ڕاپۆرته‌هه‌واڵ: "وه‌هار عه‌ره‌بى" ئاره‌زوو كورد زینگه‌و ئه‌كا

شفق نيوز

ئاره‌زووه‌یلیان ئه‌را ساڵه‌یل دویرو دریژیگ  له‌ ده‌وڵه‌تیگ سه‌روه‌خوه‌یى تازه‌ له‌ سه‌ده‌ى 21و یه‌كه‌م جاریش دوید ئى ئاگره‌ كورد عراق به‌رزیه‌و كه‌ن.

 

هه‌چه‌نى فره‌یگ له‌ كورده‌یل وه‌چه‌و گومانه‌و نوڕنه‌ ئه‌وه‌ك له‌رژیم سورى لاده‌یدو  راپه‌ڕین دروس كه‌ن وه‌بوونه‌ى یه‌كه‌وگرتن شووڕشكاره‌یل، وه‌لى شماره‌یگ له‌لیان وه‌تایبه‌ت عراقیه‌یل جوور هانده‌ریگ بته‌و وه‌ره‌و یه‌كگرتن زاننه‌ى.

 

هه‌ق بریار چاره‌نویسیش ئشاره‌ت زه‌مانه‌تیگه‌ ئه‌را هه‌ق ئاشكراكردن ده‌وڵه‌ت، ك یه‌یش له‌ زوورم سستمه‌یل ناوخوه‌یى حزبه‌یل كوردى له‌ هه‌رێم كوردستان وجوود  دیرید له‌وانه‌یش: یه‌كێتى نیشتمانى كوردستان و پارت دیموكرات كوردستان.

 

كه‌سه‌یلیگ باوه‌ڕیان له‌یواسه‌ ك ئاشكراكردن ده‌وڵه‌ت كوردى سه‌ر ناگرێد تا مه‌سه‌له‌ى كه‌ركووك و ناوچه‌یل تر داوڕیاگ یه‌كلاوه‌ نه‌ود.

 

له‌ كه‌ركووك نه‌فتداریش جیاوازى نه‌ته‌وه‌یى هه‌س، كورد وعه‌ره‌ب و توركمان هه‌ق خوه‌یان توان، هه‌ر له‌وه‌ر ئه‌وه‌یش بویه‌سه‌ سه‌رچه‌وه‌ى كیشه‌ى ئدارى و له‌هه‌مان وه‌خت وه‌رپرسه‌یل گه‌ورایش باوه‌ڕیان ئه‌وه‌سه‌ وه‌ شیواز گونجیان چاره‌سه‌ر بكریه‌ێد.

 

له‌ى باوه‌تیشه‌و مه‌حموود محه‌مه‌د سه‌ركرده‌یگ له‌ پارت دیموكرات كوردستان ئه‌را "شه‌فه‌ق نیوز" وت: له‌ئاكام كۆنگره‌ى هه‌ولێر له‌بان دوڵه‌ت كوردى، بایه‌سه‌ قسه‌ له‌بان ئه‌و هووكاره‌یله‌ بكه‌یم ك هیز وبته‌وى ده‌ێده‌ نه‌ته‌وه‌گه‌مان تا بتویه‌نیم ده‌وڵه‌تمان وه‌ گووره‌ى ئه‌و بته‌ویه‌ دامه‌زرنیم و ویاخریش چوین بتویه‌نیم پشت وه‌خوه‌مان بووه‌سیم.

 

ئه‌و كۆنگره‌ له‌ژیر ناونیشان" پرسیار ده‌وڵه‌ت كوردى له‌ناونى یوتیبیاو تاریخ"ساز كریاو شماره‌یگ له‌ وه‌رپرسه‌یل حزبى و پسپۆر  و شیه‌وكه‌ره‌یل له‌تى قسه‌ كردن.

 

مه‌لا به‌ختیار ك سه‌ركرده‌یگه‌ له‌ یه‌كێتى نیشتمانى كوردستان، ئه‌را(شه‌فه‌ق نیوز)وت: سازكردن ئى كۆنگره‌ نیشانه‌ى وجوود وه‌ربه‌س كوردیه‌ ك تیه‌یده‌ خه‌یاڵمان له‌باوه‌ت دمه‌زرانن ده‌وڵه‌ت كوردى، ك بایه‌سه‌ ئى مه‌سه‌له‌ تاوتوى یكه‌یم و جواو پرسیاره‌یل ماریفى و بنه‌ڕه‌تى گرینگ به‌یمنه‌و.

 

هه‌میش وت: هویروڕاى جیاواز هه‌س له‌وه‌خت باسكردن ك خزمه‌ت وه‌ مه‌سه‌له‌ى سیاسى و ئابوورى و جوگرافى و ستراتیجى ره‌سنید له‌باوه‌ت چوینیه‌تى وه‌رگرتن مه‌سه‌له‌یل هاوبه‌ش له‌ناونى هیزه‌یل سیاسى و رووشنهویره‌یل.

 

ئه‌وه‌كیش هان كورد ده‌ید ك هه‌ڵه‌په‌ڵه‌ بكا له‌ئاشكراكردن ده‌وڵه‌ت، ئه‌ویش ئه‌و سیاسه‌ته‌یل به‌رهه‌م حكوومه‌ت مه‌ركه‌زیه‌سه‌ ك باوه‌ڕیان له‌یواسه‌ حكوومه‌تیگ دیكتاتۆریه‌ وه‌سه‌ركردایه‌تى نورى مالكى.

 

وه‌ل ئه‌وه‌یشا مه‌سعود بارزانى سه‌رۆك هه‌رێم هه‌میشه‌ باس له‌وه‌ كردگه‌ ك دویاخر كورد بڕیار چاره‌نویس خوه‌یان ده‌ن و قه‌بوول ناكه‌ن له‌ژیر سایه‌ى حوكم دیكتاتۆرى بمینن.

 

هه‌ر له‌ى بوونه‌یشه‌و، شاهۆ سه‌عید، قسه‌كه‌ر وه‌ناو جمشت گۆڕان ئۆپۆزسیۆن، ئه‌را "شه‌فه‌ق نیوز"وت: دامه‌زرانن ده‌وڵه‌ت كوردى هه‌قیگه‌ له‌ هه‌قه‌یل ملله‌ت كوردستان، وه‌لى نیه‌ود ئه‌را رخه‌وبردن وه‌رانوه‌ر یا ده‌وڵه‌ته‌یل تر باریه‌یده‌ كار، چوینكه‌ زوورم سیاسیه‌یل كورد له‌وه‌ختى قسه‌ له‌بان ده‌وڵه‌ت كوردستانى كه‌ن ئامانجیان ئه‌وه‌سه‌ ده‌وڵه‌ته‌یل تر وه‌پى رخه‌و بووه‌ن.

 

مه‌ردمان فره‌یگیش باوه‌ڕیان ئه‌وه‌سه‌، ك سه‌ركرده‌یل كورد خاستر ئه‌وه‌سه‌ په‌یه‌وه‌ندیه‌یلیان وه‌ل ده‌وڵه‌ته‌یل هاوسا وه‌تایبه‌ت ئیران و توركیا و سوریا خاستره‌و بكه‌ن وه‌رجه‌ ئه‌وه‌ك گامیگ وه‌ره‌و ئاشكراكردن ده‌وڵه‌ت سه‌روه‌خوه‌یى بنریه‌ید، یه‌یش له‌وه‌ر نه‌وین ده‌روازه‌یل ده‌ریایى ئه‌را هه‌رێم بیجگه‌ ده‌روازه‌ى وشكانى و ئاسمانى نه‌ود ك په‌یوه‌سه‌ وه‌و ده‌وڵه‌ته‌یله‌.

 

له‌لایگ تریشه‌و عه‌بدولڕه‌حمان سدیق ك شیه‌وكه‌ریگ سیاسى كورده‌، ئشاره‌ وه‌ قسه‌كردن فره‌یگ له‌ى دویاخره‌ ئه‌كا له‌بان دامه‌زرانن ده‌وڵه‌ت كوردستانى وه‌گووره‌ى ئه‌و ئاڵشتكاریه‌یله‌ ك له‌ناوچه‌گه‌ رویدا.

 

سدیق ئه‌را"شه‌فه‌ق نیوز"وت: پیشبینى ئه‌وه‌ كه‌یم ئى ئاڵشتكاریه‌یل سیاسیه‌ له‌ ده‌وڵه‌ته‌یل عه‌ره‌بى بووده‌ مایه‌ى ئاڵشتكارى جوگرافى له‌ناوچه‌گه‌و دویاخریش مه‌سه‌له‌ى ده‌وڵه‌ت كوردستان بووده‌ خواستیگ ناوخوه‌یى پیكهاته‌ى كورد و پیكهاته‌یل تر وه‌ل ملله‌ت كوردا.

 

هه‌میش وت: ئه‌گه‌ر ئى خواست ناوخوه‌ییه‌ بویه‌ خواستیگ دره‌كى ده‌وڵه‌ته‌یل گه‌ورا، ئه‌وه‌ بیگومان ئاشكراى ده‌وڵه‌ت كوردى كریه‌ید له‌وه‌ختیگ ك به‌رژه‌وه‌ندیه‌یل هه‌رێم كوردستان وه‌ل به‌رژه‌وه‌ندى ده‌وڵه‌ته‌یل گه‌ورا یه‌كه‌و بگرید.

 

له‌لایه‌ن خوه‌ییشه‌و، رێبوار سوه‌یلى تایبه‌تمه‌ند، خوازیار ئاڵشتكردن هویرو ڕاى ئاده‌میزاد كورده‌ له‌حاڵه‌ت داواكارى له‌بان دامه‌زرانن ده‌وڵه‌ت كوردى ئه‌را حاڵه‌ت وجوود هه‌وه‌جه‌ى ده‌وڵه‌ت.

 

سوه‌یلى ئه‌را "شه‌فه‌ق نیوز" وت: بار جه‌هانى داواى دامه‌زرانن ده‌وڵه‌ت كوردى له‌لیمان ئه‌كا، ئنجا ئه‌گه‌ر تواناى ئه‌وه‌ داشتیم مه‌سه‌له‌ى ئاشكراكردن بكه‌یمنه‌ راسى ئه‌وه‌ بایه‌سه‌ پشت وه‌ بنیاتناین ده‌وڵه‌ت كوردى بووه‌سیم و سیاسه‌تمان له‌بان شیواز سێ بنه‌ما دابنه‌یم، ناوخوه‌یى و هه‌رێمى و ناوده‌وڵه‌تى.

 

وه‌ باوه‌ڕمانیش بایه‌سه‌ ئاماده‌ى خوه‌مان بكه‌یم ئه‌را قوناغ ناونى په‌نج تا 10 ساڵ تر ئاینده‌ ئه‌را دامه‌زرانن ده‌وڵه‌ت كوردى.

 

وه‌ل ئه‌وه‌یشا رووژنامه‌ى ئیدنلك توركى له‌نیسان گوزه‌یشت ئاشكراى چه‌ن زانیارییگ كرد و له‌وانه‌یش ئشاره‌ت وه‌ ئه‌وه‌ كرد ك حزب كارگه‌ره‌یل كوردستان پشتگیرى ته‌واویگ ئه‌را بارزانى نیشاندانه‌ له‌وه‌ر خاتر ئاشكراكردن ده‌وڵه‌ت كوردى، وه‌لى تاڵه‌بانى ناڕازى بوى له‌بان ئاشكراكردنى له‌ى وه‌خته‌یله‌.

 

 

ج. ا