ديارده‌ى وه‌ژيرپاخستن ئاڵاى وڵاته‌يل

شفق نيوز

هه‌ر له‌وه‌ر ئه‌وه‌يش وه‌ دوير مه‌ويننه‌ى ك ئيسه‌ يا له‌ بانان ئاڵاى كوردستان له‌لايه‌ن كه‌سيگه‌يليگ ناحه‌ز و نه‌فسيه‌ن نزمه‌و سووكايه‌تى وه‌پى بكريه‌ێد، وه‌لێ ئه‌وه‌ هويچ وه‌ختى له‌ گه‌ورايى ئه‌و ملله‌ته‌ كه‌مه‌و ناكا.

ئه‌گه‌ر كاره‌گه‌ وه‌ ئاڵاسزانن و ژيرپاخستن بوياتاد، خو ئيسه‌ ئه‌مريكا بايه‌سه‌ جه‌نگ وڵاته‌يل فريه‌يگ بكردياد، ك له‌ى ماوه‌ى دوياخريشه‌ كۆرياى باكوور نمايشيگ سه‌ربازى ئه‌نجامدا، ك ئه‌ويش وه‌ ڕيكردن له‌بان ئاڵاى ئه‌مريكا، يا فريه‌جار له‌ ئيران ئه‌و كاره‌ ئه‌كريه‌ێد.

وه‌لێ ئه‌مريكا ئه‌زانێد چوين ته‌قاساى ئه‌و كاره‌يله‌ ئه‌كا، ئه‌ويش نه‌ك وه‌ دواره‌كردن سزانن يا وه‌ژيرپاخستن ئاڵاى وڵاته‌يل ئه‌نجامده‌ر، به‌ڵكوو وه‌ سياسه‌ت و فامێده‌گى خوه‌ى، ته‌نانه‌ت ملله‌ت ئه‌مريكايش خوه‌ى نايه‌رێده‌ ئه‌و ئاسته‌و ئى كاريشه‌ ناكا.

هه‌ر وه‌و خاتريشه‌ ئيمه‌يش بايه‌سه‌ وه‌ گه‌ورايى و فاميده‌گى مامڵه‌ وه‌ل ئه‌و ديارده‌يله‌ بكه‌يم و هه‌وڵ بيه‌يم نه‌كه‌فيمنه‌ دام بريگ لايه‌ن نه‌فسيه‌ت نزم و نه‌ياره‌و.

ئمجا بيلا وه‌ سه‌ركه‌فتنه‌يل پێشمه‌رگه‌و ملله‌ته‌گه‌مان جواويان به‌يمنه‌و، بيلا وه‌ كاركردن و يه‌كڕزى و سه‌روه‌خوه‌يى كوردستان جواويان به‌يمنه‌و.

له‌وه‌ر ئه‌وه‌يش هويچ وه‌ختيگ دڵگران مه‌ون، چوينكه‌ ئه‌يه‌ نيشانه‌ى گه‌ورايى و سه‌ركه‌فتن ملله‌ته‌گه‌مانه‌ ك له‌يوا له‌ليان كردگه‌ هويچ له‌ده‌سيان نه‌يه‌ێد و ده‌س ئه‌را ئه‌نجامداين ئى كرده‌وه‌يل بى نرخه‌ بووه‌ن، ك دوياخريش سه‌ركه‌فتن و سه‌ربه‌رزى ئه‌را ئيمه‌س.

ئبراهيم مه‌نده‌لاوى