سه‌خته‌‌ فه‌يلی بويد و سه‌ختتره‌ ئه‌و وه‌رپرسيارێتيه‌ وه‌ربگريد

شفق نيوز

ئيمه‌ له‌ عراق وه‌گشت ئه‌زموونه‌يل شيرين و تيه‌ڵی ئه‌ژيه‌يم و له‌بان ئه‌وه‌يشه‌و ناتويه‌نيم لايه‌ن گشتی ئه‌و پرسياره‌ شيه‌و بكه‌يم ئه‌را باوه‌ڕهاوردن گشت مه‌ردم، چوينكه‌ ديد مه‌رم له‌باوه‌ت مه‌ردم ده‌ورگرد جياوازه‌ له‌ پيشبينی و ريژه‌ی سووزداری و باوه‌ڕه‌يل و ئه‌و ژينگه‌ ك له‌تی ئه‌ژيه‌يدو له‌و هووكاره‌يل چه‌سپياگه‌ ك له‌ دروسكردن ئاده‌ميزاده‌، ئمجا كووچكه‌ره‌يل له‌ كورده‌يل فه‌يلی له‌ ده‌يشت وڵات ئه‌تويه‌نن باس مه‌ينه‌تيه‌يليان خوه‌يان بكه‌ن له‌و شوونه‌يليانه‌ ك وجوود له‌تی ديرن و ناتويه‌نن تاريفيگ ئه‌را گشت مه‌ردم بكه‌ن وه‌ تايبه‌ت ئه‌را ئه‌و رووڵه‌يل ئی پيكهاته‌ ك له‌ناو وڵات ئه‌ژيه‌ن.

دی نوڕيد شيواز هويره‌وكردن ك بڕيگ له‌ هس كرده‌وه‌يی له‌باوه‌ت بار راسكانی له‌تی گومه‌ جوور هاووڵاتييگ نيشته‌جی به‌غدا ئه‌را نموونه‌و ناڵنيد وه‌ده‌س نه‌وين ئاسايش و خزمه‌تگوزاری و جياوازی ديدو هوير وباوه‌ڕ و رووشنهويری، ك ئه‌گه‌ر له‌ شوونيگ تر بوياتاد شايه‌ت بڕياره‌يلی ئالشت بدێ وه‌ گووره‌ی شيواز كيشه‌يل و ئه‌و بار و ژينگه‌ ك له‌تی ئه‌ژيه‌يد. هه‌ر له‌وه‌ر ئه‌وه‌يش دوينيد ئه‌وه‌ك له‌عراق نيشته‌جيه‌ئه‌وله‌ويه‌تيگ نه‌يريد له‌ يايگرتن زووان ئنگليزی، له‌وه‌رانوه‌ر ئه‌وه‌يش هه‌ركه‌سيگ له‌ ده‌يشت ئه‌ژيه‌يد ئه‌وله‌ويه‌ت له‌ يايگرتن زووان عه‌ره‌بی له‌لای وجوود نه‌يريد، ك جی داخه‌ ئی دو شيوازيشه‌ به‌شدارن له‌ نه‌داين گرينگی وه‌ زووان داڵگی(شيوه‌زووان فه‌يلی).

ئمجا له‌ گرينگترين ئه‌و مه‌سه‌له‌يله‌ ك بويه‌ هووكار مه‌ندنه‌وه‌ی سيمای فه‌يلی، ئه‌ويش سروشته‌ ئاسانه‌گه‌ی بوی له‌ هه‌ر ژينگه‌يگ له‌تی وجوود ديريد له‌وه‌ختيگ ك دويره‌ له‌ سای نيشتمان داڵگ و خيزان و له‌ده‌سداين زووان و رووشنهويريه‌گه‌ی. له‌ وه‌رانوه‌ر ئه‌وه‌يشه‌ منای وه‌رده‌واميگ هه‌س له‌بان رووڵه‌يل ئی پيكهاته‌ له‌لايه‌ن كه‌سه‌يل تره‌و وه‌ ئه‌وه‌ك ئه‌ركه‌يليان جيوه‌جی ناكه‌ن و خوه‌يان ده‌رناخه‌ن له‌گشت بواريگه‌و له‌وه‌ختيگ ك بايه‌سه‌ خوه‌يان نيشان بيه‌ن و ناسنامه‌ی خوه‌يان بچه‌سپنن جوور هه‌ر مه‌ردمانيگ تر.

دی وه‌و خاتريشه‌ هه‌ميشه‌ وجوود تومه‌تباری ئاماده‌كرياگيگ دوينيم و ته‌نانه‌ت چه‌وه‌ڕی ژنه‌فتن جواويش ناكاو ئه‌و تومه‌ته‌يليشه‌ ئه‌وه‌سه‌ ك ئويشن فه‌يليه‌يل يه‌كيگ نين و دويرن له‌ وتار يه‌كگرتگ له‌باوه‌ت كيشه‌گه‌يان، ئمجا له‌ جواويش جيوازی جه‌وهه‌رييگ هه‌س ئاساييترين جواويش له‌وه‌خت سه‌ردان ده‌زگايه‌يله‌ ك مه‌ردمان تر له‌ عه‌ره‌به‌يل به‌غدا هه‌وه‌جه‌ وه‌ سه‌ردان ده‌زگای ته‌جه‌نس ناكه‌ن و له‌ويا دياره‌ ته‌نيا ئه‌را ئيمه‌ دامه‌زرياگه‌و ئاواره‌يل ئيرانيش به‌شيگ له‌تی ديرن و ته‌هران ده‌سنيانشانيان كردگه‌و ئه‌را ماوه‌ی سێ ده‌يه‌س كارت سه‌وز له‌ ره‌نگ ژيانيان وه‌ يه‌كجاری نه‌وڕياگه‌ وه‌ بوونه‌ی ئاست وه‌ربه‌سه‌يله‌ ك ئه‌رايان دانرياگه‌، ك دويای ئه‌وه‌يش گشت ئه‌و سه‌ختيه‌ قه‌بوول كريا ك له‌تی ژيه‌يم.

دوياخريش ئه‌وه‌ك باسی كرديم و وه‌گووره‌ی ده‌رخستن به‌ش كه‌ميگ له‌وه‌ك بويمنه‌ فه‌يلی و ئه‌و وه‌رپرسيارێتيه وه‌گشتی بگريمنه‌ خوه‌مان، وجوود ئه‌و مه‌ردمان فريه‌ی پيكهاته‌مانه‌ له‌بان جه‌هان په‌يوه‌نديه‌يل كوومه‌ڵايه‌تيه‌ ئاشكراو دياره‌، ك چه‌نيگ ئوميده‌وار بويم له‌ ماوه‌ی مانگيگ له‌ واده‌ی ده‌رچگن گووڤار(فه‌يلی)كاردانه‌وه‌يگ ئی به‌رهه‌م و هه‌وڵ وه‌رده‌وام لاپه‌ڕه‌يل گووڤارمانه‌ بوينم، ك وه‌رپرسيارێتی هاوبه‌شيگ له‌لی دوينم دوير له‌ تونڕه‌وی و ته‌ماح و وه‌بی خه‌رج يا هويچ منه‌تيگ وه‌خاتر بته‌وكردن يه‌كگرتنمان يا ده‌وڵه‌مه‌نكردن ئه‌رشيف رووشنهويريمان.

ئی وه‌رپرسيارێتيه‌ وه‌ قه‌واره‌ی سه‌ختيه‌گه‌ی هه‌ميشه‌ خاسسازی وه‌پی ئه‌كه‌يم و وه‌رده‌وامی وه‌پی ئه‌يه‌يم، چوينكه‌ هه‌وه‌جه‌ ئاماده‌گی ديريد له‌ وه‌خت و شوون درياريكرياگ و هه‌وه‌جه‌ وه‌ جورئه‌ت ده‌رخستن و خواست چه‌وديری ديريد وه‌بی له‌وه‌رچه‌وگرتن عومر يا ره‌گه‌ز.

دی هه‌ر وه‌و سه‌ختی‌ فه‌يلی بوين و ئه‌و وه‌رپرسيارێتی ته‌مامه‌ گووڤار "فه‌يلی" ره‌سيه‌ يانزه‌مين ساڵ عومری و پيرووزبايی له‌ گشت ئه‌و كه‌سه‌يله‌ ئه‌كه‌يم ك وه‌ ته‌نيا وشه‌يگيش له‌ی ده‌سكه‌فته‌ به‌شداری كردنه‌.

عه‌لی حسێن فه‌يلی

ج . أ