خانه‌قین له‌ ئه‌سر چه‌وه‌یل ئه‌ڵوه‌ن

شفق نيوز

له‌بان شار و ناحیه‌و ئاوایه‌یلى جیوه‌جى كرد وه‌ ئامانج ئاڵشتكردن دیمۆگرافیاى شاره‌گه‌ له‌ سروشت كورده‌واریه‌و، ك وه‌ل ئه‌وه‌یشا ئابڵووقه‌یگ ئابوورى و رووشنهویرى و كوومه‌ڵایه‌تى له‌بانى چه‌سپان تا له‌ مه‌ینه‌تى مه‌ردمه‌گه‌ى قورسه‌و بكاو هه‌زاران له‌ رووڵه‌یل ئه‌و شاره‌ خسته‌ گووشه‌ى زندانه‌یل و بیجگه‌ ئه‌وه‌یش تون وتیژى و ره‌گه‌زایه‌تى دژ مه‌ردمه‌ خه‌باتكه‌ره‌ نیشتمانى و نه‌ته‌وه‌ییه‌گه‌ى هاورده‌ كار ك وه‌ خوین شه‌هیده‌یلیان رویوه‌ڕوى به‌عس فاشیست بوینه‌وه‌و وه‌ خوین پاكیان نه‌خشه‌ى ڕێ ئازادى و ئنسانى دانان. ئه‌وه‌ بوى رژیم به‌عس ده‌سكرده‌ دزین و تاڵانكردن خه‌یروبه‌یر شاره‌گه‌و خه‌ڵك شاره‌گه‌ له‌بان زه‌وى وزار و ماڵ و موڵكه‌یلیان ده‌ركردو دویریانه‌و خست له‌شار و ئاوایى و شوون وماواى خوه‌یان، ك ئیسه‌یش دویاى رمیان ئه‌و رژیمه‌ هێمان شوونه‌وار ئه‌و كاولكارى و تاوانه‌یله‌ هه‌ر دیاره‌.

 

ئه‌ى خانه‌قین، وه‌ زووان غوربه‌ت و دویره‌وخستن ئه‌راد نویسم، جوانترین یادگاریه‌یلم ئه‌وه‌ بوى ك ماوه‌ى فره‌یگ  له‌تید ژیام و تائیسه‌یش ئه‌و یادگاریه‌یله‌ هه‌ر له‌هویرم مه‌ندنه‌و تیكه‌ڵ خوین ده‌مارم بوینه‌و گڕ ئشقد سزنێده‌م و حه‌سره‌ت دیده‌ند چڕێده‌م و گشت وه‌ختیگ كه‌فمه‌ خه‌یاڵ ئه‌و رووژگاره‌یل خوه‌ش و یادگاریه‌یل نزیك سروشته‌ دڵڕفنه‌گه‌د.

 

ئه‌ى شاره‌گه‌م ئى وشه‌یله‌ نویسم و ئه‌سر له‌چه‌وه‌یلم وارێد و گیرستن نوح كه‌م ئه‌را ئه‌و ساڵه‌یله‌ ك دویر بویم له‌لیدو دڵ زه‌خمدارم چكه‌ى خوینى ئه‌یه‌ێد ئه‌را ژان و مه‌ینه‌تیه‌یلد، شاریگ بوید ئارام و خوه‌ش پڕ له‌ بوو گوڵه‌یل و جوانى سروشت و باخ و بووسانه‌یل سه‌وز كنار ئاو ئه‌ڵوه‌ند، ك ئیسه‌ زه‌خمى بویده‌ له‌ده‌س ژان و كاولكارى.

 

شاره‌ خه‌مینه‌گه‌م، هه‌قمه‌ ئه‌گه‌ر باس ئه‌و رویداگه‌یله‌ بكه‌م ك هاته‌ تویشد له‌ سه‌رده‌مه‌یل وه‌رین و بوینه‌ حه‌سره‌ت له‌دڵد و ژان ئیسه‌ ك چه‌و له‌وه‌رجه‌ دڵ ئه‌راد گیرێد، چوینكه‌ من جوور ئاشقیگ دیوانه‌ دووسد دیرم و تا ئیسه‌یش ناود له‌ناوڕاس دڵم نویسیاگه‌و له‌گشت كوته‌ى دڵم هه‌یدو كه‌فتمه‌سه‌ خه‌یاڵ شه‌وه‌یل جوان بان پیه‌ڵ ئه‌ڵوه‌ند، شاره‌ سته‌مدیده‌گه‌م هه‌ق خوه‌ده‌ باس مه‌ینه‌تى و ژانه‌یلد بكه‌م، چه‌نیگیش باسد بكه‌م هه‌ر زیاتر سزیه‌م، چوینكه‌ وه‌خه‌م و دڵته‌نگیید پیچیایده‌و له‌لید جیاوه‌ نیه‌ود!! سیماى جواند گوم بوى و روخسارد گرنج گرنجه‌و بویه‌و باخ و بوسانه‌یلد نه‌مه‌نن و كریا دار ئاگرسزن و ئاو ئه‌ڵوه‌ند ك چه‌و ه‌یلد سورمه‌ڕێژ كردیاد وشكه‌و كریاو باڵنده‌یلد كووچ كردن و دویره‌و كه‌فتن و ئاژه‌ڵه‌یل ده‌یشته‌كیید نه‌مه‌ندن و ته‌نانه‌ت په‌پووله‌یل نازگ و ره‌نگامه‌یلیدیش شوون وماوایگ نه‌یرن له‌تى زیاێ بكه‌ن و ئاوایه‌یل ده‌وروه‌رد گژوگیاو كشتوكاڵى له‌ده‌سداو له‌ناو ته‌پ و تووز وخاك بیاوان خنكیانه‌.

 

به‌ڵێ شاره‌ جوانه‌گه‌م، خه‌م له‌ روخسارد دوینم ئه‌را مه‌ویسى و مه‌ینه‌تى رووڵه‌یلد، ئه‌سر چه‌وه‌یلد ئه‌وه‌قه‌ره‌ گیرستنه‌ جوور ئاو ئه‌ڵوه‌ن وشكه‌و بوینه‌، به‌ڵى من زانم ك ساڵه‌یل فره‌یگه‌ ناڵنید وه‌ده‌س فه‌رامووشكردن و نه‌وین خزمه‌تگوزارى گشتى و بیكارى رووڵه‌یلد.

 

بایه‌د واز له‌دڵته‌نگى بیه‌ریم و له‌ى لاپه‌ڕه‌ى پڕ ژانه‌ په‌ند و عبره‌ت وه‌ربگریم و ده‌س بكه‌یمنه‌ وازكردن لاپه‌ڕیگ تر تازه‌ ئه‌را زینگه‌وكردن شاره‌گه‌مان وه‌ گووره‌ى خوه‌شه‌ویسى و ئه‌و هه‌قه‌ ك له‌بانمان دیرید و بیه‌یمنه‌و ئه‌را گه‌شتكردنه‌گه‌ى جاران له‌ رووژه‌یل وه‌هار و عه‌یده‌یل و بوونه‌یل خوه‌ش وه‌ل هاوڕێ و خوه‌شه‌ویسه‌یلمان له‌ كنار ئه‌ڵوه‌ن نه‌خوه‌شكه‌فتگ و باس خانه‌قین بكه‌یم جوور شاریگ جوان كوردستان ك پڕه‌ له‌ دڵسووزى و خوه‌شه‌ویسى و خه‌یر.

 

مه‌حموود وه‌ندى

ج. ا