دكتاتور ڕمیا.. ئایا ڕژیمیش ڕمیاس؟

شفق نيوز


له‌ شوون دوێایین ڕاپه‌ڕینه‌ێل ، جواو داین پرسێار دوێم ئاسانه‌و بووگ ..وه‌ختێگ ده‌سه‌ڵاتدار سته‌م له‌ ملله‌ته‌گه‌ێ بكه‌ێگ و مافه‌ێلێ پاشێل بكه‌ێگ و جه‌نگه‌یل ناوخوه‌ێى و ده‌ره‌كى وه‌رپا بكه‌ێگ .. و وه‌هاوكارى لاێه‌نه‌یل بیگانه‌ شێره‌كه‌ێ بان مل هاوڵاتێه‌ێل خوه‌ى بووگ .. دخاڵه‌ت ده‌ره‌كى بووگه‌ ئاكامێگ پێشبینى كرێاگ.  له‌ مێژویش ئێ مه‌سه‌له‌ ڕوێداس له‌ وڵاته‌ێل و ئمبراتورێه‌یلێگ ك شانازى وه‌ ناسنامه‌ و سه‌روه‌خوه‌ێى خوه‌ێان كه‌ن جور ئه‌ڵمانیه‌ و یابان . كێشه‌ێ عراق له‌ یه‌كم جه‌نگ خه‌لیجه‌وه‌ بوێه‌ كێشه‌ێگ هه‌رێمى و ناوده‌وڵه‌تى و وه‌ته‌واوه‌تى ئراده‌ێ ملله‌ته‌گه‌ێ زه‌فت كریا. 
هه‌ڵوێسته‌یل و بڕیاره‌یل هه‌رێمى و ناوده‌وڵه‌تى دریا و رژیم به‌عسیش سه‌رجه‌م ئه‌و بڕیاره‌یله‌ په‌سه‌ن كرد و ێه‌یش زه‌مینه‌ێ دخاڵه‌ت بێگانه‌گان خوه‌ش كرد ، له‌وانه‌ێش بڕیار ژماره‌ 661 و خه‌یمه‌ێ سه‌فوان و هه‌ڵوێست له‌ وه‌راوه‌ر ڕاپه‌ڕین مه‌ردمى ساڵ 1991.
له‌ شوون ڕمیان ڕژیم و سه‌ره‌ڕاى دخاڵه‌ته‌یل هه‌رێمى و بێگانه‌یل و ئاڵوزه‌و بوێن بارودوخه‌گه‌ ، ئومید ئه‌ڕا چاكسازى و ئاڵشت و ئوڵشت و بونیاد ناین ژیانێگ دیموكراسى و ده‌ستورى و پێشكه‌فتن ئابوورى و كومه‌ڵایه‌تى و سیاسى و كوتایی هاوردن وه‌ وجود داگیركه‌ره‌یل و گه‌مارو ئابوورى و ده‌ركردن عراق له‌ ژێر به‌ند هه‌فتوم ، فراوانه‌و بوی.
وه‌لێ ڕمیان ڕژیم بارودوخه‌گه‌ ئاڵوزتره‌و كرد .. تاغوته‌گه‌ ڕمیا ، وه‌لێ ئه‌قڵیه‌ت و ده‌زگاگان ئه‌و سه‌رده‌مه‌ نه‌گ ته‌نیا جور خوه‌ێان مه‌نن ، به‌ڵكم خوه‌یان تازه‌وه‌ كردن ، تاكه‌ كه‌سى و حزب ڕمیا .. وه‌لێ هوێر تاكه‌ كه‌سى و حزب گه‌رایى هه‌مراێ ڕه‌واج دێرێ و هه‌ڕه‌شه‌ له‌ جومگه‌گان سیستم تازه‌ كه‌ێگ .. زورم ئه‌و یاساێه‌یله‌ ك كار وه‌پێیان كرێه‌ێ هێمانى هن ئه‌نجومه‌ن سه‌ركرداێه‌تى شورش به‌عسن .. و یاساێه‌ل تازه‌یش بێجگه‌ ژماره‌ێ كه‌مێگیان ، وه‌ل بونیه‌ و مه‌فهومه‌ كوێه‌نه‌گان تێگه‌ڵ كرێه‌ن.
ڕژیم به‌عس مارێگ نه‌وێه‌ تا سه‌رێ بتلنید و بمرێگ .. به‌ڵكم منه‌ێگه‌ دارێگ یا دره‌ختێگ ك باێه‌د ئه‌رَا مردنێ له‌ ڕیشگه‌و بكه‌نیه‌ێ. ده‌ستور و هه‌ڵوژاردن و هاتن كه‌ساێه‌تیه‌ێل و هێزه‌یل تازه‌ و ڕمیان ده‌سه‌ڵاتدار ، هێمانێ واتاێ فه‌ره‌ێگ دێرن .. ئه‌گه‌ر جور حكومه‌ت و سروشت فه‌لسه‌فه‌ێ ناونی ده‌سه‌ڵات و هاوڵاتى ئالشت بوێاتاد ، وه‌ئه‌گه‌ر تێوره‌ێل ئابوورى و كومه‌ڵاێه‌تى و فه‌رهه‌نگى و ژێرخان و سیستم په‌ێوه‌ندى ناوخوه‌یى و ناوده‌وڵه‌تى تازه‌وه‌ بكریاتاگ ، بێ گومان ئیسه‌ بارودوخه‌گه‌ له‌ێوا نه‌وێ ، وه‌لێ وه‌ختێگ جور جاران قسه‌ و به‌رژه‌وه‌ندى كاروه‌ده‌س بانتره‌ له‌ هن هاوڵاتى ، چمانێ هوێچ نه‌كردیمه‌ و هویچ ئاڵشت و ئوڵشتێگ ڕوێ نه‌یاس ، چوێن جور جاران هاوڵاتى بێ ئراده‌ و مافه‌ێلێ پاشێل كرێه‌ێ و له‌و لایشه‌وه‌ تروریزم و ئوتومبیله‌ێل بومب ڕێژ كرێاگ هه‌ڕه‌شه‌ له‌ گیانێ كه‌ێگ ، هه‌ر وه‌و جوره‌گ جارانیش جه‌نگ و زندان و شكه‌نجه‌ هه‌ڕه‌شه‌ له‌ لێ كردیاد.
ئمڕو دوێاێ دوانزه‌ ساڵ له‌ ڕمیان ڕژیم دكتاتورى به‌عس ژماره‌ێ ئاواره‌یل و وه‌سه‌ربازگه‌ كردن نیشتمان و بێكارى و نه‌خوه‌نه‌وارى و هه‌ژارى و بیماری و گه‌ناته‌ كارى وتاوانكارى روێ له‌ زێاێ بوێن فراوانێگ كردێه‌.
ئه‌گه‌ر جیاوازى ڕیشه‌یى له‌ ناونی هه‌ردو سیستم و ئه‌قڵێه‌ت و ڕه‌فتار گوزه‌یشته‌ و ئمڕو به‌رجه‌سته‌ نه‌وگ ، بێ گومان نیه‌توێه‌نیم بوێشیم گوڕانكارى له‌ وڵات وه‌دى هاتێه‌.  نه‌باێه‌د له‌ شوون ده‌ێه‌یگ له‌ ڕمیان ڕژیم به‌عس و خه‌رج كردن سه‌دان ملیارد دولار ، پاساو ئه‌ڕا شكسته‌گانمان له‌ ئداره‌ كردن وڵات باریم و وه‌رپرسیارى بخه‌یمه‌ مل تروریزم و ڕژیم گوزه‌یشته‌ ، چوێن شكه‌سته‌گانمان هوێچ پاساو و عوزرێگ نیه‌ڵگرێگ.
قاپیه‌ێل ئه‌ڕا گوڕانكاری واز بوێن ، وه‌لێ له‌ش و ئه‌قڵمان هه‌مراێ جور گوزه‌یشته‌ كاركردێه‌ ، ناكامیه‌ێل گوزه‌یشته‌ و زوان و شێوازه‌ێلی هه‌مراى هه‌ڕه‌شه‌ له‌ ئازادی و ماف هاوڵاتیه‌ێل كه‌ێگ ، وه‌لێ وه‌ختێگ نوڕیمه‌ ئاسوه‌یل ئاینده‌ و ڕاپه‌ڕینه‌یل هاوساگانمان ، زیاتر متمانه‌ وه‌ ته‌ندروستى رێبازه‌گه‌مان كه‌یم ، له‌وه‌ر ئه‌وه‌گ بتوایم و نه‌توایم چاكسازى تێه‌یگه‌ پیریمانه‌وه‌ و معیاره‌گانێ هاوڵاتى و ئاسایش و ئاینده‌س.