قاپيكوتان كرملن ئمڕوو له‌لی كه‌فته‌و

شفق نيوز

له‌و گشت قه‌يرانه‌يله‌ ك هاته‌سه‌ تويش كوردستان فريه‌ نيه‌ بزانيم له‌ی ماوه‌ی دياريكرياگه‌ خواست كورد له‌لای برايه‌يل شيعه‌ چوين ته‌ماشا ئه‌كريه‌يد. ملله‌ت ئيمه‌ له‌ ده‌س وه‌پيكردن شووڕش گه‌ورای ئه‌يلوول تا راپه‌ڕين ٥/ ٣ / ١٩٩١ رووژ نه‌ويه‌ له‌ جه‌وه‌ڵ و شار ئه‌نفال و كيمياواران و داگيركاری و له‌ سێداره‌ديان نه‌ويده‌ قسمه‌تی.

دويای ئه‌و سه‌رده‌م پڕ مه‌ينه‌تيه‌ جی داخه‌ ك دووسه‌يل كويه‌ن ئۆپۆزسيۆنمان چشتيگ له‌وه‌ كه‌متر وه‌پيمان نه‌كردنه‌، ئه‌نفال شه‌نگاڵ و ئه‌نفال كويه‌ن ناوچه‌يل تر كوردستان جياوازی ديرن؟! نانبڕين و پلانداناين نائنسانيانه‌ له‌ دژ حكوومه‌ت كوردستان جياوازی چه‌ ديريد وه‌ل تاوانه‌يل وه‌رين به‌عس ك پياده‌ی كرد ده‌رهه‌قمان؟

باوگ كورد بارزانی نه‌مر هه‌نای قاپی كرملن كوتاو داوای ماف ملله‌ته‌گه‌ی كرد، ئه‌وسا قوناغه‌گه‌ جياواز بوی، وه‌لی قاپيه‌گه‌ له‌رزان، ئيسه‌يش خوه‌رهه‌ڵات و خوه‌رئاوا له‌وه‌ر دانايی كورد و سه‌رۆك كوردستان قاپی هه‌ولێر ئه‌كوتن ئه‌را ئه‌وه‌ك له‌وه‌رانوه‌ر شيرپه‌نجه‌ی سه‌رده‌م هاوكاريان بويمن ك هه‌رچه‌نی ناراسه‌وخۆيش بدێ هه‌ر جووريگه‌ له‌ جواودانه‌وه‌ی ئه‌و غه‌در(وارشۆ و ناتۆ) ك له‌وه‌خت خوه‌ی ده‌رهه‌قمان ئه‌نجاميدان.

حكوومه‌ت مالكی چشتيگ نه‌مه‌ند ئه‌نجامی نه‌يه‌يد، وه‌لی ئه‌و لاپه‌ڕه‌ گوزه‌يشت، ئه‌وه‌ك ته‌ماشا ئه‌و سه‌رده‌مه‌ بكا حاڵی له‌وه‌ خاستر نادێ، چوينكه‌ قوناغ وه‌رجه‌ ٩/ ٦ ئمڕوو نيه‌، هه‌ر له‌وه‌ر ئه‌وه‌يش بايه‌سه‌ ئه‌و سێ مانگه‌ ئه‌را عبادی به‌س بوود تا هويره‌و بكاو دی گووش نه‌ياده‌ نه‌يار و تونڕه‌وه‌يل.

ئيسه‌ كورد فيشتر له‌ ٤٠ ده‌وڵه‌ت پشتگيری له‌لی ئه‌كا، وه‌تايبه‌ت ك شانيه‌ت و هه‌يبه‌ت ملله‌ت و وشه‌ی پێشمه‌رگه‌و قاره‌مانێتيان ئه‌رايان ئاشكرا بوی و هه‌ر كه‌س و لايه‌نيگيش بخوازيد په‌يوه‌ندی كورد و عه‌ره‌ب بشيونيد ئه‌وه‌ بيگومان زه‌ره‌د ئه‌كاو تا سه‌ر ناخه‌نيد.

شازاد ئه‌نوه‌ر

ج . أ