه‌ن و كرده‌وه‌ى ناپووخت، ك یه‌یش هویچ خزمه‌تیگ وه‌ كیشه‌گه‌مان ناكا، به‌ڵكوو هان كه‌سه‌یل تر ئه‌یاد ئه‌و دیده‌ وه‌ربگرن خراوه‌ وه‌ربگرن له‌بان پێكهاته‌گه‌مان، هه‌ر له‌وه‌ر ئه‌وه‌یش خاوه‌ن ئه‌و سیڤیه‌یل له‌كه‌داره‌ په‌لامار ره‌گه‌ز و نه‌ته‌وه‌ى خوه‌یان ده‌ن وه‌ زووان بێگانه‌، ئه‌و خاوه‌ن سیڤیه‌یله‌ بێ زووان و بێ نه‌ته‌وه‌ن، چوینكه‌ پابه‌ندى نه‌یرن.

 

فه‌یلیه‌یل نه‌ته‌وه‌ نین، به‌ڵكوو به‌شێگن جیا نه‌كریاگ له‌ نه‌ته‌وه‌ى كورد ك له‌وه‌ر كووچكردن زووره‌ملى دابه‌ش بوینه‌ له‌ناونى چه‌ن ده‌وڵه‌تێگ و ئمڕوییش ئى نه‌ته‌وه‌ى كورده‌ نه‌بایه‌د حاشا له‌ وجوودى بكریه‌ید. ئمجا وه‌ بووه‌نه‌ى شیوه‌زار فه‌یلییش، ئى شیوه‌زاره‌ زووانیگ  جیا نییه‌، به‌ڵكوو یه‌كێگه‌ له‌ شیوه‌زاره‌یل كوردى ك دوشمنه‌یل هه‌وڵ له‌ناوبردنى دان وه‌لى نه‌تویه‌نستن.

 

هه‌ر له‌وه‌ر ئه‌وه‌یش ئیمه‌ هه‌وه‌جه‌ وه‌ زیایكردن ئى ناوناین ناپوخته‌ نه‌یریم ئه‌را فه‌رهه‌نگمان ك ته‌نیا قاپى مه‌ینه‌تیه‌یل تازه‌ له‌لیمان واز ئه‌كا، به‌ڵكوو ئیمه‌ هه‌وه‌جه‌ وه‌ رێككه‌فتنیگ شه‌ره‌فمه‌ندانه‌ دیریم ئه‌را ده‌ركردن ئه‌وانه‌ك وه‌ناو نه‌ناسریاگه‌و خه‌ریك ئى ره‌فتاره‌یل ناجووره‌نه‌ له‌ژێر ساى "فه‌یلى"ه‌ ئاشكرا گوڵدریاگه‌گه‌ى.

 

عه‌لى حسێن فه‌یلى

ج. ا