مه‌رجه‌یل شه‌هرستانى

شفق نيوز

  له‌و رووژه‌و ئى پیاوه‌ هاته‌سه‌ بان شانۆ سیاسى له‌ عراق و نه‌خش دیرید، خوه‌ى وه‌ ته‌واوى ته‌رخان كردگه‌ ئه‌را دژایه‌تى هه‌رێم و داواكاریه‌یل ره‌واى ملله‌ت كورد. ئنجا هه‌رچه‌نى ئه‌و داواكاریه‌یلیشه‌ گشتى ده‌ستوورى و یاساییه‌، وه‌لى شه‌هرستانى هه‌ر گه‌ردیده‌ شوون كیشه‌و كه‌لینیگ و هه‌ر گه‌ردیده‌ شوون مه‌هانه‌و ده‌سپیچگ له‌وه‌ر خاتر دژایه‌تیكردن ئه‌و داواكاریه‌یله‌.

ئه‌و تائیسه‌ هویچ هساویگ ئه‌را تایبه‌تمه‌ندى هه‌رێم كوردستان ناكاو له‌ هه‌مان وه‌خت له‌و هه‌مگه‌ خه‌بات و قوربانیداینه‌ ناڕه‌سیده‌و ك ئى ملله‌ت بیوچانه‌ له‌وه‌ر خاتر سه‌رفرازى و سه‌روه‌خوه‌یى و ئابوورى ئى هه‌رێمه‌ داسه‌ى.

یه‌یش له‌وه‌ختیگ ك رژیمه‌یل وه‌رین له‌وه‌ر مه‌رام تایبه‌ت خوه‌یان ئى ناوچه‌ى هه‌رێم كوردستانه‌ فه‌رامووش كردوین و خوازیار ئه‌وه‌ بوین وه‌رده‌وام كوردستان دویاكه‌فتگ و كاول بوود.

ئه‌و تائیسه‌ له‌وه‌ نه‌ڕه‌سیه‌سه‌و ، یا شایه‌ت بفامیدو خوه‌ى له‌لى لا بیه‌ید ك خاكیگ هه‌س وه‌ ناو كوردستان و له‌و خاكیشه‌ سامان سروشتى وجوود دیرید ك موڵك ملله‌ته‌گه‌یه‌ له‌وه‌رجه‌ گشت كه‌سیگ .

وه‌ل ئه‌وه‌یشا هه‌رێم ئاره‌زوومه‌ندانه‌ دویاى ئه‌وه‌ك له‌ راپه‌ڕینه‌و ك سه‌دام كوردستان هیشته‌ جى،خوه‌ى لكانه‌ عراق تازه‌ وه‌و هساوه‌ ك ئى عراق تازه‌ عراقیگ فیدراڵى فره‌یى و دیموكراسى بوود و گشت هه‌قه‌یل له‌تى مقه‌یه‌تیكریاگ بوود.

وه‌لى ئه‌وه‌سه‌ ئه‌را ده‌ ساڵ فیشتره‌ چوود ك رژیم سه‌دام حسێن نه‌مه‌ندگه‌و هیمان ئى كابرا گشت رووژیگ په‌ڵپ تازه‌یگ له‌ هه‌رێم و ملله‌ته‌گه‌مان ئه‌گریدو ئه‌وه‌سه‌ تا ئیسه‌ سێ مه‌رج داناگه‌ ئه‌را كلكردن نه‌فت هه‌رێم له‌ ڕى توركیاوه‌ ك دووان له‌لیان هه‌رچوینیگ بوود قه‌بول كریه‌ید، وه‌لى مه‌رجج سێیه‌م ك ئویشید پویل و داهات ئه‌و نه‌فته‌ بایه‌سه‌ بخریه‌یده‌ سه‌ندووق گه‌شه‌وه‌پیداین عراق له‌ نیویۆرك و له‌ورا مقه‌یه‌ت بكریه‌ید.

ئنجا وه‌ختیگ ك له‌لاى گشت كه‌سیگ ئاشكراس ك هه‌ر له‌و سه‌ندووقه‌ قه‌رزه‌یل كوه‌یت دریه‌یده‌و ك له‌لایه‌ن سوپاى سه‌دامه‌و داگیر كریاو زه‌ره‌دمه‌ن بویه‌، ئه‌ى دى ئیمه‌ له‌ مه‌رام شاریگ شه‌هرستانى ره‌سیمنه‌و ها ته‌ماى چه‌.

ئه‌و خوازیاره‌ قه‌ره‌بوو غه‌ڵه‌ته‌یل سه‌دام ك وه‌ ملیاره‌هاس له‌ڕى نه‌فت خاك كوردستانه‌و بكریه‌ید، هه‌ر له‌وه‌ر ئه‌وه‌یش نیه‌ود حكوومه‌ت هه‌رێم و خه‌ڵك كوردستان وه‌ هویچ شیوه‌یگ وه‌و مه‌رج بى ماناى شه‌هرستانیه‌ رازى بوون و له‌ژیر هویچ فشاریگ ئه‌و ده‌سدریژیه‌ ئه‌را بان سامان سروشتى ژیرخاك كوردستان قه‌بول بكا، یه‌یش له‌وه‌ختیگ ك تائیسه‌ حكوومه‌ت به‌غدا ئاماده‌ نیه‌ قه‌ره‌بوو مه‌ردم هه‌ڵه‌بجه‌ بكا. هه‌ر وه‌و خاتریشه‌ ئیمه‌ى وه‌رپرس غه‌ڵه‌ته‌یل سه‌دام نییم.

سه‌لام عه‌بدوڵڵا

ج . أ