مه‌رز ده‌سكرد

شفق نيوز

هه‌رچه‌نی ملله‌ته‌گه‌مان خوين و قوربانی فريه‌يگيش داگه‌و هه‌زاران شه‌هيد و زه‌خمدار داگه‌، وه‌لی وه‌ل ئه‌وه‌يشا هويچ وه‌ختيگ جورئه‌ت و ئيراده‌ی دوشمن له‌بای نه‌چه‌سپياگه‌و تويه‌نستگه‌ وه‌رانه‌وه‌ر دڕنده‌ترين رژيمه‌يل ناوچه‌گه‌ وه‌رگری ئازايانه‌ له‌ مه‌ردم و خاك خوه‌ی بكا.

ئمڕوو دويای نزيكه‌ی سه‌د ساڵ له‌و ريككه‌فتننامه‌ی شوومه‌، بار تازه‌و مه‌ترسی تازه‌يگ په‌يا بويه‌و هه‌ر وه‌و خاتريشه‌ ئيسه‌ وه‌خت خوه‌يه‌و بايه‌سه‌ جاريگتر ئه‌و مه‌رزه‌يله‌ له‌ نوو دابنريه‌ن و ملله‌ت كورديش بدێده‌ خاوه‌ن خاك و زێدی خوه‌ی، ك له‌لايه‌ن رژيمه‌يل يه‌ك له‌شوون يه‌ك هه‌وڵ جوراوجوور دريا ئه‌را ئاڵشتكردن ديموگرافيای كوردستان و داگيركردن خاكه‌گه‌ی.

گشتمان ئاگاداريم له‌ هه‌وڵه‌يل رژيم سه‌دام حسێن ك چوين وه‌ به‌رنامه‌و پيلان خه‌ريك ته‌عريب كوردستان و شار و شاروچكه‌يل بوی، ك تا راده‌ی فريه‌يگيش ديموگرافيای ئه‌و ناوچه‌يل ئمڕووه‌ ك وه‌پی ئويشن كيشه‌دار ك له‌ڕاسی ناوچه‌يل ده‌يشت هه‌رێم كوردستانن تويه‌نريا ئاڵشتكاری له‌ليان بكريه‌يد و له‌ به‌رژه‌وه‌ندی ملله‌ته‌گه‌مان نه‌وی.

ئمجا هه‌رچه‌نی بايه‌س بوی دويای رميان رژيم به‌عس، حكوومه‌ت تازه‌ی عراق ئه‌و بڕيار و فه‌رمانه‌يله‌ ك له‌باوه‌ت ته‌عريبكردن كوردستانه‌و درياوين، لاوردياده‌ی، وه‌لی جوور ئه‌وه‌ك دوينيم ئه‌يانيش هه‌ر هانه‌ هه‌وڵ وه‌رده‌وامی ئه‌و سياسه‌ته‌.

ئمڕوو ك داعش يه‌ك له‌بان سێی خاك عراقيش داكردگه‌و له‌ مه‌رزه‌يل ده‌سكرد وه‌ ئاره‌زوو خوه‌ی گوزه‌ر ئه‌كاو خاك داگير ئه‌كا، ئيمه‌يش ماف خوه‌مانه‌ مقه‌يه‌تی له‌ مه‌رزه‌يل خوه‌مان و خاكمان له‌ داگيركردنيگ تر بكه‌يم، هه‌ر له‌وه‌ر ئه‌وه‌يش گشت ئه‌و ناوچه‌يله‌ ك وه‌ خوين ئازاديان ئه‌كه‌يم و له‌ بنه‌ڕه‌ته‌و خاك كوردستانه‌و گشت به‌ڵگه‌نامه‌يل مێژوويی شايه‌تی ئه‌رای ئه‌يه‌ن، بايه‌سه‌ بوونه‌ مه‌رز كوردستان و بانه‌و ئه‌را ده‌س مه‌ردم كوردستان و دی ئه‌و مه‌رزه‌يله‌ ك سايكس بيكۆ داينا ئه‌وانه‌ مه‌رز ئيمه‌ نين و پێشمه‌رگه‌يل كوردستان وه‌ خوين گه‌ش خوه‌يان مه‌رز كورد و كوردستان ئه‌ڕامان دياری ئه‌كه‌ن.

له‌يرا ئيمه‌ گشتلايگيش دڵنيا ئه‌كه‌يم ك كورد هويچ وه‌ختيگ ته‌ما له‌خاك كه‌س نه‌ياشتگه‌و مێژوويش شايه‌تيده‌ر ئه‌و راسيه‌سه‌و هه‌ر وه‌و خاتريشه‌ نادێ كه‌س له‌ گله‌وخواردن خاكمان ئه‌را مه‌ردمه‌گه‌ی خوه‌ی نگه‌ران بدێ، وه‌ل ئه‌وه‌يشا ئيمه‌ پيشوازی له‌ گشت ئه‌و مه‌ردم و كه‌سه‌يله‌ ئه‌كه‌يم ك ئه‌خوازن له‌بان خاكمان جوور هاووڵاتييگ كوردستانی بژيه‌ن، وه‌ مه‌رجيگ هاورده‌كرياگ نه‌ون.

سه‌لام عه‌بدوڵڵا

ج . أ