كه‌ی ئی وڵاته‌ سه‌قامگير بووگ ؟

شفق نيوز

بتويه‌نيگ له‌ژير چه‌ترئارامی و ژيانيگ بی گرفت‌ بژيه‌يگ ، ئمڕوو له‌ی وڵاته‌ ئه‌قڵيه‌ت دوياكه‌فتگ و ره‌گه‌زپه‌رس هيمان هه‌ر زه‌نگ به‌دكرداری و ناهه‌قی ده‌يگه‌لی و ، وه‌ته‌پڵ شادی و سه‌رفرازی وڕ بووگ و په‌له‌پرتی تيه‌يگ ئه‌ڕای  ، چوينكه‌ له‌ده‌ورانيگ ژياگه‌ پڕ بويه‌ له‌زوڵم و پاشيلكردن هه‌ق ئازاديخوازه‌يل و ترويسكه‌ی رووشنايی له‌وژدانی وجوود نه‌ياشتگه‌وهويچ خه‌يرو خوه‌شييگ نه‌تواسگه‌ ئه‌را ملله‌ته‌ سته‌مديده‌گه‌ی و خوه‌شی تيه‌يگ دريژه‌ به‌يگه‌ زه‌مانه‌ی دكتاتۆريه‌ت و ناهميكردن فه‌قيرو چه‌وسياگ له‌گشت هه‌قه‌يلی و جوير (دارته‌نويرشيون) هه‌رئاگرقرمزه‌و بكه‌يگ له‌ناو ئی ته‌نوير گه‌رمه‌ ك عراقه‌ . بيگومان يه‌يش چووگه‌وه‌ ئه‌را هووكاره‌يل فره‌يگ ، له‌وانه‌يش :

١- سه‌ره‌كيترين هووكار گومبوين ياسا يا قانوون و كزی (ضعف) حكوومه‌ت‌ .

٢- ناكووكی لايه‌نه‌يل سياسی له‌ناونی خوه‌يان .

٣- مه‌سه‌له‌ی تايفی و ره‌گه‌زی‌ .

٤- ته‌قينه‌وه‌ی وه‌رده‌وام وكوشت وكوشتاررووژانه‌ .

٥- وجوود ده‌س ده‌ره‌كی له‌شيوانن وه‌زع وڵاته‌گه‌ .

٦- جی وه‌جی نه‌كردن مادده‌يل ده‌ستووری .

٧- ته‌سريحداين هه‌ر وه‌رپرسيگ و هه‌ر حزبيگ وه‌مه‌رام خوه‌ی .

٨- ئوميد هاوردنه‌وه‌ی سه‌رله‌نوو ره‌فتارو شيواز دكتاتۆريه‌ت .

٩- له‌يه‌ك نه‌ڕه‌سينه‌وه‌ی لايه‌نه‌يل به‌شدار له‌پرووسه‌ی سياسی وڵات .

١٠- ده‌رفه‌تداين وه‌ تاوانباره‌يل و ده‌ركردنيان له‌زندان .

گشت ئه‌يانه‌و بيجگه‌ هووكاره‌يل تر ك بوينه‌سه‌ وه‌ربه‌س و كيشه‌ی فره‌ گه‌ورايگ له‌وه‌رده‌م پرووسه‌ی ئازادی و يه‌كسانی و ژيان هاوبه‌ش و ئاراميگ له‌ناونی نه‌ته‌وه‌و ملله‌ته‌يل ئی وڵاته‌ ، لايه‌ن له‌يوا هه‌س ته‌نيا خوه‌ی وه‌خاوه‌ن هه‌ق و خاوه‌ن عراق زانيگ و مه‌ردمان تر وه‌بيگانه‌ دانه‌يگ و تا دويه‌كه‌يش په‌ليگ داشتگه‌ له‌چه‌وساننه‌وه‌ی چينه‌يل تر كوومه‌ڵگاو تائيسه‌يش هوير دكتاتۆريه‌ت و شۆڤێنی زاڵه‌ له‌ سه‌ری و نيه‌توايگ له‌خوه‌ی زياتر كه‌سيگ تر باڵاده‌س بووگ و ئازادی و ديموكراسی وه‌ دوشمن ئنسانيه‌ت زانيگ ، له‌هه‌مان وه‌ختيش به‌ش خوه‌يشی ديريگ له‌ناو حكوومه‌ت عراق تازه‌ . لايه‌نيش هه‌س بيس وچوار سه‌عات ده‌نگ ناڕه‌زايی به‌رزه‌و كه‌يگ و پشتگيری كه‌يگ له‌وانه‌ك عراق كردنه‌سه‌ مه‌يدان كوشت و كوشتارو ده‌ريايگ له‌خوين بيتاوانه‌يل . ئه‌گه‌ريش بايمنه‌ بان خزمه‌تگوزاری و ئاوه‌دانی ته‌نيا هه‌ر رووژه‌يليگ وه‌رجه‌ هه‌ڵوژاردنه‌يل ئه‌و دروشم يا شعاره‌يله‌ ژنه‌فيم له‌وه‌ختيگ هه‌وه‌جه‌ وه‌ ده‌نگه‌يلمان ديرن و قه‌وڵه‌يل فره‌ی فراوانيگ دريه‌يگ و دوياخريش نك ناهمی و هه‌ناسه‌ی سه‌رد . دی يه‌سه‌ مه‌ردم بيده‌سڵاتيش هه‌ر چه‌وه‌ڕی ئه‌وه‌ كه‌ن كه‌ی وای ره‌حمه‌ت هه‌ڵكه‌يگ و عراقيگ سه‌قامگيرو ئارام بايگه‌ وجوود و مه‌ردميش له‌سايه‌ی وچانيگ بيه‌ن و بويشن ئوخه‌ی .